خبراء النووى … حضروا نفسكوا… عندكم طلعة

14 Aug 2019

خبراء النووى … حضروا نفسكوا… عندكم طلعة
————————————————

في عام 1968 أخرج الراحل المخرج فطين عبد الوهاب الفيلم الكوميدي الرائع “عفريت مراتي” …. للسيناريست العبقري “على الزرقاني” …. و بطولة صلاح ذو الفقار و شادية …. و تدور أحداثه عن مرض نفسي يصيب الزوجة “شادية” المولعة بخيال السينما و اللى بتتقمص دور بطلة أي فيلم تتفرج عليه.

تشوف فيلم ريا و سكينة … تطلع من السينما عايشة دور سكينة و تتكلم و تتصرف زيها و تحاول تقتل أي حد زي ما شافت شخصية الفيلم بتعمل …. تتفرج على فيلم “إيرما لادوس” … تطلع تلبس فستان فاضح و تقف تشقط رجالة من على الناصية و تعيش عيشة فتيات الليل الغواني زي ما شافت في الفيلم … و أنا شخصيا دايما بستني المشهد بتاع مراة حسن مصطفي “الفنانة سهير رضا” …. و شادية “إيرما لادوس” بتقولها …. “إبعدي عن الزبون يا أرشانة ” و هي بتحاول تحمي جوزها و تقوله ….. “يلا بينا يا حفظي 😂😂😂 “

و مع إن الفيلم يعتبر من الفانتازيا الكوميدية اللى المفروض لا تمت للواقع بصلة …. إلا إن السناريست العبقري “على الزرقاني” يوم ما كتب سيناريو الفيلم ده مكنش ممكن يتخيل أنه بيكتب فيلم واقعي عن الحياة اليومية في القرن الـ 21 اللى عايشينها النهارده و بنشوفها كل يوم … و إن المرض النفسي اللى كانت بتجسدة الفنانة شادية في الفيلم …. هــ يصبح مرض العصر الحالي.

فــ تلاقي المواطن من دول يصحي الصبح عينيه معمصة بعد ما نام بيفكر في فشله في إدارة مشكلة إصلاح الأسانسير مع إتحاد العمارة بتاعته اللى كلها على بعض ميكملوش 20 شقة … و بعد ما فشلوا فشل ذريع لسنوات طويلة أنهم يكتشفوا أنهي شقة بترمي كيس الزبالة في مدخل العمارة …. فيقوم يحاول يهرب من واقعة … و يفتح الفيسبوك و يقول إستعنا على الشقي بالله … و أول خبر تقع عينه عليه أيا كان مجاله … سياسي – إقتصادي – ديني – علمي – أمني – فضائي – عسكرى – صناعي – زراعي – طبي … أيا كان …….. يقوم متحول و عايش في الفضاء السرمدي الحلزوني و متقمص شخصية خابوووور إستراتيجي يفتي في إدارة دولة شعبها 100 مليون و يقوم هابد البوست المتين و التعليقات الأمتن و دالى بدلوه في الموضوع و مطلع كمية غازات كبريتية قاتلة بأصوات هادرة …. و تلاقي ناس داخلة عنده تحت تأثير الغازات دي و اللى أصبحت مدمنة ليها … تعمل دماغ و تعيش معاه في فضاؤه السرمدي غازاته القاتلة و عالمة الوهمي و تقوله “الله عليك يا أوووستااااذ … إدينا كمان ” …. و مش بس كده … ده كل واحد يتقمص شخصية خابووور أخبر منه و يعللي عليه في سباق محموم مين يصدر صوت أكبر من التاني في إطلاق الغازات 😊 😊 …. و لو حد كلمه و قال له إيه الهبد اللى بتقوله ده …. اللى بتقوله ده لا ليه سند علمي و لا واقعي و لا بيحصل أو بيسمح بيه في أي مكان في العالم …. … يرد عليك بكل بجاحة و يقولك ” أنا مواطن و حقي الدستورى إني اعبر عن رأيي و أطلع غازاتى في أي وقت … إخراج الغازات هو حق دستورى لكل مواطن”

و عادة تستمر هذة الكائنات في قعدة إطلاق الغازات الجماعية دي من 24 ساعة الى 48 ساعة على الأكثر …. لغاية لما يلاقوا موضوع جديد يتلموا فيه و يكرروا نفس الموضوع ….. و ده اللى إحنا شايفينه و عايشينه بقالنا اكتر من 7 سنين من ساعة بالوعة المجارى لما طفحت في وشنا في أحداث يناير …. و الأمثلة على ده كتيييييير جدا .

مع أول خبر لحادث إرهابي يتحول إلى خابور أمني و يهبد و يفتي في كيفية تأمين الكمائن و التكتيكات العسكرية …. و في نفس ذات نفس اللحظة يطلع خبر حفر قناة السويس … تلاقية خلع عباءة الخبير الأمني و تحول إلى خابور إقتصادي و يهبد في عدم جدوى محور القناة الإقتصادي و يحلف طلاق تلاتة إن القناة هــ تخسر و إن البنوك مش هــ تعرف تسد أصول الشهادات او حتي تدفع فوائدها للناس …. و لما الغازات بتاعته معملتش نتيجة … يقوم متحول الى خبير بيئي و يتباكي على زواج القريدس البحري و الإنتقام الكبير اللى هــ تعمله القناديل البحرية اللى هــ تهاجم رفاصات السفن العابرة …. و اللى بعدها على طول كلمنا على خطط تطوير التعليم و التذاكر اللى هــ تعملها الوزارة لدخول الطلاب للمدارس …. و تعويم الجنيه و الديون و بيع آبار الغاز و ترسيم الحدود البحرية و البرية و فشل صفقات التسليح الجديدة و فشل الأمن المصري في تفكيك الخلايا الإرهابية و وقف العمليات الإرهابية غيرها من الهبدات اللى كانت بمعدل 36 ضربة غاز في اليوم و لا أجدعها مدفع رشاش … و اللى إنتهت بقصة …. سور العاصمة الإدارية الجديدة و إزاي سيتركون العاصمة القديمة تحترق 😊

أما العرض الحالي بنجاح منقطع النظير هو موضوع الإنفجار اللى وقع في روسيا من كام يوم … و اللى على طول تحولت “إيرما لادوس” إلى شخصية عالم ذرات نووي كبير …. و لان الموضوع ده جه في صلب التخصص بتاعهم و هو الذرات …. الكل تسابق مين يطلع علينا ذرات أكبر من التاني … و مع إن روسيا بنفس ذات نفسها ماطلعتش أي بيانات تفصيلية ….. إلا أنهم قعدوا يشرحوا تفاصيل منعرفش جابوها منين … ميعرفهاش إلا أجهزة مخابرات دول كبرى تقدر تخترق التعتيم الروسي … و إن الإنفجار ده في مفاعل نووى … و ماتعرفش إزاي ربطوا ما بين الإنفجار ده و مفاعل الضبعة المصري اللى لسه هــ يتبني أصلا … و إزاي انه طلع عارف و واعي و إنه حذر الدولة المصرية من التعامل مع الروس و إن ليه مروحناش للأمريكان الحلوين في المجال ده ….. و هات يا هرى و هبد …. تخيل يا مؤمن 😊 😊 …. الفاشل ده بيعرف أكتر من أجهزة دولة في حجم مصر 😊 😊

و مع إن المعلومات المتاحة عن الحادث ده شحيحة جدا بسبب التعتيم الروسي … و ده حقهم طبعا لأن الموضوع ماطلعش موضوع مفاعل و لا الكلام الفاضي ده…. إلا أن الحاج ترامب أبو حنان طلع و فسر قصة الموضوع …. القصة و ما فيها أنه طلع إختبار سلاح إستراتيجي سري جديد هــ يقلب موازين القوي العسكرية و ده بيفسر سر الهجمة الإعلامية الضارية على روسيا من أذرع و دلاديل أمريكا سواء في الإعلام او مواقع الفيس …. لأن اللى إنفجر هو صاروخ جديد بتكنولوجيا جديدة بــ يتم فيها إستخدام وقود نووي لدفع الصاروخ بدلا من الوقود التقليدي … فأي صاروخ المدي بتاعه و المناورات اللى يقدر يعملها عشان يهرب من الدفاع الجوي محدد بكمية الوقود اللى بتتحط فيه … فــ تخيل بقى صاروخ وقوده مش بيخلص … يقدر يطير بسرعة عشرات أضعاف سرعة الصوت لأيام و شهور و يعمل عدد غير محدود من المناورات … و انت قاعد تتفرج عليه و مش عارف هو طاير عادي و لا هــ يضرب … و لو ضرب … هــ يضرب إمتي و هــ يضرب أنهي حته في العالم بالظبط لما تجيله الأوامر …. و كمان حضرتك ماتعرفش هو شايل رأس تفجير تقليدية و لا نووية.

المهم تجربة السلاح الجديد ده فشلت في ميدان تجارب عسكري زيها زي تجارب أي سلاح جديد بــ يتجرّب … أموت و أعرف بقي … إيه دخل مفاعل الضبعة النووى المصري اللى لسه هــ يتبني بتجربة سلاح جديد في روسيا ؟؟؟؟ …. ماعرفش 😏😏😏….. لكن دائما أبدا أووستااااذ الذرات اللى قاعد على الفيسبوك له رأي آخر …. أومّال هــ يطلع الذرات النووية بتاعته على مين غيرنا … ماهو لو كتمها ممكن يحصله حاجه.

و الغريب إن عالم الذرات ده اللى عمال يصرخ لصالح الغرب و يقول التكنولوجيا الغربية النووية الذرية أفضل من التكنولوجيا الروسية …. مايعرفش إن مثلا آخر 3 حوادث في مفاعلات نووية ، حصلت في كوكب اليابان الشقيق اللى بيستخدم تكنولوجيا غربية في أعوام 1999 – 2002 – 2011 على التوالي … و إن فرنسا برضوا حصل فيها حادث في أحد مفاعلاتها عام 2011 … و حتي أمريكا بنفس ذات نفسها كل شوية يحصل فيها حادث تسريب كان أخرهم عام 2014 في إحدي محطات فصل النفايات النووية…. و ده جزء من تاريخ حوادث المفاعلات النووية اللى بتحصل كل كام سنة و الناس بره بتتعامل معاها عادي و الكوكب لا بينفجر و لا البشرية بتفني … لان معاملات الأمان بتقلل كتييييير جدا من تأثير الحوادث … و بــ يبقي معمول حساب الحوادث اللى زي دي.

أرجوكم الرحمة … لقد تشبعنا بالغازات …. و إتصدعنا من هبدات الهبيدة اللى هما مرضي نفسيين بيتقمصوا دور أى خبير عشان يداروا فشلهم في حياتهم طمعا في التفاعل الوهمي على صفحات الفيسبوك عشان يحسوا إنهم مهمين …. و اللى المفروض محدش يشغل دماغه و يجاريهم في مرضهم النفسي ده …. زي بالظبط شخصية شادية في فيلم “عفريت مراتي” … و اللى لما جوزها حاول يجاريها … لبسته في قضية سرقة البنك اللى بيشتغل فيه .

الناس دي ماينفعش تخش معاهم قعدات إطلاق الغازات الجماعية اللى بيطلقوها على بعض … لأنك غالبا يا هــ تتخنق و تموت او يصيبك تشنجات عصبية ….. او تنجوا بنفسك و تسيبهم على جنب تهرب منهم … و تطبق معاهم أسلوب الراحلة الفنانة “سهير رضا” زوجة حسن مصطفي في الفيلم … لما قالتلة ” يلا بينا يا حفظي ” … و تطلع تجري تنفد بجلدك و دماغك و مناخيرك .

الله يخربيت الفيسبوك اللى جنن الناس و طفح علينا عنبر العقلاء اللى في فيلم إسماعيل ياسين على إنهم صفوة مجتمعية مثقفة ….. على بيت اللحمة الضانى و قطيع الخرفان …..
اللعنة على الهبد … اللعنة على الأبراج ….. اللعنة على الذرات .

تحياتنا

لمتابعة تعليقاتكم