29 Feb 2020
اللعنة على الأبراج …. اللعنة على جروبات الماميز .. !!
——————————————————
مع إنتشار فيرس كرونا في العالم … و مع التحديثات الدائمة التي تكاد تكون كل ساعة لبيانات منظمة الصحة العالمية بأعداد المصابين و المتوفيين و المعالجين الذين شفوا تماما من المرض …. بدأت حالة الصرع و السعار الممزوجة بالكلة الإخوانية و تحالف معها المرضي النفسيين أصحاب مرض الدونية و إحتقار الذات …. لما بـيلاقوا بيانات منظمة الصحة العالمية و هي المصدر المعتبر الوحيد في العالم بيقول أنه حتي الآن …. مصر خالية من أي إصابات بالفيرس …. و حتي الحالة التي أكتشفت …. كانت حالة لشخص أجنبي حامل للفيرس و ليس مريض به … و أنه شفي تماما و خرج من الحجر الصحي الإحترازي …. يعني مصر لغاية اللحظة دي لازالت نضيفة من المرض .
الجماعات دي أصابها حالة سعار و العياذ بالله … و زي ما يكونوا نفسهم البلد دي تصاب بوباء او مصيبة أو تتحقق أمانيهم اللى كانوا بيقولوها عيانا بيانا ” يا رب جيب عاليها واطيها و هدها على دماغ شعبها” …. و وجدناهم بيستموتوا بمحاولة إثبات ان مصر فيها آلاف الحالات في كل مكان و ان الناس بتموت … و بيحاولوا بأي طريقة يجيبوا اي خبر مضروب او تصريح غير دقيق او خبر صحفي مدسوس محاولة منهم باثبات إن مصر موبوءه بالمرض ….
و الواحد لما بيشوف حالة السعار اللى هم فيه …. بيفكرني بمشهد سمير غانم في مسرحية المتزوجون و هو بيدور على الصرصار و بيطلع بجنون و يقول ” مجاش هنا ؟ ” 😊 😊 …. … و هم نفسهم يلاقوا حالة واحدة بس عشان يبدأوا الهرى و العويل و التشفي في الشعب المصري و الحكومة و تصفية الحسابات.
و عشان نكون محددين …. لان الموضوع مش مستاهل هرى و لت و عجن و نقاشات ملهاش لزمة :-
• منظمة الصحة العالمية هي المصدر المعتبر الأوحد و الوحيد عن الإجراءات المتبعة للكشف و الحجر الصحي و إعلان عدد الحالات و متابعتها في العالم كله … فأي خبر أو أعداد تشوفها عن أي دولة في العالم في أي حته غير الموقع الرسمي لمنظمة الصحة العالمية … كلها كلام فارغ حتي و إن صدرت عن حكومات …. لأن الكلام السياسي الخاص بوزير بيكلم شعبه داخليا …. حاجة …. و الكلام العلمي من مصادره المعتبرة … حاجة تانية خااااالص.
• مش عيب و لا حرام إن يكون في مصر حالات …. إحنا مش أحسن و لا أقوي من فرنسا و إيطاليا و أمريكا و غيرهم …. لكن معلش هــ نعمل إييه ؟؟؟ .. غصب عننا بجد … فعلا لغاية دلوقتي ربنا حافظنا ….. و لو فيه حالات …. الحكومة هــ تنكر ليه ؟؟؟ … بيتآمروا على حضرتك مثلا ؟؟؟؟؟؟ ….. بلاش تفاهه .. و إكبر شوية .
• إنت عايز تقنع اللى حواليك إن أعتي الدول في العالم في كبح الحريات زي الصين و إيران معرفتش تخبي إن عندها حالات ….. و مصر اللى إتهمتها بالباطل قبل كدة انها معرفتش تخبي جثة ريجيني و نزلت تعيط عند السفارة بتاعتهم عليه ….. نجحت تخبي آلاف الحالات و مئات الوفيات !!!! …. طب هم فين ؟؟ … و إييه أسماؤهم ؟؟؟ … و مصر أصلا أوضة و صالة … و اللى بــ يتنفس فيها بــ يتصور صوت و صورة و بــ يتنشر على النت.
• كل الإجراءات على المنافذ الدولية لمصر ( جوية – بحرية – برية ) متابعة بمنتهي الدقة من مندوبين منظمة الصحة العالمية اللى بــ تتابع تنفيذ توصياتها …. و اللى مش بــ يعدي يوم إلا و بــ تشيد بالتعاون التام من وزارة الصحة المصرية و مدي إلتزامها بالتنفيذ …. فيا ترى في دماغ حضرتك اللوزعي …. إييه اللى يخللى منظمة دولية مرموقة زي دي تتواطىء مع الحكومة المصرية ضد حضرتك ؟؟؟
• و عشان تعرف يعني اية الفرق بين الكلام السياسي لوزير فاااااشل في حكومة بيكلم شعبه داخليا ، بــ يحاول فيها ينقذ رقبتة من المسائلة الداخلية …… و بين بيانات خبراء منظمة دولية …. لما طلع الوزير الفرنسي و قال ان فيه حالتين في فرنسا جايين من مصر … و طلع الوزير الكندي قال فيه 6 حالات جايين من مصر …. المنظمة الدولية ما أعلنتش موافقتها على الكلام الفاضي ده إلا بعد التحقق …. و لما ألحت المنظمة على الاستبيان من التفاصيل …. الكلام إتغير …. و بدأ يجي كلام مايع تاني زي مثلا …. ( أصلهم بقالهم 8 أيام واصلين و آخرين وصلوا من أسبوعين كاملين – لأ أصل هم كانوا في إيران و عدوا كام يوم في مصر بس كانوا في فترة الحضانة – لا أصل هم كانوا في ايطاليا و عدوا على مصر- أصل ممكن انهم اخدوه لما وصلوا) ….. و كلام كتير مايع …. فالمنظمة الدولية أصدرت بيان مفاده انها حتعلن المعلومات النهائية لما البهوات في فرنسا و كندا يلموا نفسهم كده و يبعتوا تفاصيل وافية عشان نعرف اييه الموضوع بالظبط.
• انت بتحاول تقنع نفسك إن الحكومة عارفة و مخبية … و في نفس ذات الوقت شوفت الحكومة كلها بكل رجالها الحاليين و السابقين كانوا في جنازه الرئيس حسني مبارك و بعدها بكام يوم في العزا …. و لا شوفنا حد خايف و لا حد لابس كمامه و لا حد قعد في البيت و مراحش … و الكل كان بــ يبوس و يحضن بعض …. يكونش مثلا واخدين تطعيمات سرية و لا حاجه زي كده ؟؟؟؟؟
• البهوات مرضى الدونية اللى أتحفونا بعبقريتهم و خبراتهم في السياسة و الإقتصاد و العمليات الحربية و الأمنية و تحاليل الـ DNA و غيرها من المجالات …. صعبان عليهم إن مصر يتقال عليها إشادات دولية في مجال الصحة و بالذات من المنظمة الدولية المعنية بالصحة في العالم …. بيتمني ان مصر يصيبها وباء عشان يتريق و ياخد لايكات و يبين إن دمة خفيف و إنه عميق و فاهم في كل حاجة … و بــ يحضر نفسه لبث الذعر و الهلع و إنه ينشر إشاعات بوفيات بآلاف و يطلب من الناس تنزل تشتري أكل و شرب بكميات مهولة …. عشان الأسعار تضرب و ييجي عاليها واطيها زي ما بيتمني …. نحب نقولك … إن شاء الله انت و اللى منك … و ربنا يحفظ مصر و أهلها من شَّرك و من مرضك النفسي.
• البهوات اللى كانوا بيحلفوا بالتوراه و الإنجيل و القرآن إن فيه وباء إلتهاب سحائي و إن الوفيات في المدارس بالمئات …. و فشلوا يجيبولنا إسم واحد او حالة واحدة بس أو أهلها ….. هم نفسهم اللى دلوقتي بيقنعوا الناس ان حالات الكورونا بالآلاف و إن المستشفيات مليانة …. و دول تلاقيهم منتشرين على جروبات الماميز بتاعة المدارس …. و تحس أن كل واحدة منهم بتروح بالليل لجوزها تقول له ” أنا عايزة كرونا يا إبراهيم”.
• هــ نقول كمان … مش عيب و لا حرام ان يعلن عن حالات في مصر …. و ممكن كمان ساعة او يوم او اسبوع يتم الاعلان عن حالات …. محدش حيخبي و لا ليه مصلحة انه يخبي و لا حد يقدر يخبي أصلا …. و ممكن ميحصلش خاااالص …. لكن العيب انك تتوقع و تستني و تتمني ان يكون فيه حالات.
• سيدنا على ابن ابي طالب قال: كل متوقع آت فتوقع ما تتمنى.. وكما قال بعض السلف : كلماتك اقدارك ، وقال ابن القيم: البلاء موكل بالنطق به..يعني الحاجة الوحشه مرهونة بإنك تقولها فتحصل … فكل واحد بيتوقع حاجه … حتحصل فيه و في عياله أول واحد ….. فتفائلوا بالخير تجدوه .
• اللي خايف على نفسه وعياله يتبع الاجراءات الوقائية بنفسه … لكن يقعد يهري ٢٤ ساعة على الفيسبوك وينقل في اشاعات وكلام فاضي زي هوجة السحائي وامثالها وكله كلام مرسل عن اشخاص مجهولة ومواقع مجهولة …. و اللي مش واثق في الجهات الرسمية واجراءتها يقعد هو وعياله في البيت ويعزل نفسه عن الناس …. غير كدة يبطل يصدعنا بكلامه لانه مش هــ يجبر الحكومة تمشي بدماغه او يسقطوا الوزارة او يقيلوا وزيرة الصحة او يعينوه رئيس مراجيح مولد النبي ( فقره مقتبسه من تعليق صديق الصفحة فتحى خطاب من على احد جروبات الماميز ) .
ياريت نهدي على نفسنا كده … و كل واحد يركز في شغلة و في أسرته …. و ربنا يحفظ مصر و يحفظ شعبها و يحفظ أولادنا .
و ده بيان منظمة الصحة العالمية اللى تم نشره الساعه 5 مساءا بتاريخ اليوم …. ياربت تتابعوا الصفحة دي و متاخدوش اي أخبار غير منها … لو قالت ان مصر خالية … يبقي صح … و لو قالت مصر فيها مليون حالة … تصدقها و انت مغمض ….. ربنا يحفظ مصر
..————————————————————–
“٢٩ فبراير ٢٠٢٠: بيان منظمة الصحة العالمية بشأن الحالات التي تم اكتشاف إصابتها بفيروس كورونا 2019 في فرنسا وكندا بعد عودتهم من مصر
إن منظمة الصحة العالمية على علم بالتقارير الصادرة عن السائحين الفرنسيين والآخر الكندي والذين ثبت مؤخراً إصابتهم بفيروس COVID-19 بعد عودتهم من مصر.
الحالات المؤكدة في فرنسا كانت في زيارة سياحية لمصر، وما زال مصدر ومكان الإصابة قيد التحقيق. وقد أبلغت وزارة الصحة والسكان منظمة الصحة العالمية بجمهورية مصر العربية فور تلقيها الإخطار.
وقامت الوزارة بتنشيط فرق الاستجابة السريعة و إتخاذ الإجراءات المطلوبة للتقصى الوبائي وإجراءات متابعة المخالطين.
وتعمل منظمة الصحة العالمية بشكل وثيق مع وزارة الصحة والسكان في تقديم المشورة الفنية الخاصة بأنشطة التحقيق والاستجابة.
وقد أوصت منظمة الصحة العالمية بفحص الخروج من البلاد لدولة الصين في توصياتها المؤقتة الصادرة في 30 يناير بعد إعلان COVID-19 كطارىء صحة عامة ذو قلق دولي بموجب اللوائح الصحية الدولية. وتركز البلدان في الوقت الحالي على فحص المسافرين القادمين فقط من البلدان التي يُحتمل أن يبلغ عن انتقال مجتمعي للفيروس بها مثل الصين أو إيران أو إيطاليا أو كوريا الجنوبية.
وتقوم مصر بتنفيذ فحص دخول المسافرين القادمين من هذه الدول فقط بناء على تقييم ذاتى قامت به وزارة الصحة والسكان ، حيث خلص التقييم أن فحص جميع المسافرين من جميع البلدان يستهلك الموارد.
و فى سياق الحالات المكتشفة حديثا فقد تم اكتشاف كل من الحالتين الفرنسية والكندية في بلديهما، حيث أنه لم تظهر على هذه الحالات أي من الأعراض أثناء مرورهم بنقاط الدخول المصرية، وبالتالي لا يمكن اكتشافهم من خلال فحص الدخول. وإضافة إلى ذلك تُظهر التقارير المنشورة أنه يتم اكتشاف نسبة ضئيلة من الحالات المستوردة عند نقاط الدخول بالدول حتى وإن كان إجراء الفحص قائما عند نقاط العبور.
حتى الآن، تم الإبلاغ عن حالة واحدة فقط من حالات COVID-19 داخل مصر، وقد تعافى المريض بشكل تام منذ ذلك الحين.
وتجري مصر حاليًا اتصالات مع فرنسا وكندا من أجل تبادل المعلومات اللازمة لتتبع المخالطين ، وستقوم بمشاركة تقرير مع منظمة الصحة العالمية في الأيام المقبلة. حيث بدأت فرنسا بالفعل في مشاركة نتائج التحقيق وأقرت كندا باستلام طلب مصر.”
———————————————————————————–
ربنا يحفظ مصر