15 Nov 2019
شكر واجب .. !!
—————-
بعد مقالنا بالأمس بخصوص حادث إيتاى البارود .. لقينا ان مستوى الوعى وإدراك الحقائق عند اصدقائنا كان عالى جدا .. حتى وان اختلف معنا بعض الأصدقاء فى بعض الجزئيات الصغيرة فى وجهة نظرنا .. لكن المجمل كان شيئ مفرح … و ده فى الحقيقة شيئ مش غريب على أصدقائنا وأعضاء صفحة كلام فى الصميم إللى بنعتبرهم فعلا نخبة الفيسبوك 💚🙂
لكن .. وبعد جولة مكثفة على الفيسبوك … و على بعض المقالات والفيديوهات إللى اصحابها استغلوا الحدث كالعادة لتصدير خطاب شعبوى واستدرار المشاعر بعبارات الصعبانيات والمتاجرة بمصطلحات الغلابة والفقر والظلم .. بحثا عن اللايكات والشير والتفاعل العالى وبس .. كان الشيئ الملفت ان الغالبية رفضت الكلام ده واعترضوا على استخدام الأسلوب ده فى التعاطى مع الحادث … وكان معظم التعليقات بتصب فى نفس اتجاه وجهة النظر إللى تبنتها صفحتنا .. احنا وبعض العقلاء من إللى بيكتبوا ولهم متابعين على مواقع السوشيال ميديا
إللى حصل ده شيئ ايجابى جدا .. و بيعكس ارتفاع مستوى الوعى عند شريحة كبيرة من المصريين … وان الخطابات الشعبوية إللى بتلعب طول الوقت على وتر العاطفة.. واللى بتستخدمها التيارات اليسارية والإخوان وكثير من المغيبين إللى ماشيين وراهم .. خلاص ماعدتش بتجيب نتيجة .. وفقدت تأثيرها السلبى وقدرتها على التلاعب بالعقول باستخدام الصعبانيات … و هذا شيئ لو تعلمون عظيم 😉🙂
اللى بيحصل ده بيشكل خطر على أصحاب التيارات والايديولوجيات إللى ذكرناها … و على المتسلقين والديدان الفيسبوكية .. إللى بتظهر فى مواقف معينة علشان تلعب بالعقول وتستقطب بعض عشاق الدونية إللى ادمنوا مصمصة الشفايف .. لأن الناس دى فعلا عايشة على كدة .. و مش بيقدروا يعيشوا من غير ما يخلقوا البيئة دى حواليهم علشان يقدروا ينشطوا وينتشروا من خلال المزايدات الشعبوية إللى احنا عارفينها 😁
إللى حصل ده كان شيئ مفرح جدا لينا … و بيوضح ان الخط البيانى لمستوى الوعى عند المصريين فى تصاعد مستمر … و مش بس مستوى الوعى .. لكن فيه حالة رفض للظواهر السلبية إللى اعتدنا نشوفها وكنا بنتفاعل معاها بشكل خاطئ.. و النهاردة أصبحنا بنرفضها.
إللى فاضل بقى ان عملية الرفض دى .. تنتقل للمرحلة الإيجابية… ونبدأ نشوف تصرفات إيجابية على الأرض بتواجه التصرفات السلبية دى .. كل واحد فى محيطه .. فى إطار من الصرامة .. و فى نفس الوقت بأدب وعقلانية بدون الدخول فى اى مشاحنات .. وإعطاء المثل والنموذج الايجابى لما ينبغي أن يكون عليه تصرف المواطن فى تفاصيل حياته
ماترميش زبالة وانت ماشى فى الشارع .. ماتوسخش مكانك .. حافظ على الممتلكات العامة .. حافظ على وسائل المواصلات .. ماتفسدش المظاهر الجمالية .. ماتأذيش البيئة إللى حواليك … الخ الخ الخ
أصدقائنا.. اصدقاء صفحة كلام فى الصميم … صدقونى… مؤشر الإيجابية بيرتفع بشدة … و ده شيئ ممتاز … و مبشر جداً … فماتسمحوش لحد يفسد المؤشر ده .. او يرجع يشدكم تانى للخلف …
الدولة ما بتعملش شعب .. لكن الشعب هو إللى بيعمل دولة !!
شكر كبير للجميع .. من هنا لحد بعد البراميل بشوية كدة 🙂
والقادم أفضل بيكم بإذن الله