23 Nov 2019
الجيش المصري … يد تبني و يد تحمل السلاح .. !!
————————————————-
في الوقت اللى الجيش بــ يسابق الزمن لبناء الدولة المصرية الحديثة بإنشاء المدن الجديدة و المصانع و الطرق و المزارع و الصناعات الإستراتيجية …. و بيكسر كل معدلات التنفيذ المتعارف عليها عالمياً و بأقل التكاليف … لدرجة أنه أنجز في أقل من 4 سنوات فقط ما كان مخططاً له أن ينتهي في 20 عاما …. و في الوقت اللى أصبحنا بــ نتفاجىء كل يوم بإفتتاح مشروع ضخم جديد و نتساءل “هو المشروع ده ابتدي امتي عشان يخلص و يتم إفتتاحة !!!! ” …. و في الوقت اللى عشنا و شوفنا اليوم اللى يتحول السؤال الشاغل للشعب من …. “هى فلوس البلد بتروح فين !؟” …. الى … “هو فلوس المشاريع دي بتيجي منين !؟” …
نلاقي الجيش المصري في نفس الوقت بــ يستكمل عتاده و جاهزيته القتاليه و يصبح أكثر جيش على مستوى العالم يقوم بعدد هائل من المناورات و الانشطة التدريبية و تفتيشات الحرب على كل الإتجاهات الإستراتيجية … و ده في نفس الوقت اللى بــ يقوم بحرب على الإرهاب و تأمين حدود الدولة المصرية و ثرواتها على كافة الإتجاهات الاستراتيجية … سواء في سيناء أو على الحدود الجنوبية أو الغربية أو في جنوب شرق البحر المتوسط .
فــ الجيش المصري هو الجيش الوحيد اللى عنده القدرة على القيام بأكثر من نشاط تدريبي في أكتر من مكان و مع أكتر من دولة في نفس الوقت في خلال 6 أسابيع فقط :-
1) .. مناورات سهم الصداقة – 1 …. لقوات الدفاع الجوى ….. مصر و روسيا
2) .. مناورات فجر الشرق – 1 …. للقوات الخاصة …. مصر و باكستان و الأردن
3) .. مناورات ميدوزا – 9 ….. للقوات البحرية و الجوية و البرية و القوات الخاصة …. مصر و اليونان و قبرص
4) .. مناورات صقور الليل ….. للقوات الخاصة و الاستطلاع ….. مصر و الامارات
5) .. مناورات العقبة – 5 …. للقوات الخاصة … مصر و الاردن
6) .. تفتيش حرب لأحد فرق المشاة الميكانيكية للمنطقة المركزية العسكرية
7) .. تدريب بحرى عابر للأسطول البحرى الجنوبي …. البحرية المصرية و الفرنسية
8) .. تدريب بحرى عابر للأسطول البحرى الشمالى …. البحرية المصرية و الفرنسية
9) .. مناورة رعد 31 للرماية بالذخيرة الحية ….. قوات المنطقة الغربية العسكرية
10) .. تدريب بحرى عابر للأسطول البحرى الشمالى …. البحرية المصرية و البحرية الكورية الجنوبية
11) .. مناورات الموج الأزرق – 2 …. القوات البحرية المصرية و البحرية الخاصة بالسعودية و الاردن و جيبوتي و السودان و اليمن
12) .. تقتيش حرب لإحدي فرق المنطقة الجنوبية العسكرية
13) .. تجربة محاكاة لمركز البحث و الإنقاذ للقوات المسلحة لمحاكاة إنقاذ احدي العبارات الغارقة
كل اللى فات ده هو فقط ما تم الإعلان عنه في خلال 6 أسابيع فقط …. بخلاف العديد من الأنشطة التثقيفية و الندوات و إستضافة كبار الأطباء العالميين في مختلف التخصصات الحرجة بالمستشفيات العسكرية خدمةً للشعب.
و ده أيضا ، بخلاف تطوير منظومات التسليح في كل أفرع القوات المسلحة إما بشراء أحدث منظومات التسليح أو بتطوير المصانع الحربية و توطين تكنولوجيا التسليح الثقيل في مصر بمعدلات تنفيذ غير مسبوقة.
اللى فات ده يؤكد شىء واحد … أن المؤسسة العسكرية المصرية هي أنجح نموذج للقطاع العام في مصر حتي الآن …. و حط تحت قطاع عام دي 100 خط … و لا يجاريه أي قطاع آخر لأن النتائج على الأرض هي من تتحدث…. و هو القاطرة اللى بتقود الإقتصاد المصري و بتقود باقي القطاعات الاخرى للوصول الى التعافي مما أصابها حتي تقف على رجلها و تتولى مسؤولياتها.
للأسف اللى بيهاجم الجيش و بيقول ان الجيش استولى على الإقتصاد و انه بيلغي المنافسة و بيقضى على القطاع الخاص و إن الجندي مكانة الحدود و عيب يشتغل في المشاريع المدنية ….. ده إنسان فااااشل و جاهل تماما و بيغالط نفسه و بــ يسقط فشله و خيبته التقيلة ، إنها بسبب نجاح منظومة وطنية ناجحة اثبتت فساده و أنانيتة و فشلة على مدار عقود .. لأنة لو فكر بتجرد شوية و عقلانية هــ يعرف الأتي :-
أننا لعقود طويلة و لأسباب عديدة يطول شرحها … كنا عايشين في نظام إقتصادي مشوه …. أفرز لنا نظام رأسمالي بــ ثوابت نظام إشتراكي بالي ، و منتهي الصلاحية .. لا يمكن الجمع ما بينهم بأى شكل من الأشكال …. الفرد فيه عايز ياخد كل مزايا الرأسمالية و العيشة الاستهلاكية … و لكن بحقوق النمط الحياتى الإشتراكى اللى عايز ياخد كل حاجه ببلاش … و يقبض مرتبة بأقل مجهود و أقل إنتاجية …. !! .. و على المستوى الأعلي …. ده أفرز نخبة إقتصادية فاسدة …. مصّت دم الشعب بمنتهى الجشع…. و وطنوا ثقافة السمسار اللى مش عايز ينتج منتج صناعى حديث …. لكن عايز يجيب زبالة التصنيع العالمي و يبيعها في الداخل بمبالغ كبيره و هامش ربح يصل الى اضعاف التكلفة الفعلية بدورة رأس مال سريع.
مثلا في قطاع البناء … تم توزيع ملايين الأفدنة على رجال أعمال بملاليم بهدف الإستصلاح الزراعي …. و اللى اتقلبت بقدرة قادر الى كومباندات سكنية فاخرة و ملاعب جولف اتباعت لطبقة غنية بمليارات و اللى كان نتيجتة التوسع في بناء العشوائيات اللى أكلت 2 مليون فدان من أجود الأراضي الزراعية …. و مثال آخر … تم التسهيل لفتح مصانع سيارات لرجال الأعمال … و اللى بدلا من العمل على توطين صناعة السيارات و صناعة سيارة وطنية …. استخدموا نفوذهم لرفض اي اتفاقيات دولية لتصنيع السيارات فى مصر ، و اللى اقتنصتها دول اخرى زي تركيا و المغرب … و إكتفوا عندنا هنا بالتجارة و تجميع موديلات سيارات منزوعة مواصفات الأمان و بيعها للمواطن بأضعاف سعرها بالخارج…. و تم ترك تجارة الأغذية و اللحوم لجشع التجار و ثقافة الإحتكار …. وغيرها من الأمثلة كتيييييرررررر.
و اليوم لما بدأت مؤسسة وطنية مصرية و هي المؤسسة العسكرية المنضبطة في انشاء آليات موازية للانتاج لضبط الأسعار بزيادة الإنتاج و دة اللى بدأنا نجني ثمارة في مجال اللحوم و الأغذية … و بدأنا نشوف الحلم المصري بأننا نسيب الـ 7% اللى عايشين عليها في وادي النيل عن طريق انشاء 14 مدينة مليونية حديثة … يربط ما بينهم 6000 كيلو طرق حديثة متطورة …. بخلاف انشاء العشرات من القلاع الصناعية في مختلف الصناعات الإستراتيجية زي البتروكيماويات و الطاقة و صناعة الدواء و الأسمنت و الحديد و الصلب و توطين صناعة السيارات الكهربائية و غيرها من الصناعات .. بدأنا نسمع حملات التباكى والولولة اللى بــ يتم شنها على الجيش علشان يوقفوا اللى بيحصل ده .. و بإستخدام نفس الديباجات القديمة .. وبإستخدام قبيلة الأنطاع من اليسارجية والإخوانجية والكولجية .. لأن الفساد وقبائل المنتفعين ، واللى كانوا مستفيدين من الوضع السابق .. مش عارفين يهلبوا زى زمان … والمواطن النطع مش عارف يبلطج ويأنتخ زى زمان …
وعلشان قبيلة المزايدين اللى عايشين على قناعات ومفاهيم مغلوطة من اللى بنشوفهم فى حياتنا كل يوم و بــ نتعامل معاهم طول الوقت مايدخلوش يزيطوا معاكم ومعانا ..، لازم نبقى فاهمين إن 90% أو أكثر من المشاريع اللى بيتقال إنها بتاعت الجيش …. الجيش داخل فيها بشكل إشرافى علشان يضبط فيها معدل ومستويات الأداء للقطاع المدنى بنفس أسلوب وإنضباط مستوى أداء الجيش ، وضبط مؤشر التكلفة .. وسرعة الإنجاز اللى بيعمله الجيش .. فى مرحلة حرجة زى دى من تاريخ مصر ، ماعندناش فيها رفاهية الوقت الضايع .. لكن المنفذ الحقيقى هو القطاع المدنى بشخوصه ومؤسساته وشركاته !!
و بإختصار … الحملة المحمومة اللى بتهاجم المؤسسة العسكرية و بتصرف مليارات على الميديا و وسائل التواصل الإجتماعي عشان ترسخ مفهوم أن الجيش استولي على الإقتصاد حفاظا على “الأتّة المحلولة اللى كانوا عايشين فيها” …. نحب نقولهم رسالة صغيرة:-
حضرتك اللى فاشل …. و محدش منع حضرتك إنك تنجح و تنتج و تصدر و تشغل الناس … انت بتقول إزاي أنافس الجيش و هو مانعني اشتغل …. و احنا بنقول لحضرتك انه كل اللى عملة انه استخدم آليات السوق الحر فإنة يمنعك تكسب الـ 200% و الـ 300% مكسب … لكن هو عمل آلية موازية سليمة هامش الربح فيها طبيعي زي بقية خلق الله …. فــ مثلا لما عمل أكشاك اللحمة الكيلو فيها بـ 80 جنية … ماعداش السنة ، إلا وحضرتك نزلت فيها بأسعار اللحمة اللى بتبيعها من 180 جنية و 200 جنيه ، إلى 80 جنية و يمكن اقل في بعض المناطق…. او مثلا لما رجّع منك ملايين الأفدنة اللى كنت سارقها و حاطط ايدك عليها …. بدأت غصب عنك تتدخل كمقاول يبني ملايين الوحدات السكنية في المدن الجديدة و الأحياء البديلة للعشوائيات .. و قبلت بهامش ربح 15% بدلا من الـ 200% و الـ 300% بخلاف تمن الأرض اللى كنت بتاخده ببلاش.
محدش بيمنع حد إنة يفتح مصنع و يشتغل و ينجح … و لا حتي فيه قانون بــ يمنعك تعمل ده في أي مجال تتخيله … طب تعرف إن محطة “بنبان” أكبر محطة للطاقة الشمسية في العالم اللى في أسوان هى أصلا قطاع خاص بشراكة 39 شركة !!! … طب تعرف إن اكبر مصفاة تكرير بترول في الشرق الأوسط في مسطرد و اللى هــ تمد مصر بـ 60% من البنزين و السولار و مشتقات البترول ، هى قطاع خاص !!!! … طب تعرف إن مصانع أدوية كتيييير في مصر قطاع خاص .. وإنت اللى كنت بتصرخ علشان الجيش إستورد لبن الأطفال علشان يحل مشكلة ولادنا !!!! .. وكمان صدقت اللى كانت بتقوله نقابة الطباء والصيادلة بقيادة منى مينا وشركاها من مافيا الفساد ….. !!
ده حتي في صناعة السلاح يا مؤمن ماحدش منعك 😊 …. طب تعرف إن فخر صناعة المدرعة الحربية المصرية الـ ST-100 / ST-500 المصممة لمكافحة الإرهاب و المضادة للألغام الأرضية هي تصميم و تصنيع مصري 100% و هي تابعة لشركة قطاع خاص إسمها IMUT قفلت مصنعها في جنوب أفريقيا و جت فتحت في مصر و النهاردة بالتعاون مع مصنع 200 الحربي بــ تبيع كل إنتاجها الى الجيش المصري و عملت تعاقدات مع السعودية و الإمارات و كينيا … و بتفتح مصنع جديد لإنتاج 20 ألف سيارة مدنية كهربائية سنويا بتصميم مصري 100%…. و فية أمثلة كتييييير و قصص نجاح أكتر.
حضرتك مصر هى أكبر دولة جاذبة للاستثمار في العالم في اخر 4 سنوات .. و دخلها فلوس بعشرات المليارات في كل المجالات …. بس للاسف … فى الوقت اللى فيه الاجانب مقتنعين بالتصنيع و الاستثمار فيها …. بنلاقى إن حضرتك لسه عايش في بوستات “الفيس بؤس” اللى مالهاش اصل من فصل بتاعت إن الجيش بــ يستولى على الإقتصاد …. و من الآخر اللى عايز يشتغل في اي مجال ماحدش بــ يمنعه …. انت بس لسه متمسك بدور السمسار اللى بيهلب و يسرق جيوب الناس باقل مجهود.. أو مستمتع بلعب دور عاطف المتعاطف لحساب اللى بيهلب وبيسرق .. وياريته بيسرق حد تانى .. لكن ده بيسرقك إنت شخصياً .. ولما جالك اللى يخلصك من ده … ماعجبكش
طب ياريييييييت الجيش يتداخل فى السوق ويسيطر على ألياته .. أو حتى يكون له نصيب سوقى اكثر من كدة … على الأقل الجيش مش بيتاجر بدماء واقوات الغلابة زى شلة المنتفعين ، وشماشرجية الزمارين والطبالين بتوعهم اللى عايزين الوضع يبقى على ماهو عليه .. علشان يفضل عندهم طول الوقت نفس الحجة اللى بيهاجموا الدولة من خلالها … طقطوقة الغلابة والمتاجرة بدماء وألام المساكين والفقراء !!
و عشان نجيب من الآخر … كل الجيوش الكبري في العالم سواء فى امريكا او روسيا او الصين او انجلترا او حتي تركيا … جيوشها عشان تصرف على تسليحها .. بتعمل ده من خلال مشاريعها المدنية والإنمائية .. و عمرها ما بتستني الفائض من الموازنة اللى بيطلع من ناتج شغل المدنيين …. عشان كده لازم الجيش بتاعنا يوسع حصته من مشاركته في القطاعات المدنية …. و هو قادر و بيشتغل على كده لانه أصبح جيش إقليمي و لازم يكون عنده تمويل لصناعة السلاح و الصرف على توطين تكنولوجيا السلاح المتقدم …. لكن المشكلة في القطاع المدني اللى لسة مش مستوعب التغيير اللى حاصل و لسة عايش في أيام المكسب السريع و السمسره من جيوب الناس.
فية تغيير كبير جدا بيحصل دلوقتي في خريطة رجال الأعمال و نوعياتهم و اللى بدأ الجيل الجديد اللى بــ يتكون دلوقتي و اللى فهم أصول المنافسة في الإنتاج و التصنيع ، أنه يزيح من الجيل القديم من مكانه ، و اللى لسه متمسك و بيحارب على البقاء بنفس الأليات والأساليب اللى أفقرت الدولة و شعبها و ملئت جيوبهم.
الناجح هو من يتكلم و الفشلة يمتنعون …
تحياتنا للجميع .. وحفظ الله مصر