01 Aug 2019
قراءة فى المؤتمر الوطنى السابع للشباب !!
——————————————-
ناس كتير أوى ركزت في اللى قاله واللى اجاب بيه الرئيس عبد الفتاح السيسى فى جلسة إسأل الرئيس واللى كانت جزء من فعاليات المؤتمر الوطنى السابع للشباب … و ده شئ جميل .. ومعاهم حق طبعاً ، لأن الرئيس عودنا إنه بيجاوب على كل اللى بيخطر فى بالنا من اسئلة واطروحات فى الجلسة دى … لكن إسمحولنا نقول إن كلام الرئيس على مدار الأيام وفعاليات المؤتمر نفسه خلقت حالة ووضحت أشياء كتيرة ، واللى من وجهة نظرنا لا تقل فى الأهمية بل وتزيد عما تم طرحه فى خلال جلسة إسأل الرئيس … و إحنا هنا هنسرد أهم النقاط اللى تم مناقشتها سواء كان خلال جلسة إسأل الرئيس أو خارجها من خلال الفعاليات اليومية للمؤتمر واللى كانت بتحمل رسائل صاروخية للداخل والخارج:
أولا … جلسة محاكاة الدولة المصرية كانت من أهم ما تم طرحه خلال فعاليات المؤتمر .. ونقدر نقول إنها يمكن تكون عملت صدمة لدى كثير من الأجهزة والتنظيمات والدول المعادية لمصر ، وأظهرت إن الدولة بتعد كوادر شابة بالفعل علشان تقود الدولة المصرية فى المستقبل … و كلمة الرئيس إنه قعد معاهم لمدة 6 ساعات علشان يسمع ويشوف اللى هم بيقدموه واللى مايقدرش يعلنه على الهواء مباشرة لأنه بــ يمس أسرار الدولة .. معناه إن الشباب دوول تحت عين وبصر القيادة السياسية …. و دول مجرد الدفعة الأولى من الخريجين … ولسة باقى الدفعات 🙂
ثانيا .. و ده كمان يتعلق بالنقطة السابقة .. إن عقد المؤتمرات الشبابية بشكل دورى ، ومنتدى شباب العالم .. وخرّيجين البرنامج الرئاسى للقيادة (اللى بالمناسبة مافيهمش أى حد تم إنتقائه بواسطة أو محسوبية أو علشان قريب فلان) ..، كل ده بــ يوجه رسالة لكل عناصر المؤامرة .. بتقول لهم .. خلاص .. شوفولكم لعبة تانية .. لأن الشباب المصرى اللى لعبتم على عقولهم وغررتم بيهم ، وإستغلتوا قلة خبرتهم ووعيهم .. مع تقصير الدولة زمان فى دعمهم ، هم هم نفسهم اللى هــ يهدموا مؤامرتكم ، وهــ يشيلوا البلد فى المستقبل … وخصوصا لما الرئيس قال لهم “يالا شدوا حيلكم علشان تستلموا مننا البلد” 🙂
ثالثا .. مصر مش بتخرج وتأهل شباب مصر فقط .. لكن كمان شباب افريقى واعد .. و ده يصب فى مصلحة مصر مستقبلا كجزء من القوى الناعمة … ويكفى إنك تعرف إن إرتباط الأفارقة بمصر لحد النهاردة هو نتاج السياسة اللى عملها الزعيم الراحل جمال عبد الناصر ، واللى اثرت فى كل أفريقيا عن طريق البعثات الدينية والتعليمية وقناة إذاعة القرأن الكريم ألخ الخ الخ … وهو ده اللى بتعمله مصر دلوقتى بس على طريقة حديثة بضمان شباب هيوصل فى بلده لمواقع قيادية تفيد مصر على المدى البعيد على طريق أفريقيا 2060
رابعاً … الرئيس لفت نظر المصريين كلهم وهو بيوجه خطابه لحكومة المحاكاة وللحكومة الفعلية بعد كلمة رئيس الوزراء المهندس مصطفى مدبولى لما قال بما معناه “إنتم إزاى بتتكلموا كدة ، ومش بتفهموا الناس إن اللى حصل فى مصر ده ، تم إنجازه فى ظروف إستثنائية وليس ظروف عادية” …. معاك حق ياريس … اللى حصل فى مصر فى الــ 5 سنوات الماضية و فى ظل الظروف الإستثنائية اللى بتمر بيها مصر .. ماكانش ممكن يحصل فى عشرات السنين داخل دولة مستقرة هادئة …. اللى عملته مصر فعلا يقارب الإعجاز … و ده اللى بيخلّى العالم كله النهاردة سواء على مستوى الدول أو المؤسسات ، بينظر لنا بكل إحترام وتقدير !!
خامساً .. الدولة إيديها مش مرتعشة .. وإذا كانت بتعمل حساب للرأى العام و ردة الفعل المتوقعة من الناس .. لكنها فى نفس الوقت ، لازم تعمل اللى فيه الصالح … لأن الخوف من قرارات الإصلاح كان ممكن يضيع الدولة دى كلها بعد ماوصلنا لمستوى حافة الهاوية … و ده الثمن اللى إحنا كلنا بندفعه النهاردة نتيجة تراجع الدولة عن تنفيذ قرارات الإصلاح فى سنة 1977 … وتعاقب الحكومات بعد كدة على مدار سنين طويلة ، واللى رفضت تأخذ أى قرارات إصلاحية تحسبا لردة فعل الشارع …. وأدى النتيجة !!! … علشان كدة الرئيس قال إنه لو كان المصريين رفضوا إجراءات الإصلاح فى 2016 كان هــ يدعوا لإنتخابات رئاسية مبكرة علشان مايتحملش وزر ضياع الدولة فى عهده !
سادساً …أخطر تصريح على الإطلاق قاله الرئيس السيسى لما إتكلم بمناسبة توجه الدولة ناحية الميكنة والتكنولوجيا .. وإتكلم عن عقل الدولة المصرية اللى فيه كل حاجة عن مصر والمصريين .. وموجود فى سيرفر عملاق فى مكان ما على عمق 14 متر تحت الأرض .. وهناك مكان أخر تبادلى فيه نسخة ثانية من السيرفر الأول ، فى حالة تعطل أو توقف السيرفر الأول ….. ياااااااه …. ده إحنا كدة دخلنا فى مستوى تانى خالص .. زى اللى كنا بنسمع عنه ونشوفه فى أفلام الخيال العلمى .. متأخرين صحيح ، بس عملناه … ومعنى إن الرئيس يصرح تصريح خطير زى ده ، إنه بيوجه رسالة لأجهزة عالمية .. إننا عملنا ده تحت سمعكم وبصركم .. و مش كدة وبس .. لكن كمان تحدى إنكم مش هــ تقدروا توصلوا له !! 😁
سابعاً … الفساد امر واقع وبنحاربه وبنتعامل معاه ، وبنشتغل على قوانين لخنقه وبالذات فى المحليات .. ومثال واحد فقط إن محجر واحد من المحاجر لو مش متسيطر عليه كويس .. هــ يهدر من موارد الدولة قرابة 35 مليون جنيه شهريا .. ده بند واحد بس … هو إحنا وصلنا للدرجة دى من المكاشفة … وبقينا عارفين نقط الضعف وبنشتغل عليها !!؟؟ .. أيوة .. بس الدولة لواحدها مش هــ تعمل حاجة .. والقوانين لواحدة مش هــ تعمل حاجة .. لازم كلنا نبقى ماشيين فى التوجه ده .. ومثال على كدة اللى حصل فى كرة القدم .. الضمير وعدم التسيب ومعايير الإختيار الموضوعية لازم يكون لهم دور ، وإلا يبقى بنضحك على نفسنا
ثامناً … مصر بتتحرك على مسار إعادة إحياء القوة الناعمة المصرية .. فن وثقافة ومتاحف وأوبرا وفنون نحت وعمارة ألخ ألخ … و ده من أهم دعائم الحفاظ على هوية الدولة .. والحفاظ على تاريخها من محاولات الهدم .. ولو تفتكروا إن كل الدول اللى دخلتها داعش ، كان اول حاجة بتعملها هى هدم المتاحف وطمس الأثار وقتل الفنون ومحو التاريخ … الحرب دى ماكانتش حرب عادية .. لكنها كانت حرب إغتيال هوية وهدم تاريخ وشخصية الدول .. لأن اللى مالوش تاريخ .. عمره ما هــ يكون له مستقبل .. و ده اللى حاولت تيارات التأسلم السياسى تعمله فى مصر على مدار سنين طويلة بمحاولة تجريدها من تاريخها ومحاولة إدخال الحضارة المصرية فى نفق الوثنية والكفريات .. وده مش صحيح … سامعنى إنت يا بتاع السخرية فى الفاضية والمليانة من تاريخ مصر القديمة !!؟؟ ..
تاسعاً .. مصر عندها إكتشافات غاز وبترول كتيرة أوى .. حوالى 82 كشف لم يتم الإعلان عنهم .. و لسة كمان اللى هــ يتم إكتشافه فى البحر الأحمر ، واللى ماكانش ممكن يحصل لولا إتفاقية الترسيم البحرى اللى إتعملت مع السعودية … واخدلى بالك إنت !؟؟ 😉🙂
عاشراً… الرئيس كان سعيد جدا وهو بيتكلم عن الإكتشافات والإفتتاحات اللى مش لاقي لها وقت علشان يعملها .. واللى كانوا بيتكلموا عن العاصمة الإدارية .. إحنا بنقول لهم إنه فيه 12 مدينة اخرى هــ تظهر للنور و هــ يتم إفتتاحهم …. لكن فى نفس الوقت .. و رغم سعادة الرئيس .. إلا انه مهموم جداً بما يحدث فى المنطقة .. وشايل على اكتافه حمل كبير تنوء به الجبال .. من أجل المحافظة بقدر الإمكان على ألّا تنزلق المنطقة فى اتون حرب تأكل كل شئ … و ده كان واضح فى كلامه وصوته ولهجته … لكن فى نفس الوقت كان كله ثقة فى إن مصر هــ تعدى بإذن الله 🇪🇬💪✌️
وأخيراً .. يبقى البطل الحقيقى لكل ما تم تحقيقه .. هو المواطن المصرى .. العاشق لبلده … أيوة إحنا يامصريين اللى شيلنا بلدنا وحميناها وعدينا بيها لبر الأمان ، وإيدينا فى إيدين جيشنا ورئيسنا … ولسة مكملين بإذن الله … وخليكم فاكرين كلام الرئيس فى نهاية جلسة إسأل الرئيس:
- كل لما تلاقوا نفسكم بتشتكوا او مش عاجبكم حاجه إشتغلوا أكتر…!!!
- كل ما تتضايقوا إشتغلوا اكتر…!!!
- كل ما حد يطول لسانه عليكم ماتردوش عليه … إشتغلوا أكتر…!!!
- كل اما حد يتآمر عليكم ماتضيعوش وقت معاه…!!! … ضيعوا وقت مع العمل والجهد…!!!
إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.