27 Jan 2020
وائل غنيم .. الوسيلة والهدف .. !!
———————————-
مقالنا النهاردة مباشر جدا … والموضوع أصلا مش محتاج لا أدلة ولا تحليل .. لأن الموضوع واضح وضوح الشمس … على الأقل بالنسبة لينا إحنا …. و لولا إن العديد من اصدقائنا تواصلوا معانا سواء من خلال التعليقات ، أو من خلال الرسائل .. بــ يسألوا عن موضوع وائل غنيم … ما كانّاش هــ نتكلم عنه من الأساس !!
معظمنا عارف إن وائل غنيم تم تعيينه فى 2010 فى منصب المدير الإقليمي لشركة جوجل لتسويق منتجاتها في الشرق الأوسط .. يعنى قبل ما يكمل 30 سنة … و طبعا مالناش دعوة إزاى شاب مصرى عربى يوصل لمنصب كبير زى ده … و فى التوقيت ده بالذات ….. 2010 اللى بدأ التمهيد فيها لمصيبة ((الربيع العبرى)) … قصدى ((العربى)) و لامؤاخذة 😏 … و كلنا عرفنا وائل غنيم بإعتباره ناشط سياسى ، وايقونة الشباب .. ومؤسس صفحة كلنا خالد سعيد .. الواد الحشاش … لما طلع فى برنامج العاشرة مساءً مع منى الشاذلى .. وقعد يعيط … ويقول احنا كنا عايزين البلد تبقى احسن .. و بعدين ساب البرنامج وخرج من غير ما يكمل الحوار.
و طبعا ده غير دوره المشبوه فى فترة حكم الإخوان .. وحالة الشد والجذب اللى كانت فى النهاية بتصب فى مصلحة الإخوان … والفيديو الشهير له فى المؤتمر الصحفى فى أميريكا لما قال إنهم (يقصد نفسه والقطيع الممول) .. قدروا يسقطوا مؤسسات الدولة ، ومش فاضل لهم غير الجيش فقط هو اللى لسة واقف لهم عقبة فى تحقيق النصر الكامل والثورة الشاملة …. وذلك فى حالة إستعداء تام وعلنى للإعلام الدولى و من خلفهم ، ضد الجيش المصرى !
و قبل 30 يونيو .. غادر وائل غنيم مصر .. و بدأ حملة ضد مصر من برة … و شوية شوية بدأ صوته يخفت .. لحد ما إختفى … و كان بيظهر بين وقت والثانى على إستحياء .. بتغريدة هنا وإلا هناك … لحد ما رجع بقوة مع ظهور المقاول محمد على بتاع يالا بينا نلعب ثورة 🙃🙂 .. والحقيقة إن رجوع وائل غنيم كان صادم ومفاجئ للجميع !!
وائل غنيم رجع فى شكل غريب جدا .. بعد ما حلق شعر راسه وحواجبه .. وشعر جسمه كله … و بدأ يظهر فى فيديوهات لايف نصف عارى ، و بــ يهرتل بكلام غريب .. ويشتم شتائم بذيئة مش موجودة حتى فى القاموس … و قعد يشتم فى المقاول الأضحوكة محمد على … وبعدين دخل على زميل الكفاح وائل عباس بالمشرط .. وقعدوا يردحوا لبعض …. و دخلت على الخط اسراء عبد الفتاح .. و بقت هيصة … و بعدها وائل غنيم قعد يقول انتم بتقولوا ان انا طالع اخد التريند من محمد على .. ايوة انا طالع اعمل كدة علشان خايف على مصر .. ومحمد على ده مابيفهمش حاجة و هيضيع البلد … وقعد يشتم فيه .. 🙂
و هووووب .. فجأة كدة … رجع وائل غنيم فى كلامه .. وأعلن مصالحة مع محمد على .. وكدة قلوب وكدة احضان .. وانهم هيوحدوا جهودهم وهينسقوا مع بعض لصالح البلد …. وبعدين بدأ وائل غنيم يعمل حاجات كتيرة ضد بعضها … يشتم فى السيسى و بعدين يرجع يقول انا بحبه علشان قلبه طيب .. وبعدين يدافع عن محمد مرسى ويتكلم عن الشرعية .. وبعدين يشتم فى الاخوان والمرشد ويقول ان مرسى ضيع مصر .. وبعدين يدافع عن الهاربين فى تركيا .. وبعدين يرجع يهاجمهم ويقول انهم كلهم بيقبضوا من قطر .. ويهاجم “تميم قطر” ويشتمه ويهدده !!
وشوية يقولك انا انضميت للإخوان .. و شوية لأ انا سيبتهم و روحت للسلفيين .. وشوية لأ انا بقيت فكرى متحرر … وشوية يمجد فى 25 يناير .. وبعدين يشتم فيها ويقول احنا كنا غلطانين و ماكناش فاهمين حاجة .. وان مبارك ده كان راجل كويس وانا لو شوفته هاحب على راسه … !!! … و أخيرا بدأ يشتم فى الاخوان ويفضحهم .. ويقولك الجيش حلو والسيسى جميل … و انا عايز احط ايدى فى ايده ….. و الحقيقة ان الكلام اللى هو بيعمله ده .. عمل شوشرة عند ناس كتيرة .. وبقوا متلغبطين ، و مش عارفين يصدقوه والا يكذبوه !!
لكن بكل المقاييس … و علشان تبقوا فاهمين … اوعوا تفتكروا ان إللى بيحصل ده شيئ عشوائي .. او انها تخاريف واحد معتوه .. او توبة واحد ندمان .. حس فجأة بالبلد وعايز يرجع لحضنها .. و يالا بينا نحط ادينا فى ايدين بعض … و الكلام الكيوت ده … لأ … أبثلوتلى … الكلام ده مدروس بعناية … سيناريو محبوك بمنتهى الحرفية … سيناريو وضعه إللى فى ايديهم مفاتيح تشغيل وائل غنيم 😏
وائل غنيم بكل إللى بيعمله ده … بيحاول يجمع حواليه كل الأضداد … كل طوائف الشباب على اختلاف توجهاتهم بيترمي لهم الحاجة إللى هم عايزين يسمعوها .. بالأسلوب واللغة إللى بيفهموها … اليسارجية .. على العيال الصيع والسفلة بتوع البذائات .. على إللى عايز حاله يتصلح ويبقى مؤدب و كيوت .. على الحشاش بتاع الكيف .. على الواد المهيبر إللى بيحلم يعمل ثورة جديدة علشان يشوف إللى مالحقش يعيشه فى 25 يناير .. على بتوع اسفين يا ريس .. على مؤيدى السيسى و 30 يونيو … على البردعاوية .. على الاخوان .. على الحركات الثورية … على مؤيدى الاستقرار وضد الفوضى … الخ الخ الخ … يعنى عايز يلم حواليه كل دوول و يخليهم فى حالة شوشرة مستمرة … لكن فى نفس الوقت يفضلوا مربوطين بيه .. ومتابعينه .. و مستنيين كلامه .. وعايزين يسمعوه .. و كل واحد فيهم مستنى يسمع الحتة بتاعته إللى بيحبها و بتغذى قناعاته إللى جواه !!
وائل غنيم .. او إن شئنا الدقة من هم خلف وائل غنيم بيحاولوا يعيدوا استنساخ الايقونة .. بشكل جديد .. علشان تماثل كل الاذواق … وخصوصا بعد انهيار تنظيم الاخوان .. وخسارته الشارع المصرى للأبد …… يعنى المطلوب تجميع كل الشباب فى سلة واحدة … عارف لييه … علشان الدولة مهتمة بالشباب .. و مركزة عليهم
طب برضوا مافهمناش .. يعنى الهدف اييه بالضبط !!؟ .. ونفهم اييه من كل ده !!؟
ببساطة خالص … اربط بين مؤتمرات الشباب وتصعيد كوادر الشباب للعمل العام و فى مناصب كبرى وحساسة … والتمهيد لزيادة أعداد الشباب فى كل مفاصل الدولة ……. و بين كلام وائل غنيم عن انه مستعد يرجع مصر و يحط ايده فى إيدين الدولة ويبقى تحت تصرف الأجهزة الامنية واستعداده انه يمسك أى منصب عام تنفيذى فى الدولة .. حتى لو ببلاش علشان يشتغل ويساهم فى بناء الوطن …… وبين الصورة المتداولة على بعض المواقع لوائل غنيم مكتوب عليها 2024 😉😁
وائل غنيم بيحاول يخاطب كيانات الشباب و بيلعب على ميول وايديولوجيات كل الشرائح علشان يحاول اختراق جسد الدولة من خلال الشباب والبرامج إللى معمولة لهم علشان يضمن التواصل مع أى فريق ممكن يكون له مستقبل سياسى واعد داخل إطار مؤسسات الدولة .. و فى نفس الوقت بيحاول هو نفسه يقترب من الدولة .. ويقدم نفسه عن طريق مهاجمته للاخوان وكل أذرعتهم الداخلية والخارجية .. والتهديد بكشف معلومات مهمة عنهم …. و فى نفس الوقت بيعلن انه مستعد يشغل أى منصب تنفيذى حتى لو ببلاش .. علشان هو فاق وعقل وعرف ان الاخوان دوول وحشين وشريريين … و مش هنلعب معاهم تانى .. ولا هنعمل ثورة تانى …. و كل ده بقى تضربه فى الخلاط .. علشان نوصل لإنتخابات الرئاسة 2024 … يكون هو عمل قاعدة شبابية و علاقات متشعبة .. و مسك منصب فى الدولة … وبعدين يترشح بقى لإنتخابات الرئاسة !!
كل ده طبعا على اساس ان الدولة بكل أجهزتها الأمنية والسيادية بريالة … و مش هيفهموا إللى بيحصل ده … او مش عارفين مين إللى فى ايديهم مفاتيح تشغيل وائل غنيم … سواء كان هو اللى كمل المشوار .. أو ظهر حد تانى يكمل وراه ….
المشكلة مش فى أجهزة الدولة … لكن المشكلة دايما فى الشاب أو المواطن إللى بــ يبلع الطعم كل مرة … او بــ يتشوشر من إللى بــ يشوفه … لأن العقلية البسيطة بــ تميل دايما للتعامل مع الشكل الخارجى .. وتصدق الصورة الواضحة المباشرة … و بــ تبعد عن كل ما يكمن فى الخلفية العميقة للصورة …
وائل غنيم … مش هنصدقك … مهما عملت …. و خلاصة الحكاية معاك تتلخص فى جملة واحدة:
-(((((لا الوحش بيحلوّ … ولا الزفر بينظف)))))-
أو زى ما قال الراحل مصطفى محمود “إنها الثياب التنكرية للأعداء الجدد” 😏
نسيبنا بقى من الأدوات دى وكلاب السكك اللى بتشتغل بالأجرة (نعتذر للفظ) .. وننتظر ما ســ يتم الإعلان عنه غداً .. فيما يعرف بصفقة القرن .. واللى بالتاكيد مش هــ تكون فى صالح الفلسطينيين بحسب ما هو متوقع .. و بحسب ما يتم نشره فى بعض المواقع و على لسان بعض السياسيين بإعتبار إنه تسريبات …
و بما إن دأب العرب والفلسطينيين .. ومعاهم الإخوان ومراكيبهم من اليسارجية ، هو المزايدات والشعارات الحنجورية الفارغة .. واللى كانت ومازالت هى السبب الرئيسى لحد النهاردة فى ضياع القضية و الأرض .. سواء فى فلسطين أو فى غيرها من الدول العربية فيما كان يعرف زمان بــ دول حزب الممانعة … فــ إحنا هــ نتفرج بكرة على كل دوول ، بكل أبواقهم الإعلامية ، و هم بــ يتركوا قضيتهم الرئيسية .. و يتفرغوا لشتيمة مصر بكل قوة و إجادة ، وإحترافية … نفس السيناريوا اللى بــ يتكرر كل مرة .. وبدل ما يركزوا فى قضيتهم .. بيركزوا فقط فى تخوين مصر 🙄
تحياتنا لحضراتكم .. وحفظ الله مصر