08 Mar 2020
الدولة المصرية .. و ملف سد النهضة .. !!
——————————————-
أصدقاء كثير بعتوا يسألونا عن المستجدات فى موضوع سد النهضة … وإييه اللى مصر هــ تعمله .. و رد فعل مصر إييه بالنسبة للسودان .. و … و … و ….
و علشان نجيب المفيد … فــ الفيديو ده بــ يوضح إستراتيجية مصر فى التعامل مع الملف ده بدون صوت عالى أو حنجورية سياسية من نوعية الكلام اللى بيعجب البعض .. و بدون الإلتفات للى طول الوقت بيطالبوا برد فعل مصرى عنيف .. ويلا بينا بقى نهدها على دماغهم … ولازم نضرب السد قبل فوات الأوان .. إلى أخر ما يقال من الكلام اللذيذ ده !! .. فليس هكذا تدار الأمور على مستوى الدول !
مصر دولة تقيلة .. و بتلعبها صح .. وبتحسبها سياسة .. وبتتعامل بمنتهى الإحترافية مع الملفات المصيرية اللى من النوعية دى .. و بــ تدرس كل خطوة بتعملها ، وإييه النتايج المترتبة عليها …. زى بالضبط ما ناس كتيرة هاجمت إتفاق إعلان المبادئ فى الإتفاقية الإطارية .. وقالوا إن مصر إنضحك عليها .. و السيسى فرط فى مياه النيل … برغم إن الإتفاقية دى هى اللى مورطة أثيوبيا لحد النهاردة .. ومخليها امام العالم كله فى موقف المخالف لإتفاقية دولية معتمدة ، لو الشيطان وزها وقررت تبدأ ملئ السد بدون موافقة مصر !! .. وبيعطى لمصر حق الرد بدون أى تردد !
سيادتك سخنان طول الوقت ، و عايز الدولة تدخل حرب ، ويبقى إقتصادك إقتصاد حرب .. طب أنت هتستحمل الكلام ده إزاى ، وإنت لما كيلو البامية بــ يزيد 2 جنيه ، بتقعد تصوت و تندب وتقول الإقتصاد بينهار .. فــ ياريت تهدى كدة .. وتسيب الدولة تشتغل بالعقل ….. الدولة اللى اثبتت من 2013 لحد النهاردة .. إن كل الخطوات والإجراءات اللى إتخذتها فى جميع القضايا والملفات .. سواء داخليا أو خارجيا .. كان معاها حق فيها … و حتى اللى كان مش بيعجبنا فى وقتها .. كنا بنكتشف مع مرور الوقت إن هو ده القرار الصح
مصر مش دولة عاجزة .. ولا عويلة … وتقدر بكرة الصبح تخلى سد النهضة كوم تراب … لكن ليس هكذا تدار الأمور … وأحب أفكرك .. إن مصر لما قررت تضرب الإرهابيين فى ليبيا بالطيران .. ما إستنتش موافقة حضرتك .. ولا موافقة أى دولة فى العالم .. لكن طلعت وضربت علشان تحمى مصر والمصريين .. وطلع الرئيس السيسى والطيران المصرى بيضرب بالفعل جوة ليبيا ، يقول إن على العالم تحمل مسئولياته أمام ما يحدث .. وإن على أميريكا والرئيس ترامب تأيد موقف مصر وحقها فى الدفاع عن نفسها ضد أى تهديد ….. وعملت كدة مرة قبلها لما طلع الطيران المصرى و دك معاقل الإرهاب للثأر لمقتل المصريين فى مدينة سرت .. بس يظهر إننا بننسى !
مصر بالأمس اصدرت بيان شديد اللهجة ضد اثيوبيا .. ولأول مرة يحمل البيان المصرى هجوم عنيف وواضح على أثيوبيا .. بل وتهديد خفى كمان … اللهجة دى بتقول ، إن مصر لن تتوانى عن التصرف لحماية حقوقها وحقوق الشعب المصرى ، ضد اى محاولات للإستيلاء على مياه النيل لمصلحة أى دولة … و فى عرف السياسة .. فــ البيان ده معناه إن ما بعده هــ يكون إجراء تصعيدى .. وقد اعذر من أنذر .. وإجتماع الرئيس السيسى بقيادات الأفرع والقيادات العليل لقوات المسلحة وتصوير اللقاء ونشر صوره .. مجرد رسالة موجهة لأصحابها …
مصر لعبتها سياسة صح .. و سحلت أثيوبيا وراها فى افريقيا و روسيا و أوروبا والأمم المتحدة وأخيرا أميريكا .. بل و وقعت الإتفاقية النهائية بالأحرف الأولى أمام الطرف الرابع اللى إرتضته كل أطراف التفاوض .. و مش أى طرف .. دى اميريكا … يعنى فى عرف السياسة .. مصر خلت اثيوبيا وشها فى الحيط .. و أهلت العالم كله ، سياسيا وقانونيا ، لأى رد فعل ممكن مصر تقوم بيه للحفاظ على حقوق الشعب المصرى .. و مش أى حق .. ده حقه فى الحياة
إحنا شخصياً واثقين فى القيادة السياسية للدولة .. و حسن تقديرها للأمور .. و واثقين فى جيشنا وقدرته على حماية أمن مصر وسلامتها و بنعمل المطلوب مننا زى ما قال الرئيس السبسى فى الفيديو ده .. لأن هو ده المطلوب مننا فقط … المهم بس لما يجد الجد .. و لو حصل تطور فى الأحداث _لا قدر الله_ نلاقيك واقف فى ظهر بلدك .. ومعاها مش ضدها
السنة دى هى سنة الحسم لملف سد النهضة … و هيبقى لمصلحة مصر بإذن الله
حفظ الله مصر وشعبها من كل شر