14 Mar 2020
الكورونا فى الهشيم .. !!
(خواطر و مشاهدات)
————————-
بمجرد اعلان الصين عن السيطرة على فيروس كورونا وبدأ إخلاء المستشفيات الميدانية فى ووهان بؤرة ظهور المرض ، نتيجة لارتفاع معدلات الشفاء .. حدثت حالة من التصعيد الاعلامى و عملية نشر ممنهجة لأخبار إصابة بعض المسئولين الكبار فى بعض الدول ، و زوجاتهم .. وكمان بعض لاعبى كرة القدم ونجوم مجتمع و ممثلين .. و على إثرها تم اتخاذ قرارات بحظر بعض الأندية .. و وقف أنشطة كرة القدم فى بعض الدوريات .. وغلق متحف اللوفر وبرج إيفل .. وغيرها من الاجراءات
زيادة غير طبيعية فى أعداد الإصابات اليومية من فيروس كورونا فى اوروبا .. و طلع بعدها ترامب يعلن تعليق رحلات الطيران مع اوروبا بالكامل ، باستثناء إنجلترا .. وبعدين النهاردة دخلت إنجلترا فى قائمة الحظر
بعد إعلان امريكا وقف الرحلات لأوروبا و بعد الغضب الأوروبى من القرار .. بدأت تصريحات المسئولين الأوروبيين تتوالى … فالرئيس الفرنسي قال ان الاسوء لم يأت بعد … و المستشارة الألمانية ميركل قالت انه من المرجح إصابة من 60% الى 70% من الشعب الألماني بالكورونا… و رئيس وزراء إنجلترا طلع يقول انه بالأعداد الحالية فإنه من المرجح انه فيه فى إنجلترا مش اقل من 15 الف إصابة لم تظهر على أصحابها أعراض المرض بعد .. وانه لو ما أخدناش بالنا كويس من صحتنا فإنه سيكون علينا أن نودع احبائنا … ده غير ان منظمة الصحة العالمية أعلنت ان أوروبا أصبحت هى بؤرة المرض الجديدة !!
ياترى اييه إللى انتم تعرفوه واحنا مانعرفوش!؟
بغض النظر عن البوستات الدوارة إللى مالية الفيسبوك … لكن الواقع والأرقام بتقول ان أكثر المتضررين لحد النهاردة من إللى حصل هى الصين … تليها أوروبا و روسيا … تليهم اقتصاد الخليج بالكامل… وطبعا سيبك من إيران .. كدة كدة الدنية ماشية معاهم من سيئ لأسوء !!
المتحدث بإسم الرئاسة الصينية طلع فى مؤتمر صحفى يعلن عن مستجدات الوضع بتاع كورونا و بيقول ان الصين سيطرت على الوضع .. وبيتهم اميريكا علناً بإنها هى سبب نشر المرض .. وبيطالب أميريكا بالشفافية ، و إنها تعلن عن المرضى إللى عندها دوول مين وبيتعالجوا فين .. و بإييه
مافيش خلاف بين السعودية وروسيا فى موضوع البترول واسعاره عالميا … ده اللى البعض بيحاول يوهمك بيه .. ويوجه نظرك وتفكيرك لسكة غلط …. حقيقة الأمر بيقول ان اصرار روسيا والسعودية على عدم تخفيض الإنتاج.. صحيح بيأثر بشكل كبير على سعر برميل البترول عالميا .. و صحيح بيخسر السعودية و روسيا مليارات .. لكن كل دولة فيهم بتلعب على مصالحها … لأن من ناحية انخفاض سعر البترول بيضرب بشكل مباشر فى اقتصاد ايران وممكن يوقعه لو استمر كدة لفترة … و من ناحية تانية له تأثير كارثى على شركات البترول الاميريكية إللى ممكن تعلن افلاسها لو فضل الوضع مكمل كدة لعدة شهور ..
!!! الصراع الاقتصادى أكبر من أن نستوعبه أحيانا .. و كل دولة بتدير الكروت إللى فى ايديها بما يتوافق مع مصالحها .. “واللى تغلب به العب به”
قرار تعطيل الدراسة فى مصر زى ما قولنا فى مقال سابق انه قرار سيادى ولازم يكون مبنى على تقدير موقف و قراءة وحسابات لتداعيات القرار ده …. و ده إللى حصل… انه فيه مستجدات … والمستجدات دى مالهاش أى علاقة بحجم انتشار الفيروس فى مصر لأنه لحد اللحظة دى .. فمصر من أقل الدول إللى حدث فيها إصابات… ومعظمها ناتج عن بؤرة مركب أسوان السياحى !!
و أخيرا …. مع كل إللى بيحصل فى العالم ده .. والربط إللى احنا حاولنا نختصره بقدر الإمكان اختصار غير مخل… بنلاقى ان منظمة الصحة العالمية قالت ان التجارب على الفيروس لسة تحت الاختبار .. ومافيش حاجة تؤكد أو تنفى إن ارتفاع درجات الحرارة فى الصيف ممكن يكون له تأثير قاتل على الفيروس
ولاحظوا ان درجات الحرارة فى الخليج وإيران معدية الثلاثين.. و مع ذلك عندهم إصابات و معدلات العدوى بتزيد
سلاح الوعي هو السلاح الوحيد فى مواجهة ما يحدث الآن… و ما يمكن أن يحدث فى المستقبل …..
(العالم مافيهوش صدف )