مادام امريكا بدأت تلوَش يبقي مصر بتنتصر

 4 Aug 2014

  مادام امريكا بدأت تلوَش …. يبقي مصر بتنتصر

———————————————–

  زي ما اتعودنا اننا بــ ننظر الى الأمور بشكل متكامل … و دايماً بنحاول نربط الأمور مع بعض …. و لان فيه حاجات كتير جداً بـتحصل بتأكد مقالات لينا سابقة و بتاكد صحة رؤيتنا للامور ، و اننا شايفين الاحداث بشكل سليم…..

 فــ اللفظ المستخدم في عنوان المقال (بتلوَش) هو أفضل تعبير و تقييم لسياسة الخارجية الامريكيه حالياً ….. و بالذات بعد تصريحات ماري هارفي نائبه المتحدث باسم الخارجية الأمريكية بأن المعونات العسكرية الامريكية قد قامت مصر باستخدامها ضد المتظاهرين السلميين العزل بعكس اسرائيل التي تستخدمها بشكل شرعي لمحاربة الارهاب في غزة.

 و رد الخارجية المصرية الرسمي القوي الذي لا يوصف غير بــ أنه وصلة ردح دبلوماسي لخارجية الدولة العظمي في العالم و لا يصدر عنها اي رد فعل على قلة القيمة اللى نالتها من رد الخارجية المصرية ، اللى وصفتها إنها تصريحات ممجوجة تنم عن قصور وجهل كامل لحقائق الأمور في مصر، وتفتقر إلي أبسط قواعد المصداقية والموضوعية و تحدث بتهكم و سخرية  ليتحداها ان تثبت واقعة واحدة تم فيها استخدام طائرات ال F16  و الأباتشي ضد المتظاهرين العزل في الشوارع 🙂 🙂  …..

  كان بيان من صفحتين بس فعلا زى ما بنقول بالبلدى كدة “غسيل و مكواه” ..  و الامريكان أخدوا البيان المصري و الإحتجاج الرسمي و أصابتهم حالة من الخرس السياسى ،  ومابقوش قادرين يردوا ……  🙂 🙂

 و لما كمان نربط  ده  بتقارير صحفية امريكية مكثفه تدَعي أن مصر على وشك الافلاس و ان اقتصادها سيتهاوي في غضون شهرين تلاتة بالكتير ….  و في نفس الوقت الاتحاد الاوروبي يغير سياسته لمصر تماما بشكل إيجابي إقتصاديا و يؤكد تفاؤله بقوة اقتصاد مصر …. يبقي لازم نعرف إييه سبب  قلة القيمة اللى بتعملها امريكا لنفسها ، و إييه كمية التخبط اللى هي فيه ، و ليه تحس انها عاجزة ……

 شوف يا سيدي ….. لما قامت حرب غزة …… و اللى فندنا أسبابها بالتفصيل في مقال سابق لما تلاقت مصالح إسرائيل و حماس فيها لترسيخ الانقسام و إحياء تعاطف الناس مع الاخوان و استكمال مخطط الاخوان لتهجير غزة الي سيناء و فرضه ديموغرافيا على الارض كأمر واقع  استدراج الجيش المصري في موجهات عسكريه مباشره  ….

 قامت مصر بنسف المخطط ده بالكامل و قدمت مبادرتها التي تتلخص في الاتي :-

 وقف اطلاق النار ثم ادخال المساعدات الطبية و الانسانية ثم بدء مفاوضات مباشرة لحل القضية الفلسطينية من اساسها على اساس دولتين …..  دولة فلسطينية عاصمتها القدس الشرقية بحدود 1967  و اسرائيل …. يعني نخلص من الموضوع من اصله …. و ده معناه إن أكتر إتنين خسرانين من المبادره دي هم إسرائيل و حماس …. واحدة هــ تخسر الارض و التانية هــ تخسر السبوبه و الكرسي.

 الدولة المصرية رمت بثقلها في المبادرة و تحدت أمريكا أن تحاول أن تفرض أي وضع على حدودنا الشرقيه ضد الامن القومي المصري او العربي …… تحركت مصر ضد الدبلوماسية الامريكية و نجحت في تفتيت كل التحالفات الدولية و التبعية السياسية مع أمريكا و حصلنا على تاييد الجامعه العربيه و الامم المتحده و الصين و روسيا و كانت المعركة الكبري مع الاتحاد الاوروبي  و الدول الاوروبية …..

 امريكا حاولت تشق الصف على مصر و فرض حلولها و اجندتها باستخدام قطر و تركيا و قامت بالاعلان عن مؤتمر دولي في باريس يضم اسرائيل و امريكا و فرنسا و … و كاثرين اشتون ممثلة عن الاتحاد الاوروبي من جهة …. و قطر و تركيا كممثلين عن فلسطين من جهة أخري …..

قوم بقي إييه يا مؤمن ….. و شوف حكمة ربنا 🙂 🙂 …..

 حد سمع عن المؤتمر ده … لأ ….. طب حد عرف إييه اللى دار فيه …. لأ …. طب حد سمع صوت امريكا بيقول اي حاجه …. لأ

 مفيش غير المبادرة المصرية و الحل المصري  🙂 🙂 🙂

 أمريكا بجلالة قدرها زمان كانت لما بتقول للعالم يمين كان كل العالم بيمشي وراها و لما كانت بتقول شمال كانت دول العالم كلها بتمشي وراها ……

 و الاكتر بقي و الضربة القاضية و قمة الكوميديا كانت من يومين ….. في المؤتمر الصحفي للرئيس السيسي و رئيس الوزراء الايطالي ماتيو رینزى ….. ياريت تتفرجوا عليه لانه هاااااام جدا و فيه رسائل واضحة و خارطة طريق تفهموا منه إحنا رايحين على فين و السياسة الاوروبية معانا حتكون شكلها إييه …..

 الخلاصة …. و من غير ضحك لو سمحتم …. 🙂 🙂  …. في رد رئيس الوزراء الايطالي على سؤال حول رأي ايطاليا كرئيس حالي للاتحاد الاوروبي ( واخدلي بالك من رئيس الاتحاد الاوروبي الحالي دي 🙂 🙂 )  عن مؤتمر باريس و اييه اللى توصل اليه الاتحاد الاوروبي مع امريكا بخصوص غزة جاوب بالنص الاتي :-

 سأجاوب بإقتضاب …. الاتحاد الاوروبي الان يعيد تنظيم البيت من الداخل …. و البارونة كاثرين أشتون دورها إنتهي ، و سيتم إنتخاب شخصية جديدة لاننا نريد دور أوروبي أقوي و أكثر فاعلية في الفترة القادمة ….. و سأكون أكثر تحديداً …. لا يوجد غير المبادرة المصرية كحل أوحد و وحيد لحل مشكلة الحرب على غزة و القضية الفلسطينية …. و أكرر مرة أخري …. لا حل بدون المبادره المصرية  و الدور المصري …..

 فبعد المؤتمر الصحفي ده طلع بيان الخارجية الامريكية الساذج اللى ذكرناه في أول المقال كرد فعل طفولى غاضب من تاثير الصفعة السياسية اللى اخدتها امريكا من مصر ومن تحركاتها الدوليه الناجحة 🙂 🙂 🙂

 باي باي امريكا

باي باي اشتون

باي باي قطر و تركيا

باي باي التنظيم الدولي للاخوان

 و مرحبا بالدولة المصريه القويه القادرة كقوه اقليميه و عالميه …

أما باقي رسائل المؤتمر الصحفي فــ ده موضوع كبير و حيكون في مقال تاني….

 و اما الصورة الاعم و الاكمل في معركة البقاء مع امريكا ، و سبب حالة الخرس السياسى التى أصابتهم ، فــ ده موضوع مقال تاني .. لأن التحركات الدولية اللى بتحصل لــ تفكيك القوة الامريكية إقليمياً ، و اللى بيحصل مع أوباما عالمياً و دولياً ،، مزيكاااااا ….. مزيكا

لمتابعة تعليقاتكم