18 Jan 2020
العدو الأزلى … وأدواته التى يديرها من خلف الستار .. !!
(قاعدة برنيس – صدفة أم تخطيط) ..
————————————-
واحدة واحدة كدة الله يرضى عليكم .. و ياريت معانا كدة بالراحة … و مزمزوا فى كوباية الشاى بتاعتنا .. علشان نفهم القصة من البداية …
لما مصر اشترت و استلمت حاملة المروحيات الأولى ميسترال .. و أسمتها جمال عبد الناصر … قام الإعلام الاخوانى وتابعهم “قفة” فى الداخل المصرى بشن حملة ضارية على مصر والجيش المصرى … وبدأ عزف سيمفونية البكائيات عن الغلابة وانهم أولى بالفلوس .. و كان لازم نشترى ساندوتشات حلاوة بالقشطة للغلابة.. بدل بعزقة الفلوس على السلاح !!
و لما مصر بدأت تستكمل ترسانتها البحرية بالكورفيتات الشبحية من طراز جوويند .. والفرقاطة فريم .. زاد الشحن الاعلامى والشحتفة الإخوانية.. وطلعوا يقولوا مش مصر بتجارب الإرهاب… طب مال الفرقاطات وحاملات الطائرات بالإرهاب .. هى مصر هتحارب الارهابيين بحاملة مروحيات …. (بالمناسبة .. ده الارهاب إللى هم اصلا بيقولوا انه مش موجود وانه فزاعة ) 😏
ولما مصر تعاقدت على صفقة طائرات الرافال … زاد العواء بشكل كبير … وسمعنا إللى بيعوى ويقول .. ياعينى يا مصريين …. جيش الانقلاب بيشترى الرافال علشان يقمع المصريين ويخرس أصوات المعارضة … و طبعا العيال المتثورجة على روحها من مدمنى الاستمناء الثورى .. قالو ايوة صحة هو ده الهدف فعلا … !!!
يابنى يا حبيبى …. انت بجد مصدق ان فيه دولة هتقمع ثورة والا مظاهرات بطائرات سيطرة جوية … انت حمان يا حمان 😅 … و آخرة المتمة .. سمعنا إللى بيقول .. يا عم دى. الرافال دى طائرات واقعة و مش لاقية إللى يشتريها لأنها بتسخن … أااه والله قالوا كدة … بتسخن … ده على اساس انها عربية نصر 128 مثلا والابلاتين بيلدع .. لكن بجد المشكلة مش فيهم … لكن المشكلة انهم دايما بيراهنوا على ضحالة عقول و وعى الخرفان إللى بــ تطبل وراهم … وخصوصاً ان نفس الناس إللى شتمت فى صفقة الرافال بتاعة مصر .. هم نفسهم إللى هللوا لصفقة الرافال مع قطر … طب اييه يا عم الحاج … هى مش كانت بتسخن.. و بتجيب ابلاتين و كوندنسر !! 😅
وزاد العواء أكثر لما مصر استلمت حاملة المروحيات الثانية بإسم الزعيم الراحل انور السادات … و بدأنا نسمع شائعة ان مصر بعد ما دفعت ثمن حاملتى الطائرات … هتبيعهم لروسيا بدولار لكل حاملة … والمصيبة انه برضوا فيه ناس صدقت … ومصر ما ردتش على الهبل ده غير بالإعلان عن صفقة طائرات الــ KA-52 .. لاستكمال تسليح حاملتي الطائرات … لتبدأ ابواق الاخوان ومراكيبهم من غلمان المؤامرة من عينة الواد بتاع ناسا اللى طلع يقولك .. هى مصر بتتسلح لييه !! … طب يا كابتن ، و هى إسرائيل إللى جابت طائرات الــ F-35 الأمريكية … كانت بتتسلح ليه يا أسطى !!؟ وإلا دى ما أخدتهاش فى الكيلاس … 🤔
المهم انه بعد مصر ما استلمت حاملاتى المروحيات.. أعلنت انها هــ تقوم بإنشاء اسطولين بحريين .. أسطول شمالى للبحر المتوسط .. واسطول جنوبى للبحر الأحمر… والاسطولين بقيادة حاملتى المروحيات جمال عبد الناصر .. وانور السادات … و ان مصر هــ تنقل كمان تكنولوجيا تصنيع الكورفيتات البحرية للترسانة البحرية بالإسكندرية !! 🙂
وبعدين فجأة .. لاقينا مصر بــ تفتتح قاعدة محمد نجيب فى الساحل الشمالى … قاعدة ضخمة يإستعدادات ضخمة … وغرفة عمليات مركزية …. و كمان مشروع صوب زراعية وإنتاج زراعى … وكل التحليلات وقتها كانت بتصب فى اتجاه ان مصر بــ تثبّت أقدامها و بتدعم قوتها الضاربة ، و بــ تمهد لمد ذراعها الطولى لحماية امنها القومى فى البحر المتوسط .. و فى ليبيا …. و طبعا مش محتاجين نتكلم عن حالة التشنجات والحرقان اللى اصاب عناصر المؤامرة بكل اذرعتهم الإعلامية بسبب الموضوع ده … و مصر ولا اتهزت فيها شعرة ..
المهم علشان مانطوّلش عليكم .. قولوا طوّل 🙂 … بدأت الأحداث تتسارع فى كل الملفات حوالين مصر أو فى الداخل المصرى .. فــ نلاقى شوية السودان تولع .. وشوية الجزائر تولع .. وشوية موضوع غاز شرق المتوسط يسخن .. وشوية لبنان تولع .. وشوية يلا بينا نلعب ثورة ونسقط النظام .. وشوية سد النهضة هيتملى.. لأ مش هيتملى .. لأ هنجيب جيش مليونى يقف قصاد تهديدات مصر .. لأ أصلنا مانقصدش إننا هــ نحارب مصر … طب مش عارف دولة الجبل الأصفر والا الأخضر فى شمال السودان ملاصقة لحدود مصر عايزة تنفصل عن السودان ، و تعمل حكم ذاتى… طب سوريا تولع ، و أردوغان يدك فى الشمال السورى ويجتاح الاراضى السورية… طب يلا بينا ننقل الدواعش إلى ليبيا .. طب العراق بتولع … طب أردوغان يعلن عن إرسال قوات إلى ليبيا ….. أوبااااااا … الدنيا بتولع ومصر وتركيا هيحاربوا بعض ، لو تركيا اصرت على التدخل فى ليبيا .. إلحق دى مصر اتقلبت من غاز شرق المتوسط ، و قبرص وإسرائيل واليونان فقعونا بمبة يا أفيونة … لأ أردوغان قال انا ماكنتش اقصد انى هــ أبعث جيش للقتال فى ليبيا …. والنبى ما أنا .. دى أوختشى منى .. !! 🙃
و فجأة .. وسط كل إللى بيحصل ده .. تطلع مصر تعلن عن تنفيذ المناورة قادر ٢٠٢٠ .. الموجهة لكل أطراف المؤامرة … واللى بتقول من خلالها ان مصر قادرة على حماية نفسها وحماية امنها القومى .. فى اتجاهاته الأربعة.. و مش بس الدفاع عن الامن القومى .. لكن كمان بالضرب فى العمق لو تطلب الأمر ذلك !! 😉 …
و لأول مرة الطائرة الروسية الــ MIG-29 .. اللى كانت إسرائيل بتعمل المستحيل لمنع وصولها لمصر .. نلاقيها بتشارك فى المناورة قادر … و مش كدة وبس … لكن كمان نشوفها بتهاجم أهداف هيكلية على هيئة الدبابة الاسرائيلية الميركافا …. أفندم … نعم … أااه .. طيب … !! 😉😇
و فجأة برضوا وبالتزامن مع المناورة قادر .. بتعلن مصر عن افتتاح القاعدة العسكرية برنيس فى جنوب الساحل الشرقى على البحر الأحمر.. كأكبر قاعدة عسكرية فى الشرق الأوسط… و واحدة من أكبر القواعد العسكرية على مستوى العالم …. وشارك فى افتتاح القاعدة بعض الرؤساء و نواب الرؤساء والملوك و وزراء دفاع بعض الدول … و يشارك فى العروض العسكرية فى الافتتاح … تشكيلات من طائرات ال F16 الأمريكية.. و الــ MIG-29 الروسية .. والرافال الفرنسية .. بالإضافة لطائرات النقل العملاق زى الــ C-130 .. و ده غير طائرات الابرار الجوى …
ويطلع المتحدث الاعلامى أثناء تعليقه على فعاليات مراسم الافتتاح العسكرية للقاعدة برنيس .. وأمام شاشات التليفزيون و أمام الرؤساء و الملوك و وزراء الدفاع إللى حضروا الافتتاح علشان يقول ان ده مجرد عرض لإرسال رسالة للعالم كله ان مصر جاهزة لحماية حدودها من كل الاتجاهات.. بل ولحماية حدود امنها القومى على طول مداه !!! … بووووووم !!! 💪👊
فــ تلاقى إييه بقى … تلاقى الاخوان ومراكيبهم من شمامين الكلة إللى بيتعاطوا صنف كلة من النوع المفتخر .. طالعين يقولوا ان مصر بتعمل كدة ، و بــ تفتتح قواعد عسكرية لحماية امن إسرائيل… يا ياراااجل… انت بجد … هو انتم مش كنتم بتقولوا ان ده جيش المكرونة والكحك… و عندنا عقيد مقاتل خط الجمبرى… وان الجيش المصرى ضعيف ومايقدرش يقف أمام إسرائيل القوية …. طب ياترى ازاى بقى جيش المكرونة هيحمى امن اسرائيل!!؟ .. و هيحميها من مين اصلا … هو إنتوا نسيتوا إن ثورتكم المزعومة ما سابتش جيش فى المنطقة يقدر يهدد أمن اسرائيل !!؟ … والا يكونش بــ يحميها من جيش شخلول اسطنبول إللى شلح جنوده فى شوارع انقرة ايام الانقلاب بتاعهم … جيش تركيا اللى الشخلول بتاعه جاب ورا فجأة .. مع أول صاروخ هاربون ضربته البحرية المصرية فى الهواء !! .. جيش الشخلول العثمانلى ، اللى سايب إسرائيل ، و بــ يعادى مصر .. وكمان عمّال يضرب فى سوريا والعراق وليبيا .. و ده غير إن 40% من تسليح الجيش التركى ، صناعة إسرائيلية .. لأ جيش الخلافة صحيح !! 😁😆
طب تعالى بقى نبص على الخريطة كدة ونشوف … هو لما مصر يبقى عندها قواعد عسكرية شمالية وجنوبية .. مغطية البحرين المتوسط والأحمر… وعندها اسطولين بحريين شمالى وجنوبى.. والبحرية المصرية تصنيفها السادس على العالم … وبــ تصول و تجول فى البحر الأحمر لحد حدود مضيق باب المندب و ما خلفه … وكمان لها كامل السيطرة على جزء كبير من البحر المتوسط لحماية مقدرات الغاز المصرى .. وضبط إيقاع الحركة فى شرق المتوسط … وعندنا طائرات حديثة قتالية وسيطرة جوية .. قصيرة وبعيدة المدى قادرة على تغطية أبعاد الأمن القومى المصرى لأقصى مداه …. هى كدة مصر تبقى بــ تحمى أمن اسرائيل … والا بــ تحاصر إسرائيل !!؟ … و ياترى بقى الجيش الخاين العميل هو إللى بــ يقوّى نفسه فى مواجهة عدوه.. والا إللى فاتح أرضه لاستضافة قواعد عسكرية غربية .. وسيادته منتهكة على أرضه… !!؟ 😉😁
طب سيبك من ده كله …. يا ترى بقى عميل إسرائيل هو إللى بــ يقوّى قدراته العسكرية .. و بــ يتدرب بالذخيرة الحية على أشكال هيكلية لأسلحة عدوه .. والا إللى بقاله سنين بــ يستميت لإجهاض أى تطوير عسكرى وتنمية القدرات القتالية للجيش المصرى علشان ما يبقاش شوكة فى خاصرة عدوه الأزلى والمباشر !!؟؟ ….. بــ يتهيألي الإجابة واضحة وضوح الشمس 🤔
الإجابة أن كل دوول مجرد أدوات مالهاش شغلانة غير انها تخدّم على أمن وسلامة العدو الازلى… ناس بتشتغل بأجر علشان تأمن أسيادها… بدل ما هو إللى يشتغل بإيده… لأن أكبر نجاح بالنسبة للعدو ده .. انه يستخدم ناس من جوانا لخدمته … و هم بيمثلوا دور النقاء والطهارة والخوف على البلد.. والتشكيك فى وطنية مؤسسات الدولة … وساعتها هيلاقوا ألف من يصدقهم … حاجة كدة عاملة زى كلاب الصيد إللى بيستخدمهم الصياد لارهاق الفريسة قبل ما ينقض هو عليها 😎
و الكلاب دوول بيلعبوا اقذر دور ممكن حد يلعبه … وينطبق عليهم المثل الشعبى إلى استخدمناه قبل كدة كعنوان فى أحد ومقالاتنا…
“كلم الــ….. جماعة تلهيك… واللى فيها تجيبه فيك” 😉🙃
يعنى الخلاصة .. و من الاخر كدة … الناس دى مجرد أدوات و خط دفاع فى ايدين المعلم الكبير .. سواء بشكل مباشر أو غير مباشر .. كل مهمتهم محاولة وقف أو على الأقل تعطيل مصر علشان ماتقدرش تكمل الهدف إللى هى بتسعى للوصول إليه… وهو النهوض من الكبوة .. و تأمين نفسها ضد العدو الرئيسى .. و يمكن كمان الوصول لما هو أبعد من كدة !
مصر بــ تتعملق… و بــ تسيطر… و هدفها هو الوصول للقوة إللى تأمنها أمام العدو الازلى … إللى ماسك الخنجر فى إيده و مخبيه وراء ظهره ، ومنتظر اللحظة المناسبة … لكن مصر عارفة هى بتعمل اييه … و فى نفس الوقت .. فاهمة كويس وظيفة الكلاب إللى بــ تنبح طول الوقت … و مصر سايباهم ينبحوا .. لكن وقت اللزوم هتخرس النباح ده … لإنه إذا كانت مصر قادرة على تحجيم سيد الكلاب و بــ تحاصره فى مكانه و فاهمة العابه .. و قدرت تكشف وتفضح أدواته من هؤلاء الكلاب …. فــ الكلاب النابحة على مصر أهون بكثير 💪✌️🙂
تحياتنا للجميع .. و حفظ الله مصر!