حادث الكورنيش الإرهابى .. شير فى الــ “شر” .. !!

05 Aug 2019

حادث الكورنيش الإرهابى .. شير فى الــ “شر” .. !!
—————————————————–
والله العظيم .. والله العظيم .. ماحدش هــ يديك جايزة أسرع شير فى الكون !!

والله العظيم .. والله العظيم .. ما فيه حد هــ يعبرك ويمنحك جائزة “بوليتزر”.. اللى هى أوسكار الصحافة فى العالم .. علشان سيادتك طلعت اشطر إخواتك ونشرت الهبد قبل أى حد 🤨

والله العظيم .. والله العظيم .. ما فيه حد هــ يفتكر إسمك حتى بعد ساعتين من نشرك لأى خبر بسرعة الصاروخ سواء كان الخبر صح أو لأ …. لكن كل اللى إنت عملته إنك شاركت بكل إيجابية فى إشعال حالة اللغط ، والقيل والقال .. بدون النظر لعواقب اللى حصل … ولما ييجى حد يكلمك .. ترد وتقول يعنى هى جت عليا أنا !!!!

أيوة يا أستاذى الفاضل .. هى جت عليك .. نفس الحجة الخايبة اللى بتتقال كل مرة .. عامل كدة زى اللى بيرمى عقب سيجارة فى الشارع ولما تكلمه يقولك هى جت عليا أنا … لأن الشخص ده مش بيفكر بشكل جمعى .. مش متخيل إن الشارع ده لو مر فيه 10 ألاف شخص و كل شخص رمى عقب سيجارة .. الشارع هــ يبقى مزبلة !!

و هو ده الوضع اللى إحنا فيه دلوقتى على جميع مواقع السوشيال ميديا .. بقت عبارة عن مزبلة .. بل اصبحت ساحة للتبول الأليكترونى ، لكل واحد عايز يهبد شوية علشان اللى حواليه يصفقوله … 😏

هتقوللى ماهو مافيش تغطية إعلامية مناسبة علشان نعرف منها الحقيقة .. هــ اقولك صح .. معاك حق … بس إييه الجديد .. ما إحنا عارفين إن الإعلام عندنا يفتقد المهنية فى كثير من المواقف … لكن مش معنى كدة ، إنك تلجأ لقنوات معادية أو اخبار طايرة على الفيسبوك وتويتر ، ماتعرفش مصدرها منين ، وهل هى صحيحة أو لأ … ده إنت لو روحت لمكان الحادث نفسه وسألت الشهود ، هتلاقى على الأقل 5 رويات مختلفة للحادث !!

مش قادر تستنى ساعة او ساعتين أو 5 ساعات أو حتى يوم ، لحد مايصدر بيان رسمى من الداخلية او من أى جهة مسئولة !!!؟؟ … طب مش قادر تستوعب رد الفعل على نشر أى معلومة غلط داخلياً وخارجياً .. وتأثيرها على مصر هــ يكون إييه !!؟ … 🙄
.
أهالينا زمان علمونا إن “الأدب فضلوه على العلم” .. لكن للأسف .. فيه ناس فى الزمن ده مؤمنين بمبدأ إن “الشير فضلوه على العلم” … والمشكلة الأكبر إن الشخص بعد ما بينشر المعلومة الغلط .. وتظهر الحقيقة .. مش بيفكر يمسحها من عنده أو يلغيها أو يكذبها .. لأن الأنا عنه أهم من بلد بحالها

ده حادث سير عادى .. لأ ده عمل إرهابى وتقصير أمنى … لأ دى عربية إصطدمت بسيارة انابيب بوتجاز .. لأ دى كانت عربية ملاكى .. لأ ده كان ميكروباص محمل بمتفجرات .. لأ ده إنفجار فى معهد الأورام .. أصل دى إسطوانات الغاز .. لأ لأ لأ … ده الميكروباس فجر نفسه فى المعهد …. ألخ الخ الخ

أى أخبار تانية متداولة .. حتى لو كانت صحيحة .. مالناش دعوة بيها …
لكن السؤال بقى اللى بيطرح نفسه .. ومايحتملش أى معنى تانى غير المكتوب … هى الجهات وإلا الصحف ، وإلا القنوات وإلا المواقع الإخبارية ، اللى طلعت من أكثر من 12 ساعة ، واعلنت إن الحادث اللى حصل ده حادث إرهابى ، قبل أى بيانات رسمية أو تفاصيل أو معاينة أو تحقيقات .. ياترى عرفت منين إن الحادث إرهابى !!!؟؟؟ 🤔🤔

عموما … بنقول لكل اصدقائنا اللى تصرفوا صح زى ما إتعودنا منهم “ربنا يبارك في عقولكم ، ويبارك فيكم لبلدكم ولكل الى حواليكم … وبنقول لكل اللى شرب المقلب وشارك فى الهبد زى كل مرة “ربنا يقدرك على فعل الخير” … 😏

و فى النهاية … كلامنا مش موجه لناس بعينهم .. ولا عندنا أى إستعداد ندخل فى جدال مع أى شخص شارك فى فعاليات الهبد ده سواء بحسن نية أو بسوء نية ، أو يدخل يبرر ويحاول يثبت لنا وجهة نظره … إحنا بنتكلم عن موقف عام .. وفخ بيسقط فيه البعض فى كل مرة بتحصل فيها مواقف مشابهة !

خالص عزائنا لأسر شهداء الحادث الإرهابى .. و ربنا يرحم شهداء الوطن ويسكنهم فسيح جنته .. و لك الله يا مصر ويا شعب مصر فى مواجهة تلك الحرب القذرة الملعونة ضد من يؤيد ويعين ويمول ويساند ويبرر ويتعاطف مع الإرهابيين ومن ورائهم .. و كل من يزايد على بلدنا مصر لصالحهم

إرفع راسك .. وإعرف قيمتك وقيمة مصر .. وإفخر ببلدك .. علشان تقدر تفهم ، اللى بيحصل معاك ، و حواليك.

لمتابعة تعليقاتكم