23 Mar 2020
نحرك أساطيلنا من أجلك …. أخلاق الغرب !!
———————————————
– يا عم الباسبور الأجنبي مكتوب فيه نحرك أساطيلنا من أجلك …. لكن الباسبور المصري مكتوب فيه لو ضيعته حتدفع تمنه…. هيهيهيهيهيهي
– المواطن الأوروبي ليه تمن و بلده بتخاف عليه … لكن حكومتنا فاشلة و مالناش تمن. هيهيهيهيهيهي
– يا عم روح شوف الدول المحترمة عايشة إزاي و بتحافظ على شعوبها إزاي …. إحنا ضايعين. هيهيهيهيهيهي
– لما أبقي أعيش في دولة محترمة زي امريكا او اوروبا أبقي ألتزم و أشتغل. هيهيهيهيهيهي
– يا عم دي دول متحضرة … شوف أخلاقهم و شوف تحضرهم … لكن انت بلدك ضايعة. هيهيهيهيهيهي
– يا عم أنا لو في بلد أجنبي هــ أتعالج ببلاش في أحسن مستشفي و في نفس اليوم و أنا حاطط رجل على رجل …. الطب عندنا ضايع. هيهيهيهيهيهي
– أنا لو من بلد اوروبية و سافرت فى الخارج و إحتجت مساعدة …. الحكومة تتقلب و تدور عليا و تعملى اللى انا عايزه و انا قاعد معزز مكرم … لكن احنا ضايعين .. هيهيهيهيهيهي
– أحسن نظام صحى في العالم في أوروبا و أمريكا و الدول المتقدمة …. و ببلاش …. خليك انت في دولتك الفاشلة … هيهيهيهيهيهي
طبعا اللى فات ده جزء صغير جداً من “إفِّيه” عاش و إتغذي عليه قطيع مرضي الدونية و مدعي الثقافة و اللى أصبح حبيس أفكار يسارية إخوانجية… و كان عشان يبان إنه عميق و مثقف و هو أجهل من الجهل نفسه …. لازم يبدأ كلامة جملة من الجمل اللى فاتت عشان يثبتك في الكلام و يتريق عليك …. و بعد اللى شوفناه من تحرك الدولة خلال السنوات اللى فاتت و اللى عملت نجاحات غير مسبوقة تاريخيا على مستوى العالم و بشهادة المنظمات الدولية …. و بعد تحرك اجهزة الدولة في الكام شهر اللى فات لمواجة مشكلات تمس أمن و سلامة المواطنين …. نحب نقولك معلش … الإفِّيه اللى انت عايش عليه بقالك سنين اتحرق خلاص … و مابقاش له قيمة أو لزمة 😊 ….. عارف ليه ؟؟؟
أقولك … و لان حقيقة التحضر الأخلاقي و قيم المجتمعات و الشعوب بتبان حقيقتها وقت الأزمات … تعالي أحكيلك حدوته 😊 ….. كان يا مكان و لا يحلي الكلام إلا بذكر النبي علية الصلاة و السلام …. شوف يا برنس.
ترامب طلع على الناس علانية و قال إنه ورث النظام الصحي الأمريكي مهترىء و متدني و غير فعال في مواجهة أزمة الكرونا … و إن أمريكا بجلالة قدرها عندها نقص حاااااد في أعداد الكمامات و مستلزمات العزل و التعقيم و التجهيزات الطبية و كمان اكتشفوا انهم عندهم نقص حااااد في اجهزة التنفس الصناعي … و طاقة المستشفيات الأمريكية سواء العامة او الخاصة طاقتها غير قادرة على استيعاب الحالات …. و ياريت الناس تلتزم بيوتها لان اللى هــ يتصاب ملوش مكان …. يعني بالبلدي كده لو اتصبت اولع مكانك … مش فاضيين ليك…. ده في نفس الوقت اللى رئيس المعهد القومي للأمراض المعدية في أمريكا طلع وصف نظام الفحص الصحي بشأن فيرس كرونا بالفاشل …. و ده كان بعد ما تم تداول صور الشعب الأمريكي بعشرات الآلاف على الشواطىء و المتنزهات غير عابئين بالتحذيرات …. و ده أفضي إلى إن أمريكا مرشحة بقوه إنها تلاعب الصين و إيطاليا على النهائي … و ممكن تكسب بالتزكية.
و الحاج ابو حنان قام مفعل قانون الانتاج القومي …. و هو قانون بــ يعطى الحكومة الأمريكية الحق إنها تستولي على طاقة المصانع و خطوط الانتاج لكل مصانع القطاع الخاص و توجهها لأمنها القومي في وقت الكوارث …. ترامب قال انا مش عايز عربيات و لا مكن و لا اي انتاج …. شغلوا طاقتكم لانتاج المستلزمات الطبية و اجهزة التنفس الصناعي.
أما بقي في اوروبا … فــ إيطاليا …. طلع رئيس وزراؤها يسب و يلعن في الإتحاد الأوروبي كله … لان الصين بعتت شحنة كمامات ضخمة بطيارة كمعونة لمساعدة ايطاليا في محنتها … الطيارة نزلت تتزود بالوقود في التشيك … قامت حكومة التشيك “مكمبرة” الشحنة كلها و استولت عليها و وزعتها على مستشفياتها … و بعدها طلع وزير الداخلية هناك قال معلش … كنا محتاجنها و المواطن التشيكي أولى من الإيطالي …. و الطيارة التانية اللى كانت وراها نزلت مطار هامبورج ترانزيت …. قامت الحاجة ميركل قالت و رحمة أمي ماهي طالعة تاني … تولع إيطاليا باللى فيها …. و فتحوا الطياره و استولوا على الشحنة كلها و وزعوها …. و ده في نفس الوقت اللى إيطاليا بتصرخ للعالم لنفاذ مخزونها من الكمامات …. تركيا قالتلهم هــ نبعت ليكم بس تبعتوا الفلوس كاش و بالأسعار اللى نحددها … إيطاليا رضخت ليهم و حولت الفلوس …. قام أردوغان قالهم “مامتك في العشة و لا طارت” … و ضرب الفلوس في جيبة و قالهم “سورى … لما نخلص الأزمة اللى عندنا نبقي نبعتلكم … اولعوا بعيد عني”…. و رد علية رئيس وزراء ايطاليا إنة كان عارف أن اردوغان حـ يبتزايطاليا في ازمتها و حيطلب منها فلوس و تنازلات سياسية …. دي تركيا اللى نعرفها طول عمرنا.
اخواتنا في اليونان طالع عينيها بسبب اللاجئين اللى بترميهم عليها تركيا … و اكتر من مسئول صرح ان لو استفحل الموضوع عندنا …. هــ نواجه مصيرنا منفردين لأن اوروبا تخلت عننا …. و دة نفس اللى عملته النمسا اللى رفضت توسلات ايطاليا بارسال مستلزمات طبية عاجلة بأي سعر.
صربيا بقي طلع رئيس الحكومة هناك بــ يسبّ و يلعن في اوروبا و في الاتحاد الاوروبي كله و اتهمهم انهم كذابين و بيستغلوهم … و انهم في ايام الرخاء بيلزموهم بشراء المنتجات الاوروبية باسعار عالية طمعا في مالهم …. و في وقت الشدة كلهم تخلوا عنهم و رفضوا يبيعوا ليهم مستلزمات طبية و سابوهم يواجهوا مصيرهم منفردين …. و ان الصديق الوحيد الوفي اللى وقف جنبهم هي الصين اللى بعتت معونات و شحنات كبيره هدية بدون تمن.
أما الحاج جونسون فــ بيطلع كل يوم يقول بيانات مرعبة للناس …. و اعلن رسميا انه حياخد استراتيجية Herd Immunity أو مناعة القطيع و هي انى مادام كده كده مش هــ أقدر اعالج الناس و نظامي الصحي هــ ينهار تماما …. يبقي عادي اني اسيب 60% من الشعب يتصاب … و بكده المجتمع كله ياخد مناعة و نستحمل آلاف الوفيات و نخلص من الفيلم ده … و قالهم استعدوا لفقدان أحباؤكم …. و الصحف الانجليزية مش بتقول عليه غير المجنون ….. و NHS البريطانية بنفس ذات نفسها نزلت تعميم قالت فيه لو حد اتصاب يقعد في البيت و مايتصلش بينا و يعمل عزل ذاتي لنفسه …. و لو الوضع اتطور مايروحش مستشفي … يتصل بينا و لما يفضي له مكان هــ نبقى نيجي ناخده ….
أما الأخ ماكرون فطلع يتهم الشعب بالاستهتار و بالتسبب في نشر المرض و ان النظام الصحي على وشك الانهيار …. و قعد يردح لجونسون انه فشل في ضبط الحدود معاه و هدده انه هــ يقفل الحدود و السفر معاه.
كل ده كان بعد ما امريكا فرضت على اللى عايز يرجع من يوهان الصينية انه يدفع 1000 دولار قبل ما يطلع الطياره …. و لسه في المغرب مواطنين امريكان بيصرخوا بقالهم اسبوعين عايزين يروحوا بيوتهم في امريكا …. فالسفاره هناك قالتلهم ممكن نوفر لكم طياره بس اللى معهوش فلوس حاضرة ، يمضي على تعهد انه حيدفع 1400 دولار اول لما يوصل … أما السفاره الانجليزية في الكويت … قالت للإنجليز هناك ماتوجعوش دماغنا … مش فاضيين ليكم …. و اللى معهوش فلوس و عايز يروح ، ممكن يستلف من اي حد او يروح ياخد معونة من بيت الزكاه الكويتي او أي جمعية خيرية هناك … معلش مش فاضيين ليكم.
و الشىء المشترك في كل الدول الاوروبية و امريكا بجلالة قدرها … هى صور المرضي اللى نايمين على الارض في طرقات المستشفيات و في الشوارع و على الأرصفة مستنيين سرير واحد يفضي …. و آلاف المرضي اللى بيموتوا يوميا في بيوتهم و أو اللى بيموتوا بسبب ان مافيش حتي ماسك اوكسجين متوفر ليهم …. ده غير النقص الحاااااد في المستلزمات الطبية المعقمة لدرجة استخدام أكياس القمامة و اللى بيلبسها الأطقم الطبية لانهم مش لاقيين كمامات او ملابس عزل تحميهم …. بخلاف صور أرفف الأكل و المنتجات الغذائية و مناديل التواليت الفارغة بعد هجوم شعوب الدول دي على المحلات بصورة همجية و تفريغها تماما بعد زيادة الأسعار الرهيبة …. و على سبيل المثال … صديق لي بأمريكا إشترى تفاحة الواحدة بــ 4 دولار بعد رفع التجار الأسعار هناك بشكل غير مبرر.
أهو دي جزء صغير من أخلاق الدول المتقدمة و إمكانياتها اللوذعية اللى كنت بتغني على ربابة بالملايكه و اخلاقهم و بتشتم في بلدك …. و احنا مش هــ نقارن و نقول هم عملوا اييه … و بلدك عملت ايه … لان بلدك فعلا دولة أصيلة و شريفه و أظهرت كفائة و شرف مشوفناهوش من حبايب قلبك اللى برة.
إحنا بنقول الكلام ده ليه ؟؟؟ …. إحنا مش بنشمت في حد … لكن بنقولك الوضع اللى المفروض حضرتك حتشوفه بنفسك لو ما اتلمتش في بيتك و أخدت احتياطاتك …. و طبقت فعلا العزل على نفسك …. لان اللى بنشوفه في الشوارع من الاستهتار و الهبل و الاستخفاف و الدم الخفيف … و في دولة عدد سكانها اكتر من 100 مليون …. إحنا داخلين في النفق المظلم….. و المنطقي جدا الأعداد تضرب و تزيد بشكل كبيييير.
إحنا مش بنخوفك …. لكن فعلا لغاية دلوقتي دول كتيرة بتضرب كف على كف و تقول البلد دي عايشة لغاية دلوقتي ازاي !!!! …. و لو ربنا حامينا لغاية دلوقتي .. فــ ده بكرمه و قدرته …. لكن ربنا بياخد النعمة من اللى بــ يفرط فيها.
و لو كانت الصين نجحت في القضاء على المرض باستخدام التكنولوجيا و قدرتها كدولة عظمي … فخللي بالك ان الموضوع ده كان له جانب آخر … إن الصين أرغمت شعبها على الحجر الصحي بالحديد و النار …. و اللى كان بيتمسك في الشارع مكنش له غير عقوبتين … إما الأشغال الشاقة أو الاعدام في نفس اليوم …. مع إلزام أهله بدفع تكاليف سجنة أو تمن الرصاصة اللى أعدم بيها …. و فية الآلاف اللى تم بالفعل إعدامهم .. و ده الكلام اللى قاله المتحدث الإعلامى فى الفيديو اللى نشرناه من يومين ، لما إتكلم عن الإجراءات اللى تم إتخاذها واللى كانت عنيفة وضد حقوق الإنسان .. لكنها جابت نتيجة .. زى ما أميريكا عملت أيام 11 سبتمبر على حد وصفه وكلامه !!
إوعي تفكر أنك لو الدنيا ضربت هــ يكون عندك وقت تعمل فيديو لايف و تقول الحقونا و النظام وحش و اعمل شير و لايك و اعمل هاشتاج و يسقط يسقط … لا أبدا …. لانك هــ تموت انت و اللى بتشير لهم …. و ماحدش حيبقي فاضي ليك يسمعك اصلا و هــ تاخد بالجزمة.
نبوس إديكم … نبوس إديكم خليك في بيتك … و لو خرجت يكون في أضيق الحدود …. إغسل ايدك باستمرار … و تابع موقع وزارة الصحة المصرية و موقع منظمة الصحة العالمية و اللى هــ تلاقي عليها عشرات النصائح الطبية الصحيحة بعيدا عن هرى الفيس و الوصفات اللى هــ توديك و تودينا في داهية.
حافظ على نفسك و حافظ على بلدك …. و بلاش ذعر و مش كل واحد يعطس يجرى عايز يروح مستشفي … ارحم القطاع الصحي لانهم فعلا بيحاربوا عشانك …… و إن شاء الله هــ تعدي على خير.
ربنا يحفظ مصر وشعب مصر من كل شر