رسائل مهمة … و جنرالات المقاهى يمتنعون !!

13 Jan 2020

رسائل مهمة … و جنرالات المقاهى يمتنعون !!
———————————————–

ذكرنا لحضراتكم فى مقال سابق إن الفترة القادمة هــ تكون حبلى بالأحداث … لكن الحقيقة إنها مش هــ تبقى حبلى بالأحداث بس .. لكن كمان هيبقى فيه حالة فوران ، و مجال مفتوح لجنرالات المقاهى وخبراء الفيسبوك علشان يرغوا كتير .. ، و يلتّوا ويعجنوا .. ويتحفونا بأرائهم اللوذعية المبنية على مزايدات فارغة وخلاص … و إحنا هنا طبعا مش بنقصد الناس الوطنية اللى بتبحث عن المعلومة ، و بــ تحاول تناقش علشان تفهم .. لكن اللى بنقصدهم ، كلنا عارفينهم .. و بــ نقابلهم كل يوم فى حياتنا العادية .. واللى بــ ينشروا الإحباطات ويرسموا صورة مزيفة للحقيقة بدعوى الفهم .. علشان يقولولك فى الأخر .. شوفت .. إحنا كان معانا حق !

و علشان نختصر الموضوع .. إحنا النهاردة هــ نبعث شوية رسائل فيما يخص الأحداث اللى بتحصل … علشان بس نحاول نرسم الصورة بأكبر قدر من الوضوح .. ونحط النقط على الحروف …
.
الرسالة الأولى:
========
دلوقتى .. و خلال الفترة القادمة .. هتكون فترة خصبة جداً لنشر الشائعات والأنباء المغلوطة … والتشكيك .. والقيل والقال … لأن هو ده اللى بيعمل حالة إرتباك وسيولة مجتمعية .. وخصوصاً إن فيه ناس كتيرة بتقلق بسرعة .. ولسة ما إتعلموش من الدروس اللى شوفناها فى الكام سنة اللى فاتوا … و علشان كدة .. ياريت ما نلتفتش لأى أخبار طايرة بــ تتنشر على على مواقع السوشيال ميديا … و نلتزم فقط بالمعلومات والبيانات الصادرة من مصادر رسمية … وياريت برضوا ، أى اخبار من مصادر مجهلة ، مكتوب فيها .. من مصدر موثوق ، وإلا اجمع الخبراء ، وإلا ذكر مصدر أمنى مطلع ، وإلا من داخل المطبخ السياسى … ألخ ألخ ألخ .. نعتبر كل الكلام ده بلح بالجنزبيل ، وما نلتفتش له خالص.

الرسالة الثانية:
========
إنت زعلان علشان وقف إطلاق النار فى ليبيا مش كدة !!؟؟ … وإحنا كمان زعلانين .. وكان نفسنا الجيش الليبى يستمر ، ويخلص الموضوع .. وكان نفسنا الحاصل على ألقاب الأحمق والمعتوه والجربان يتهور علشان يعرف حجمه إييه بالضبط … بس إنت نسيت حاجة مهمة جداً:

أولا .. إنك كنت من كام يوم قلقان من حالة التصعيد ، ومش عايز صدام عسكرى خوفاً على مكتسبات الدولة المصرية ، وكنت بــ تتساءل ياترى هيحصل حرب وإلا لأ .. ولو حصلت حرب ، إييه هــ يكون مصير المنطقة …. وإحنا طمنّاك وقولنالك مش هــ يحصل حرب .. لأن إشتعال الموقف مش فى مصلحة مصر حاليا … ومصر مش هــ تسمح أبداً بكدة … والقيادة المصرية بــ تتحرك سياسياً بمنتهى المهارة ، وعارفة كويس هى بتعمل إييه !

ثانيا وهو الأهم .. إن القيادة المصرية رحّبت تماما بالإعلان عن وقف إطلاق النار .. وقالت إن دى خطوة جيدة لمحاولة إيجاد حل سياسى .. و لو وضعنا فى إعتبارنا ، إنه فيه تنسيق كامل بين المشير خليفة حفتر ومصر .. وبين روسيا ومصر .. وإتفاق جميع الأطراف سواء فرنسا أو ألمانيا أو روسيا أو قبرص أو اليونان .. أو حتى إيطاليا مؤخرا وإنجلترا . إنه لازم يتم تهدئة الأوضاع فى شرق المتوسط .. نقدر نفهم إن وقف إطلاق النار ـ تطور إيجابى .. وليس سلبى …

ثالثا … التاريخ بــ يقول إن الصراعات لا تحسم بالحروب ، ولكن الحرب هى اللى بتحرك المياه الراكدة ، ولازم بعدها تبدأ المفاوضات … وإفتكر حرب 73 .. كمجرد مثال … لكن المهم إنك لما تدخل مفاوضات .. إنك تكون لك اليد العليا .. ويكون عدوك هو اللى بــ يصوّت .. و هو ده الحاصل فى الملف الليبى … إنت منتصر .. ومسيطر .. وماسك مليشيات الإرهاب من …. من رقبتهم 🙂 … و هم و داعميهم بــ يستنجدوا بكل حلفائهم لوقف إطلاق النار … يعنى من الأخر .. و على حسب الكروت اللى هــ تتحط على الترابيزة من كل الأطراف … فــ مفاتيح القوة فى إيدين الجيش الليبى ..

و حتى لو كانت حقيقة الصورة عكس اللى إحنا شايفينه .. و فيه ضغوط أقوى من إمكانيات الجيش الليبى .. و ده أمر مستبعد … فــ برضوا الإستجابة لوقف إطلاق النار كان هو الحل الأسلم … و خصوصا إننا كمواطنين عاديين ، مانعرفش إييه اللى بيدور خلف الكواليس

الرسالة الثالثة:
=========
الكلام الكثير واللهرى اللى مالوش معنى عن فشل المباحثات حول سد النهضة … وإن ساعة الحرب دقت .. و يلا بينا نهجم هجمة ونرجع .. و خلاص هــ نعطش .. وبكرة هــ نفتح الحنفيات مش هــ نلاقى مية … والكلام المنتشر على الفيسبوك نقلا عن الأثيوبيين ، إن مصر تخبط دماغها فى الحيط ….. كل الكلام اللذيذ ده .. ولا لينا دعوة بيه !

إنت عندك قيادة واعية محترمة .. فاهمة كويس بتعمل إييه .. وفاهمة إمتى تشد وإمتى ترخى … و زى ما مشكلة تهديد أمن مصر القومى بــ غزو ليبيا إتحلت من غير ما نضرب رصاصة واحدة … كمان مشكلة سد النهضة هــ تتحل من غير مانضرب رصاصة واحدة … فــ ياريت بقى نهدى شوية كدة ، ونطمئن .. وسيبكم من الحملات الأليكترونية اللى على السوشيال ميديا سواء كانت عمليات شحن وتهييج .. أو حتى سخرية وإستهزاء … لأن كل ده إنت المستهدف منه مش أكثر

و نحب نفكركم .. إن إخراج أزمة سد النهضة عن سياقها ، و الضحك على المصريين ، بإن السبب فى اللى حصل ده كله ، هو الإتفاقية الإطارية اللى وقعها الرئيس السيسى .. وإن رئيس وزراء أثيوبيا السابق ، ضحك على مصر ، ولبّس الرئيس المصرى العمة .. كل ده كنت إنت المستهدف بيه ….. والمفاجأة بقى إن النهاردة أثيوبيا متكتفة .. ومش عارفة تفلفص .. وبتقولك إن مصر متعنتة فى المفاوضات علشان مصر متمسكة بشدة بالإتفاقيات الدولية وأهمها الإتفاقية الإطارية الأخيرة ….. ياااسلاااااام …. فين بقى إسمهم إييه اللى كانوا بيقولوا إن الإتفاقية الإطارية هى اللى ضيعت مصر … وفين بقى إسمهم إييه التانيين ، اللى صدقوا كلامهم .. وإتهزوا و تواروا خجلا فى مواجة شوية المغرضين !؟

مصر بتتحرك بمنتهى الإحترافية .. وسط بحور مشتعلة مليئة بالألغام والتحديات .. لكننا منتصرين لحد دلوقتى .. وسابقين أعداء مصر بكثير … فــ كل المطلوب منكم إنكم تثقوا فى نفسكم وتثقوا فى بلدكم

الرسالة الرابعة:
=========
موضوع الغاز بقى .. وإتفاقية MedEast اللى تم توقيعها بين إسرائيل واليونان وقبرص … والدنيا مقلوبة عليها . وحملات التشكيك … ومصر إنضحك عليها … وخلاص مابقيناش هب الغاز فى المنطقة .. وروسيا قرطستنا وراحت وقعت إتفاقية غاز مع تركيا … والحقيقة إن الكلام ده كلام مضحك .. ومش هــ نعيد كلامنا تانى اللى ذكرناه فى مقال سابق فى إجابة السؤالين 11 و 12 فى اللينك التالى:

الحرب الليبية – و رسالة للكائن الإخواني “عزرا بن عميتاى”

و عموماً … الإتفاقية دى بدأت خطواتها فى 2013 .. يعنى قبل ما مصر تكتشف حقل ظهر .. ووقعوا اليومين اللى فاتوا إتفاق مبادئ لتفعيل الإتفاقية … طب ياترى بقى اخونا الخبير .. شايف إن قبرص واليونان وإسرائيل ، لما وقعوا معانا إتفاقيات للغاز ، مداها الزمنى 10 سنين لإسالة الغاز وتصديره لأوروبا … كانوا بيرموا فلوسهم فى الهوا .. وما كانوش عارفين إنهم عندهم إتفاقية مشتركة عن مد خط غاز !!؟؟؟ … طب هو سيادة الخبير مايعرفش إن مصر هى الدولة الوحيدة اللى عندها محطات إسالة !؟ .. طب هو سيادة الخبير مش هــ يقولنا حجم الغاز اللى هــ يتم نقله عبر الخط ده قد إييه !؟ .. والعائد منه قد إييه ؟؟ ، و مدى إنشائه هيبقى كام سنة !؟ .. والجدوى من إنشائه بعد خصم التكلفة الخزعبلية للبنية التحتية الخاصة بيه !؟؟

طب هو سيادة الخبير مايعرفش إنه على المستوى السياسى ، إنشاء خط زى ده فى مصلحة مصر تماما .. لأنه هــ يكون حاجز فى مواجهة أى بلطجة على مقدرات الغاز فى شرق المتوسط بدون ما تكون مصر فى موضع المواجهة المباشرة !؟؟ …

الحقيقة إن موضوع الإتفاقية ده بــ يفكرنا بموضوع لما مصر وقعت إتفاقية تسييل الغاز الإسرائيلى وتصديره لأوروبا .. وطلع نفس الخبير الجهبذ يقولك .. شوفتوا بقى إن موضوع الغاز وحقل ظهر ده طلع فنكوش .. وأدينا رايحين نستورد غاز من إسرائيل !! … لأ بجد .. خبير خبير يعنى !!!

الرسالة الخامسة:
==========
الدوشة بقى والكلام الكثير عن الثورة القادمة ، و25 يناير القادم .. والجحافل اللى نازلة الميادين .. ويالا علّى و علّى و علّى و علّى .. وبكرة الثورة تشيل ما تخلّى … ياريت بس نسيبنا من كل الكلام الخزعبلى ده … وكلنا هــ نحتفل مع بعض بعيد الشرطة … و كل الكلام اللى حاصل ده .. مجرد حشد أليكترونى مش أكثر … وياريته حشد والله … ده مافيش أى حاجة .. وماحدش حاسس بأى حشد … معلش .. أصل الحشد والثورة القادمة دى لا يراها إلا المغيبون .. 🙂 … طب بذمتك .. فيه ثورة تنجح ، وقائدها شخص زى اللى إسمه محمد على ده !؟ … خلاص بقى .. الشعب فهم الفولة … وعموما .. علشان برضوا نقطع الشك باليقين .. ممكن كل واحد فينا بعد ما نقرأ المقال .. نبقى نقفل الفيسبوك ونفتحه تانى ، يمكن نشوف الحشد والثورة اللى بيقولوا عليهم دوول

و فى النهاية … خلاصة الرسائل ,, ماتقلقوش .. وماتخلّوش حد يلعب بوعيكم .. أو يلعب على وتر خوفكم على بلدكم …

إحنا أقدامنا ثابتة أوى … وبلدنا ماشية بثبات … وبتفرض رؤيتها فى كل الملفات .. بس أهم حاجة إن الظهير الشعبى للدولا يبقى ثابت ومايتهزش … فــ نحن على الحق المبين 🙂💪

تحياتنا للجميع .. و حفظ الله مصر

لمتابعة تعليقاتكم