15 Mar 2020
جائحة كورونا …. كل شيجن إنكشفن و بان !!
——————————————-
بعيدا عن تلاحق الأخبار و البيانات الدولية و الإتهامات الدولية الرسمية اللى بتطلع بين الدول …. سواء بإتهامات الفشل بالتسبب في المرض و نشرة في العالم أو الإتهامات الرسمية بتخليق الفيرس و نشره لضرب الدول الأخرى …. و بغض النظر عن تسابق الأمم و الدول بتفعيل أهم مبادىء العلاقات الدولية و هى الإستفادة من المواقف الطارئة و تعظيم مكاسبها أو استخدامها للضغط على الآخرين ….. و بعيدا عن السباق المحموم مع الزمن ما بين الصين و اوروبا و امريكا في إنتاج الفاكسين المضاد للفيرس في أول أبريل للاستحواذ على التورته العالمية من بيع العلاج.
و بعد المقال اللى نشرناه بالأمس اللى كان مجرد خواطر طايره … و بعد رد فعل الفانز اللى كانوا بيسألوا عن تفاصيل الأخبار و ايه اللى حيحصل … و مين السبب …. فلازم نشكر الناس لأنهم فكروا وشغلوا دماغهم ووصلوا لحقائق بالإستنتاج حتى لو ماكانش فيه أى دلائل عليها فإحنا حبينا بس نأكد ان ما نشرناه كان مجرد خواطر …. و محدش يقدر يأكد أو ينفي او يقول حقيقة اللى حصل أو حتي ايه اللى حيحصل …. لكن الاهم من ده …. و اللى لازم الناس تاخد بالها منه هو حاجة مهمة جدا …. و اللى انكشفت قدامكم و قدام الناس كلها …. و هي … يا ترى شوفتم أكذوبة الجنة الغربية و أوهام إن النظم الصحية الأوروبية و الأمريكية سابقانا بسنين ضوئية و كل ده طلع هجص ؟؟؟؟ … طب شوفتم ان ازاي كان الوعي الجمعي ملعوب فيه بتثبيت خيالات و اوهام إننا ولا حاجه و ضايعين و عشان كده اللهم هجرة ؟؟؟
طب تعرف حضرتك ان المواطن اللى عايش في انجلترا اللى هي أقدم و أقوى النظم الصحية في العالم …. ان حضرتك بعد ما تدفع دم قلبك علشان تشترك في نظام تأمين صحى …. و تروح تحجز عشان تتعالج بتاخد دور …. ممكن تاخد ميعاد الدكتور بعد 8 شهور … و ممكن بعد سنتين تلاته …. و في بعض التخصصات في العمليات الخطرة ممكن يوصل الدور فيها بعد 10 سنين ؟؟؟ …. و لو مش عاجبك ممكن تروح لدكتور خاص بس ساعتها حتدفع آلاف الجنيهات الاسترلينية اللى ممكن تلاقيها قد مرتبك هناك لسنة قدام ؟؟؟؟ …. طب تعرف ان عااااادي جدا ان المصري المقيم هناك لو مثلا ضرسه اتكسر ممكن ياخد ميعاد بعد 8 شهور …. بياخد اجازة على حسابه و ينزل طيران لمصر و يعمل ضرسه عند أحسن دكتور و يرجع تاني …. لان تكلفة كل ده أرخص بكتيييييير من علاجه في انجلترا…… طب تعرف إن قوائم الإنتظار هناك تتعدي 4.3 مليون مواطن ؟؟؟ …. طب تعرف إن موضوع الضمان الإجتماعي و مرتبات البطالة دي فنكوش كبيييير و ان فيه ناس بتموت من الجوع في الشوارع …… وإن من أكتر المشاكل الإجتماعية في أوروبا هي مشاكل المشردين اللى مش لاقيين حد يصرف عليهم او على تعليمهم …… مش مصدق ؟؟؟؟ طب إقرأ الموضوعين دول :-
- قائمة الإنتظار في النظام الصحي الإنجليزي قد تصل الى 10 سنوات
- مواطن إنجليزي يموت من الجوع بعد قطع المعونات الحكومية
طب تعرف إن النظم الصحية اللى سابقانا بسنين ضوئية في أول إختبار حقيقي ليها … أعلنت منظمة الصحة العالمية أن أوروبا فشلت في منع انتشار المرض و ان أوروبا أصبحت بؤرة نشر المرض في العالم . …. طب تعرف ان دولة زي ألمانيا اعلنت ان 70 % من الألمان هــ يصابوا بالمرض و ان انجلترا أخدت بإستراتيجية أسمها (Herd immunity) اللى هي مناعة القطيع … يعني أخدوا استراتيجية انهم يسيبوا 60% من الشعب يتصاب بالمرض و بكده كلهم ياخدوا مناعة منه ….. طب تعرف إن الدول الأوروبية طوال الأسابيع الماضية مأخدتش أي إجراءات كشف او متابعة في مطاراتها بالنسبة للمسافرين او القادمين .. و إن كان الحال هناك ان اللى يقول سلامو عليكو يعدي ….. و يادوب بدات منظمة الوحدة الأوروبية بالأمس فقط الإتفاق على اتخاذ اجراءات موحده في المطارات و على الحدود ؟؟؟؟ …
طب ماحدش أخد باله إن مصر من اكتر من شهر و نصف بدأت بالفعل تاخد إجراءات كبيرة في المطارات من الكشف المبكر و متابعة المسافرين من اول يوم بيدخلوا فيها مصر لمدة اسبوعين …. و هي الإجراءات اللى كتير اتريق عليها بجهل او لغرض في نفسه مع الإشادات العديدة من منظمة الصحة العالمية بإحترافية الإجراءات المصرية….. طب تعرف إن مصر هي الدولة الوحيدة اللى اتحركت بسرعة و في الوقت اللى العالم كله ، كان بــ يتنمر على الصين و شمتان فيها ….. راهنت مصر على نجاحهم في القضاء على الفيرس و بالفعل نجح رهانها و بعتنا وزيرة الصحة الدكتورة هالة زايد الى هناك عشان ننقل خبرتهم في التعامل مع المرض من قلب الحدث و اللى حيكون للزيارة دي الأثر الكبير في تعاملنا و تعاملهم مع المرض
إحنا مش بنقول إننا أحسن ناس في الكون و لا إننا المتحكمين في المجرة و الكلام الفاضي ده …. لكن إعرف حجمك كويس و بلاش جلد الذات و التقليل من دولتك و الإنجرار وراء الإشاعات الإخوانية و اليسارية و مرضي الدونية بإن دولتك فاشلة و الدولة مخبية الوفيات …. طب مسألتش نفسك مع إن فيه 10 مليون مصري يعيش و يعمل بالخارج ليه مافيش مصرى واحد منهم اتمسك في أي مطار بالخارج طالع من مصر مصاب بالفيرس ؟؟؟؟ …. ده حتي الحالات اللى اتقال عليها رجعت لكندا و فرنسا طلعت هجص … و إنهم يا إما اتكشف انهم عندهم كورونا بعد ما رجعوا بأكتر من 18 يوم …. او كانوا في ايران و ايطاليا قبل رجوعهم …. يعني لم يصابوا بالمرض في مصر…. و إن معظم الإصابات اللى جاتلنا كانت راجعة يا إما من أوروبا أو أمريكا أو الخليج.
و فيه كام نقطة مهمة جدا لازم ناخد بالنا منها :-
• مش عيب إن يكون عندنا حالات …. و محدش يقلق لو أعداد المصابين زادت الفترة اللى جاية …. ده شىء عادي و زينا زي غيرنا …. فمثلا أنفلوانزا الخنازير اللى اصابت مصر عام 2009 أصابت أكتر من 15 ألف حالة في مصر وحدها و كانت عدد الوفيات تجاوز 280 حالة …. فالموضوع هــ يعدي و ممكن يخلص أسرع مما تتخيلوا.
• إيقاف المدارس في مصر هدفه إيقاف الصداع من الضغط الشعبي …. لأن الناس لسه موجوده في الشوارع …. و الإصابات كلها بتيجي من الأباء و الأمهات اللى أولادها …. و اللى بيطالب بإيقاف العمل فلازم يعرف انه كمان لازم يوقف المساجد و الكنائس و القطارات و المترو و المواصلات العامة و المحلات و المولات و النوادي و السناتر و الكل يقعد في البيت ….. حط في دماغك إن فية عشرات الملايين دخلهم يوم بيوم و لو قعدوا في البيت مش هــ يلاقوا ياكلوا ….. و لو الخليج قفل الدنيا هناك لكام شهر …. فهم قادرين يدفعوا الفاتورة …. إحنا مانقدرش .. و إن جزء من الموضوع إنه خلاص كدة كدة السياحة بتقف ودول العالم بتوقف الطيران .. والإستثمار بيقف .. يعنى القرار مش هــ يأثر على مصر إقتصاديا
كدة كدة الإقتصاد العالمى داخل فى مرحلة ركود … واللى مصر عملته مع الصين هو اللى هينفعنا فى المدى القريب والبعيد
• اوروبا كلها و معظم الدول قفلت مطاراتها ….. و مافيش سياحة خلاص بتيجي ….. و لو الوضع اتفاقم بجد فإحنا داخلين على وقت أصعب مما يتخيله أحد ….. خلاص يا عم إهمد بقي لانك حرفيا لو الوضع استمر كده لا سياحة و لا تحويلات مصريين من الخارج فإنت أول واحد هــ تصرخ و تقول مش لاقي و الأسعار زادت ….. فبلاش ذعر و اشتغل و حافظ على نفسك و على شغلك ….. صحتك أمانة في إيديك …. و الوقاية خير من العلاج …. بلاش خروج غير للعمل و في أضيق الحدود …. و إتبع تعليمات الوقاية و نظافة الأيد … صدقني بتفرق ….. إحنا مش بنخوفك لكن النصيحه واجبة و الوعي أهم حاجة في الوقت ده.
• إعرف كويس جدا … إن مصر قلعة الطب في المنطقة و قاطرة منطقة الشرق الأوسط في الطب الوقائي …. و إن مصر تقيلة جدا جدا في موضوع التعامل مع الفيروسات و الجائحات و الوقاية منها …. و إختيار منظمة الصحة العالمية إن مصر تكون مقرها الإقليمي المسئول عن منطقة الشرق الأوسط مكانش من فراغ …. و الإجراءات المصرية المتخذة حتي الآن بالخطط البديلة بتاعتها تم وضعها على أعلى مستوى من الحرفية و المهنية و تم مراجعتها من خبراء المنظمة الدولية و اللى أشادوا بيها تماما …. الدور على حضرتك في إنك تساعد نفسك و مجتمعك …. و إنك تهدي شوية الخبير الكامن في عقلك الباطن اللى بيفهم في كل حاجة و بيفتي في كل حاجة …. مش وقته خاااالص دلوقتي.
• إحنا متفائلين جدا …. و مصر هــ تعدي الأزمة … و بالفعل في خطط علمية و أجهزة قادرة على التعامل مع أصعب السيناريوهات …. ماتقلقش على نفسك وإعرف إنك في إيد أمينة …. و حضر نفسك لموجة كبييييرة من الشائعات اللى هــ يطلقها أولاد الحرام …. حصن نفسك بالثقة في النفس …. و إحذر الإشاعات …. تااااااني …. إحذر الإشاعات و ثق في دولتك عشان تحافظ على وطنك.
مصر بــ تثبت للمرة المليون إن رؤية الدولة أصح من أى سف وتريقة من اللى بيعملها السفهاء واللى بيستخفوا دمهم و ربنا يحفظ مصر