الحرب .. وحسابات المكسب والخسارة .. !!

18 Oct 2019

الحرب .. وحسابات المكسب والخسارة .. !!
——————————————–

اخيرا أعلنت الولايات المتحدة الأميركية على لسان نائب الرئيس الأميريكى من قلب تركيا عن وقف إطلاق النار وإيقاف العمليات العسكرية التركية فى الشمال السورى .. بعد كثير من الجدل الدائر وطرقعة اعلامية وتويترية .. فى لفتة لا يمكن لها أن تحدث حتى فى واحدة من جمهوريات الموز على حد وصف مؤيدى هذه الدولة الكرتونية الاردوغانية الاخوانية 😁

و طبعا كلنا تابعنا وشوفنا وضحكنا على الرسالة إللى تم تسريبها من البنتاجون الاميريكى ، و إللى ارسلها الرئيس الأميريكى دونالد ترامب إلى خاقان البر والبحر … الاغا العثمانى اردوغان … وهو بيقول له بلاش تخلى التاريخ يذكرك بإنك شيطان .. ماتبقاش أحمق 😅 …. فى واقعة غير مسبوقة فى تاريخ المخاطبات بين رؤساء الدول … والمصيبة ان إللى سجل اعتراضه على الأسلوب و الألفاظ دى هى روسيا إللى قالت ان إللى حصل ده شيئ غير مسبوق ولا يليق ان يكون أسلوب خطاب موجه لرئيس دولة …… يا نهار اسكت … يعنى تركيا لا اعترضت على لهجة الخطاب .. ولا ردت على الاساءة … واللى رد اصلا دولة تانية …… هو للحد ده وصلت المهانة وانتقاص السيادة … لدولة بيوصف مؤيدى رئيسها ، الرئيس ده بأنه خليفة المسلمين وحامى حمى الدنيا والدين ….. ده الخلافة اتبهدلت خالص يا جماعة … 😅😅

و طبعا ناهينا عن تناول كثير من القنوات الاخبارية العالمية للموضوع بمنتهى السخرية .. لدرجة ان مقدمة أحد البرامج الإخبارية لقناة CNBC .. بعد ما قرأت الرسالة .. ضحكت بسخرية وقالت هى و ضيفها انه مافيش كلام يمكن التعليق به على مثل هذه الرسالة …. و كل ده فى ظل صمت تام من قناة الجزيرة وتابعها قفة .. قصدى قنوات الشرخ ومكملين … مع وجود حملة تويتات من قيادات ومراكيب الجماعة الارهابية بيتكلموا فيها عن عظمة اردوغان وقوته والنصر إللى حققه.. على الإرهاب الكونى إللى كان بيهدد الدولة التركية من البوابة السورية .. و ده شيئ متوقع … بل واسمحولى اشيد به و اصفق له كمان .. لأنهم بيمتلكوا هذا القدر من الصفاقة والتدليس والقدرة على قلب الحقائق الواضحة بهذا الشكل أمام متابعيهم … فى الوقت إللى بنشوف بعض مؤيدى الدولة المصرية اللى هم اصلا على حق .. بيستخبوا و يتداروا .. أمام الشائعات والاكاذيب المغرضة إللى بتهاجم بلدهم .. او امام حتى تصرف خاطئ حصل من شخص أو مجموعة اشخاص سواء كانوا فى موقع المسئولية أو خارجها !! 🙄

المهم .. و رجوعاً مرة أخرى للموضوع الأصلى… فقد أثبت أردوغان باللى حصل فى شمال سوريا انه مش مايفرقش حاجة عن الدواعش .. لأ مش كدة … ده أثبت انه هو والدواعش شيئ واحد … واستخدامه لمليشيات الاخوان وكلاب التنظيمات المتأسلمة فيما يعرف بالجيش الحر .. والفظائع إللى ارتكبوها مع المدنيين السوريين من الاكراد وغيرهم .. وتحريرهم لعدد كبير من اخوانهم من الدواعش بعد ضربهم للسجون إللى كانت بتضم اسرى مقاتلى داعش من مختلف الجنسيات … كل ده يثبت بما لا يدع مجالا للشك … إن أردوغان ونظامه والتنظيم الدولى هم أهم الداعمين لتنظيم داعش الارهابى … و بعلم القوى الكبرى فى العالم … ده اذا ماكانش بتخطيطهم كمان !!

حسابات المكسب والخسارة فى معركة الشمال السورى متشابكة جدا بالنسبة لكل الأطراف على السواء … ولازم نعترف زى ما ذكرنا فى مقالنا السابق ان إللى حصل ده كله تم بالاتفاق بين جميع الأطراف .. ونعنى بالاطراف هنا الدول الكبرى .. لكن فى المجمل … كان الخاسر الأهم والأكبر هو الشعب السورى نفسه !! ..

الدب الروسى حقق مكاسب بمزيد من ترسيخ لوجوده فى سوريا وإظهار قدرته على فرض السيطرة على المجال الجوى السورى وقت اللزوم … و فى نفس الوقت استفاد من ضرب الاكراد .. وإضعاف قوتهم وكسر شوكتهم.

الامريكان سحبوا قواتهم من الشمال السورى وعملوا إعادة تموضع فى مناطق اخرى مع تقليل عدد القوات المتواجدة .. على عكس ما يعتقد البعض من قيام أميريكا بالانسحاب التام من الاراضى السورية … و زيهم زى الروس .. راضيين عن كسر شوكة الاكراد … وكمان أظهروا قوتهم وسطوتهم أمام العالم فى القدرة على تحريك وتوجيه دولة يقودها رئيس أخرق موتور … تم اذلاله والتلاعب به أمام العالم كله … و فى نفس الوقت .. مايهمهمش يخسروه لصالح الدب الروسى .. ثقةً منهم فى القدرة على السيطرة عليه وتدميره وقتما يشائون … زى ما قالها وزير الخارجية الاميريكى:
We are able to shut down the Turkish Economy
نحن قادرون على تدمير الاقتصاد التركى

بالنسبة للأغا العثمانى … ف زى ما قولنا انه تم اذلاله أمام العالم كله … وتخلى عنه الجميع برغم الفيتو الروسى الاميريكى إللى اتعمل علشان يستخدموا الأغا فقط فى تحقيق مصالحهم وتثبيت مكتسباتهم السياسية .. يعنى كان مجرد ركوبة مش أكثر … فى الوقت إللى هيعانى فيه الاقتصاد التركى على المدى القريب والبعيد … نتيجة لعوامل كثيرة لا مجال لشرحها هنا … والمكسب إللى حققه أردوغان هو ضربه الاكراد و هم الشوكة إللى واقفة فى حلقه بمنتهى العنف .. حتى لو كان لذلك تأثير على الداخل التركى مستقبلا … وقيامه بتحرير البعض من رجالته من الدواعش الاسرى فى سجون الاكراد ….

الجيش السورى إستعاد سيطرته على مناطق التحكم الكردية ودخل قطاعات كبيرة ، وتم رفع العلم السورى على العديد من المناطق اللى بيدخلها الجيش السورى لأول مرة منذ أكثر من 5 سنوات … فى الوقت إللى بيعود فيه الاكراد ضعفاء خاسرين لحكم الدولة السورية بعد ما تخلى عنهم كل الاطراف .. واكتشفوا انهم كانوا مجرد اداة بيتم استخدامها لترسيخ التوتر مش اكثر فى المنطقة !! .. والأهم من كل ده ان الغالبية العظمى من الدواعش واللى لسة موجودين فى الاسر أصبحوا تحت يد الجيش السورى

و زى ما قولنا … ان الخاسر الأكبر هو الشعب السورى بغض النظر عن العرقيات إللى فيه .. بعد نزوح مئات الآلاف نتيجة العمليات العسكرية … و حسب مؤسسات الإغاثة العالمية انه أكثر من مليون و 200 ألف مواطن سورى فى حالة اقتصادية وطبية وأمنية سيئة جدا !!! 😏

ونختم المقال بما بدأناه عن خاقان البر والبحر ، إللى مثل أبرع ادواره الكوميدية على طريقة المعلم حنفى بتاع “خلاص هتنزل المرة دى” … بعد ما قال لا تراجع عن العمليات العسكرية… وبعدين ماحدش يملى علينا شروطه .. وبعدين انا مش هاقابل نائب الرئيس الاميريكى ولا وزير الخارجية ، دوول يروحوا يقابلوا نظرائهم .. لأ طب خلاص هاقابلهم بس ماحدش يملى عليا شروط ، ولا وقف للعمليات العسكرية .. طب خلاص ماتزعلوش منى .. انا كنت غلطان … وماكانش العشم تهزأنى قدام العالم كدة يا ابو إيفانكا 😉😆

يعنى فى المجمل .. وبحسابات المكسب والخسارة السياسية … إللى حصل كان ضد مصلحة القردوغان و ضد مصلحة الجماعة والإرهاب الدولى … و فى نفس الوقت فى مصلحة سوريا رغم بعض الخسائر … وبالتالى فى مصلحة مصر

ولما تسمع حد اليومين دوول من حريم السلطان من عشاق الدونية و انتقاص الذات و إللى عايشين حوالينا فى مجتمعنا.. بيقولك .. مالناش دعوة بأردوغان ، وخلينا فى بلدنا … ابقى سمعه ضحكة رقيعة … واعذره .. أصل الصدمة كانت كبيرة عليه حبتين … و بعد ما ربنا يكرمه ويتعافى من الصدمة .. و كل ما يمأمأ تانى .. قول له … إن كنت ناسى .. أفكرك يا ….
………. يا أحمق ….. 😉😁😁

حفظ الله مصر ..

لمتابعة تعليقاتكم