04 Jan 2020
2020 .. وضربة البداية .. !!
——————————
فى البداية .. عايزين نشكر جميع أصدقائنا على حجم التفاعل اللى حصل على مقالنا إمبارح فيما يخص فك لوغاريتم الأزمة اليبية .. سواء بالتواصل على الخاص ، أو بالتعليق أو بالمشاركة فى نشر المقال … و زى ما ده كان فرصة لينا إننا نلتقى بأصدقاء كتير كانوا غايبين عننا .. وسعدنا بلقائهم … كانت فرصة برضوا لبعض حريم الأحمق العثمانلى ، إنهم يعلنوا عن نفسهم و عن توجهاتهم … والغريب إن معظمهم .. كالعادة … لا يملكون إلا الشتائم والبذاءات للتعبير عن رأيهم … و الحقيقة إن هو ده تمامهم … لكن معلش .. إحنا عاذرينهم … و على رأى المثل العربى القديم ((ما رُبطَ جَروٌ ، إلّا عَوَى)) 🙂
ندخل بقى فى مقال النهاردة على طول .. و خلونا نقول إن بشاير سنة 2020 بتقول إنها هتبقى سنة حاسمة ، و هــ يحصل فيها إنقلابات وتطورات جذرية فى محاور دولية على طريق تغيرات ما يسمى بالنظام العالمى الجديد ..
و أدينا شايفين البشاير أهى … تهديد بحرب عسكرية فى المنطقة ، بمشاركة أطراف متعددة .. وإغتيال قائد الحرس الثورى الإيرانى ، والمضي فى إجراءات عزل رئيس الولايات المتحدة الأميريكية .. وتصاعد التوترات فى العراق بشكل عنيف .. و عودة توتر العلاقات بين أميريكا وكوريا الشمالية ، وتلويح كوريا بإستخدام صواريخ باليستية لتهديد أميريكا … وبدأ توجيه سلاح حروب الجيل الرابع فى مواجهة الصين كمحاولة لوقف التنامى الإقتصادى للتنين الصينى .. والجزء الأخير ده بالذات هــ يبقى لنا معاه مقال منفصل فى وقت لاحق …. ألخ ألخ ألخ من التطورات المتسارعة اللى بنشوفها حوالينا فى العالم كله
وإحنا هــ نحاول النهاردة بإذن الله إننا نحل بعض الشفرات فى تلخيص مجمل .. وغير مخل ..
أولا … المشير خليفة حفتر القائد العام للقوات المسلحة الليبية ، ظهر إمبارح فى بيان متلفز ، موجهاً حديثه للشعب الليبى بإعلان النفير العام .. والجهاد ضد أى غزو تركى محتمل للأراضى الليبية .. وقال في كلمته: “اليوم نعلن المواجهة وقبول التحدي ورص الصفوف ونبذ خلافاتنا فيما بيننا ونعلن الجهاد والنفير والتعبئة الشاملة ونحمل السلاح رجالا ونساء عسكريون ومدنيون ونستعد بكل ما أتينا من قوة لندافع عن أرضنا وعرضنا وشرفنا”…. واصفا الرئيس التركى بالمعتوه الطامع في خيرات الدولة الليبية ، و الحالم بالوصاية أرض ليبيا العصية …. و فى المقابل أعلنت كل القبائل والعشائر الليبية تضامنها مع الجيش الوطنى الليبى فى مواجهة أى غزو خارجى .. وكمان ضد مليشيات وخونة الداخل !
الكلام ده يؤكد اللى إحنا قولناه إمبارح فى مقالنا … إن قيام الأحمق العثمانى بإرسال قوات إلى ليبيا .. هو تصرف غاية فى الحماقة والرعونة ، و إحتمال كبير يكون فيه نهاية اردوغان … ده إذا قدر فعلا ينجح فى نقل جنود نظامية ومرتزقة ومعدات عسكرية بشكل مباشر للسواحل الليبية ! … و أى حد بــ يقول إنه عملها قبل كدة وإجتاح سوريا .. فلازم يبقى فاهم إن القياس هنا مع الفارق …. لأن إجتياح حدود مشتركة مع دولة مجاورة ممزقة داخلياً زى سوريا، وجيشها لا يملك قراره لأنه تحت وصاية أطراف دولية خارجية ، ده كله حمادة ….. ونقل قوات فيما وراء أعالى البحار مروراً بمياه إقليمية ومجال جوى لدول مجاورة .. لمهاجمة دولة أخرى ، أعلن جيشها وشعبها النفير العام لمواجهة الغزو المحتمل ، حمادة تانى خالص !!
و مش كدة وبس .. لكن كمان البرلمان اليبى المنتخب صوت بالإجماع واصدر بيانات رسمية تناقلتها وكلات الأنباء والمواقع الإخبارية على إحالة رئيس المجلس الرئاسى فايز السراج المنتهية ولايته طبقا لإتفا الصخيرات ومعه وزير الخارجية ووزير الداخلية إلى القضاء بتهمة الخيانة العظمى
مجلس النواب الليبى صوّت أيضا على إحالة كل الموقعين على الإتفاقيتين الأمنية والبحرية مع الجانب التركى للقضاء بتهمة الخيانة العظمى ، ومطالبة مجلس الأمن بسحب الإعتراف بحكومة السراج و تفويض القيادة العامة للقوات المسلحة بتعطيل المطارات والموانئ والمنافذ البرية الواقعة تحت سيطرة المليشيات ..
يعنى كله أهو بالسياسة والديموقراطية … وقابل بقى يا عم الرئيس الــ ….. مش عارفين والله نوصفه بإييه .. بالأحمق زى ما وصفه ترامب ، والإ بالمعتوه زى ما وصفه حفتر 😁
ثانيا بقى فيما يخص إغتيال قائد فيلق القدس بالحرس الثوري الإيراني الجنرال قاسم سليماني، في ضربة أميركية بالقرب من مطار بغداد الدولي .. واللى تصاعدت على إثره اللهجة التصادمية بين إيران والولايات المتحدة الأميريكية … والتلويح برد فعل عنيف .. وقلق الكثيرين من رد الفعل ده ، وشكله هـ يكون إييه ..
خلينا بس نقول لكم .. ياريت واحدة واحدة كدة .. وماتقلقوش أوى .. وماتركبوش المرجيحة … لأننا المفروض إن كلنا عارفين إن إيران ، ونظام الملالى هو الكارت اللى بتلعب بيه أميريكا وقت اللزم ، وحسب الإحتياج .. علشان تكسب بنط داخلى أو خارجى .. و فى حالتنا دى .. إختيار التوقيت ده بالذات .. للقيام بعمل زى ده .. يصب فى صالح إجهاض إجراءات عزل الرئيس الأميريكى ترامب .. واللى هــ تتصاعد أسهمه بشكل كبير ، بعد اللى حصل ده .. و مش بعيد إنه كمان يؤثر بشكل إيجابى كبير ، على أسهمه فى الإنتخابات الرئاسية الأميريكية المقبلة فى نوفمبر القادم !
و سواء كدة أو كدة .. فــ إحنا كنا شرحنا لحضراتكم قبل كدة .. إن ما يحدث سواء فى لبنان أو فى سوريا أو فى العراق ، هو فى الأساس ضد سيطرة نظام الملالى بأذرعهم الدينية ومليشياتهم والحرس الثورى بتاعهم ، على الوضع الداخلى فى الدول دى .. و ده اللى حاولنا نوضحه فى مقال سابق ممكن تراجعوه فى اللينك ده:
مقال بعنوان “لبنان والعراق والشيطان .. تفرق شعرة“
أما فيما يخص رد الفعل الإيرانى اللى ناس كتير جدا قلقانين منه … فالحقيقة إنه مش هــ يكون فيه رد فعل .. و لو حصل .. فالرد هــ يكون محدود جداً ، و فى شكل شو إعلامى ليس أكثر .. و ده الدور اللى بتقوم بيه قناة الجزيرة دلوقتى تحضيراً ، وإنتظارا لرد الفعل .. أياً كان رد الفعل ده علشان تبروزه وتكبره .. أو تحافظ إعلاميا على حالة القلق والتحفز عند العالم كله إنتظارا لرد الفعل .. اللى ممكن مايحصلش 😉🙃
للأسف .. إن دولة العراق .. بلد الحضارة والعراقة أصبحت ساحة لصراعات سياسية وعرقية وعسكرية ، بين دول ومليشيات وجماعات وأطراف دولية … والخاسر الوحيد فى كل اللى بيحصل ده هو الشعب العراقى ..
و مازالت 2020 مع ضربة البداية … والأيام القادمة هــ تكون حبلى بالأحداث … لكن برغم كل اللى بيحصل ده .. والأرض المشتعلة حوالينا .. إلا إن مصر بتعبر من خلال كل الشرور دى .. و هى راسخة الأفعال .. و ثابتة الأقدام …
و يا جبل ما يهزك ريح 🙂🙂
تحياتنا للجميع .. و حفظ الله مصر