07 Dec 2019
الوزير سامح شكرى .. والإجابة فى الصميم !!
(منتدى حوار المتوسط بروما)
—————————
أثناء فعاليات منتدى حوار المتوسط المنعقد فى روما … وأثناء مشاركة الوزير سامح شكرى اليوم .. تم توجيه سؤال مباشر لسيادة الوزير عن العقوبات الأميريكية اللى هــ يتم فرضها على مصر نتيجة قيام مصر بالتعاقد مع روسيا على صفقة طائرات السوخوى 35 .. وإييه هــ يكون رد فعل مصر مصر على العقوبات دى .. وهــ تعملوا إييه فى الموضوع ده !!؟ 🙂
والحقيقة إن رد أسد الخارجية المصرية ، كان درس لكل المهيصاتية ، وهواة التسخين ، و اللى بيتابعوا ماينشر فى الصحف والمواقع العالمية ، و ما يتم بثه على مواقع السوشيال ميديا إمعانا فى ترسيخ حالة القلق والتوتر وزيادة حالة البلبلة عند الناس … و ده اللى دايما بــ نحذر منه … و اللى بــ نقوله فى كل مناسبة .. إننا لازم دايما نتحرى الدقة فى مصادر المعلومات .. و فى نفس الوقت .. مانجريش وراء كل قنبلة إختبار بــ يتم تفجيرها بين الحين والأخر ..
وزير الخارجية المصرية رد على اللى سأله السؤال بإبتسامة ماكرة .. وقال:
المشكلة إنكم دايما بتتكلموا عن أخبار وردت فى الصحافة والدوائر الإعلامية .. وأعتقد إنه من الأفضل أنكم تتحروا الدقة ، ويتم معالجة المواضيع على أساس الوضع الفعلى .. و علشان كدة أنا مش هــ أعلق الكلام ده .. لكن كل اللى هــ أقوله … إن مصر تمتلك علاقات مميزة ومتنوعة مع الولايات المتحدة زى ما لنا علاقات برضوا مع شركاء أخرين فى أوروبا وروسيا والصين … و نحن نمارس العلاقات بشكل شفاف مع الجميع ، و ندرك العلاقة الإستراتيجية مع الولايات المتحدة .. لكن فى نفس الوقت إحنا عندنا علاقات مميزة مع شركاء أخرين وبنستفيد مع بعض بشكل مزدوج … وبخصوص النقطة اللى ذكرتها فالعلاقة بشكل عام تدخل فى إطار علاقات ثنائية .. ونتمنى ان تبقى داخل هذا السياق
الترجمة البلدى لرد الوزير سامح شكرى:
ياريت تسيبكم من اللى بيتنشر فى الصحف والدوائر الإعلامية اللى بتجيبوا منها معلوماتكم … و تنشروا من خلال مصادر رسمية .. و أنا مش هــ أقول غير إننا علاقتنا بأميريكا علاقات قوية وإستراتيجية .. لكن كمان عندنا علاقات قوية وإستراتيجية مع أوروبا وروسيا والصين …. وإحنا بنقف دايما على مسافة متساوية من كل الأطراف الدولية … و فى نفس الوقت مصر من حقها إنها تقوم بتنويع مصادر سلاحها فيما يتماشى مع توجهاتها .. و بما يخدم أمنها القومى !! …. و علاقات مصر الدولية مع أى طرف من الأطراف هى فى إطار علاقات ثنائية متبادلة من منطلق الند للند .. و مش ممكن تكون غير كدة …. نقطة و من أول السطر ..
بوووووووووووووم 😁😁
طبعا كان فيه بوووووم فيما يخص موضوع إتفاق تركيا مع السراج .. وقال إختصاراً كدة إن الإتفاق ده بــ يزيد الأمر تعقيدا فى منطقة شرق المتوسط .. و برغم إنه لا يؤثر على مصالح مصر لكنه يؤثر على مصالح شركاء أخرين .. وإحنا متضامنين معاهم 🙂
و طبعا علشان الشيئ لزوم الشيئ .. كان فيه حيزبونة كدة إتكلمت عن القمع والعنف وتقييد حرية الصحافة … و كان رد الوزير … ياريت بلاش إستخدام المصطلحات النارية دى .. وألفاظ زى القمع والتقيد .. ياريت توضحيلى مدلول الكلامات اللى إستخدمتيها دى ، واللى أعتقد إنها لا تنطبق على الوضع فى مصر أو حتى تقترب منه .. إحنا عندنا ممارسات قانونية تختص بــ إنفاذ القانون ولا تسمى قمعاً .. وممثلى الصحف والوكالات العالمية موجودين فى مصر وبيطلبوا توضيحات من النائب العام إزاء أى إجراءات
و أدى كمان بوووووووووووووم 😁😁
الخلاصة …
مــصـــر مابتخافش … ولا بتقلق من حد ..
مــصـــر بــ تتعامل مع كل القوى الدولية من منطلق الند للند
مــصـــر مافيش حد فى العالم يقدر يفرض عليها توجه معين
مــصـــر مابتخافش من الحديث المنمق والشعارات الرنانة والكلمات الصاخبة … و بالنتعامل مع ملف الحريات من خلال القانون ، وماحدش له الحق فى التدخل
..
تحياتنا للجميع …. وحفظ الله مصر