13 Oct 2019
اللى ضيع سوريا هم أهلها .. ومصر ماحدش يقدر يقرب منها !!
————————————————————-
بما إننا لسة فى إطار الحديث عن الغزو التركى للأراضى السورية .. والحديث عن جاهزية مصر للحفاظ على مكتسباتها ضد كل من تسول له نفسه مجرد التفكير إنه يقرب من حدودنا أو مواردنا …. مش هــ نلاقى أفضل من الكام دقيقة دوول اللى إتكلم فيهم الرئيس السيسى فى الندوة التثقيفية … وقال كل اللى بنقوله على صفحتنا بقالنا كام سنة … بس الفرق إن الكلام النهاردة إتقال من رأس الدولة .. يعنى كلام بيتقال بمنتهى الوضوح وبشكل رسمى .. وهذا شيئٌ لو تعلمون عظيم 😉 🙂
كتير كانوا بيسألوا هى مصر جابت أسلحة كتيرة ومتقدمة لييه !؟
مصر مش دولة معتدية .. لكن مصر عايزة تحافظ على حدودها وعلى أرضها وعلى أمنها القومى و على مصالحها .. فكان لابد للجيش إنه يحصل على معدات تمكنه من التفوق فى ظل التطور الكبير اللى حصل فى نظم التسليح فى خلال الــ 20 سنة اللى فاتوا .. و ده خلاص تحقق .. واصبحنا جيش قادر .. وترتيبه متقدم جدا ….. بس الرئيس إبتسم و ماقالش ترتيبه الكام .. لأن الترتيب بتاع “جلوبال فاير” ده بيبقى له حسابات معينة .. لايدخل فيها العقيدة القتالية والفكر الإستراتيجى ، وطرق التطوير ، وكيفية إستخدام السلاح فى أغراض تفوق الأغراض المخصص ليها … و طبعا ما خفى كان أعظم 🙂
طب بالنسبة للدول اللى حصلت لها تحديات ، وبتتكلموا عن التدخل فى شمال سوريا … طب ماتسألوا وتقولوا .. هى الناس تدخلت فى شمال سوريا لييه ؟؟ … مين اللى عمل كدة فى سوريا !!؟؟ .. مين .. !!؟؟ … بتقولوا مين .. !!؟؟ … أيوة .. الى عمل كدة فى سوريا … (((أهلها))) …طب إزاى !!؟؟ .. هو المطلوب بس إشعال الموقف … ونرجع تانى نتكلم عن الجيل الرابع من الحروب … يعنى الفخ بيترمى عن طريق وسائل التواصل ، وبعد ما يتعمل دراسات للمجتمعات .. وتتقسم لشرائح .. وتتحلل علميا .. بــ يتم إستهداف الشرائح دى .. وبمجرد إشعال الموقف … بيبقى خلاص .. وتمشى الحكاية بنظرية ….. (و تأدبا .. مارضيش الرئيس يقول “بنظرية القطيع”) … أيوة .. وبعدها الكل يتحرك .. وطالما تم التحرك .. فــ الموضوع يكبر زى كرة الثلج .. وتروح الدولة !!
إوعى حد يضحك عليك ويشعل لك الموقف ويخليك تتحرك ضد مؤسسات بلدك .. لأن النتيجة معروفة … و ربنا إدانا نموذج محلول … أيوة . يعنى عامل كدة زى الإمتحان ومعاه الإجابة النوذجية بتاعته … و ده علشان نتعلم منه … والخطير بقى إننا لما نبص للخراب والدمار اللى حصل فى الدول اللى حوالينا .. هــ نلاقيه ماحصلش بإعتداء مباشر .. لكن حصل بــ إيديين الشعوب نفسها .. و هى اللى دمرت بلادها
اللى تدخل فى سوريا .. واللى ممكن ييجى يتدخل فى مصر .. لن يحدث ذلك إلا بضعفنا
وبعدين قالها الرئيس بمنهى الوضوح و على بلاطة .. إنه بقدرة جيش مصر الحالية .. لن يستطيع أحد إنه يقرب من مصر
السيسى: “طب حد يفكر كدة يقرب من مصر !! ..” 🙂 🙂 🙂
و فى النهاية .. نختم كلامنا بخبر عاجل:
بعد وساطة مصرية روسية وعملية تقريب وجهات النظر بين الأكراد والنظام السورى … أعلنت وكالة الأنباء السورية عن بدء تحرك الجيش السورى لرد العدوان التركى على الاراضى السورية .. والاكراد يقومون بإزالة كافة الحواجز للسماح بدخول وانتشار قوات الجيش العربى السورى الى منبج
حفظ الله مصر .