28 Mar 2020
فى أزمة كورونا … مصر أنتِ أغلى درة !!
—————————————–
على مدار الأسابيع الماضية فيما يخص أزمة كورونا ، و مع كل اللى بيحصل فى العالم حوالينا … شيئ عجيب لما نيجى نتكلم عن حقائق .. و برغم وضوح الصورة .. فــ يبقى الترجمة لكلامنا عند البعض ، إننا بــ نتشفى فى الأخرين و بــ نشمت فيهم !!
شيئ عجيب ، وبرغم وضوح الصورة .. لما تكون بــ تشاور على الشيئ الإيجابى و تفخر بيه ، و بــ تحاول تصلح تشوهات فكرية ترسخت على مدار عقود طويلة ، إنك تلاقى اللى يقولك .. لأ لأ .. هو إحنا وحشين بس إنتم مش شايفين حاجة !!!
شيئ عجيب إنه مع وضوح الصورة الحالية ، تلاقى الشخص من دوول بــ يمنح الغرب كل الأعذار والمبررات لكل اللى بيحصل فيهم ومنهم .. لكنه بــ يذبح بلده بمنتهى القسوة ، و بسكينة تلمة ، مع أى تصرف سيئ ، أو خطأ بيحصل من أى مسئول سواء كبير أو صغير .. أو حتى ظاهرة سلبية من ناس عاديين لا ترقى إلى إنها تكون ظاهرة مجتمعية .. وتلاقيه بيهاجم بلده وجيشه ومجتمعه كله ، بدون ما يدّى لنفسه الفرصة إن يركز فى حاجات إيجابية تانية كتيرة مش موجودة فى المجتمعات الأخرى !
ياعم إنت مش وحش .. والله العظيم إنت كويس .. عندك سلبيات صحيح .. زيك زى أى حد تانى .. بس إنت كويس .. وكويس جدا كمان ، مقارنة بدول تانية كتيرة .. و دول كبرى كمان … والصورة واضحة قدام عنيك أهى ، مش محتاجة زواق … فيبقى الرد … لأ لأ .. أنا وحش .. و لو سمحت ماتضحكش عليا … أنا من صغرى فاهم إنى وحش وفاشل ، فلو سمحت سيبنى فى حالى و ماتغيرش قناعتى !!
أزمة كورونا العالمية حطمت كل التابوهات اللى كان بيرددها الإخوان واليسارجية على مدار سنين ، وكشفت وفضحت كل الأكاذيب عن الغرب المتحضر والمجتمعات المتحضرة ، والحكومات اللى بتشتغل عند الشعب ، والدول اللى بتحرك أساطيلها من أجلك .. والأنظمة الصحية السوبر .. والعيشة الرغدة اللى ببلاش .. ونظام الشغل اللى بيقبضك ألوفات كل شهر .. و كل حاجة ببلاش … و .. و .. و …مئات من الأكاذيب اللى تم بثها فى الوعى الجمعى للمصريين ، لحد ما ترسخت فى اللاوعى .. واصبحت قناعة راسخة .. مجرد محاولة الإقتراب منها ، يدخلك فى دايرة من الإتهامات بإنك مطبلاتى وأمنجى ولجنة .. و أقل تهمة ممكن تتوجهلك بأدب يعنى .. إنك مغيب ومش فاهم حاجة وبتتفرج على أحمد موسى 😅😅
منذ بداية الأزمة ..
– شوفنا بعنينا ، شعوب بــ تعمل هجوم على منافذ بيع السلع ، و بــ تشيل وتحمل وتشترى كل اللى تقدر عليه .. وشوفنا بعنينا إزاى أرفف المحلات والهايبرات الكبيرة أصبحت فارغة .. و ده ماحصلش فى مصر .. بس إحنا شعب وحش ومتخلف مقارنة بالشعوب الأخرى
– شوفنا بعنينا فى دول كبرى متحضرة ، إزاى الناس إقتحتمت منافذ السلع الغذائية وسرقتها فى فوضى مدمرة .. و ده ماحصلش فى مصر بس إحنا وحشين ومتخلفين وشعب عايز قنبلة ذرية تقضى عليه علشان نبتدى على نظافة
– شوفنا بعنينا دول أغنى مننا باضعاف .. والإحتياطى النقدى بتاعها أضعاف الإحتياطى المصرى .. و مع ذلك .. إحتياطى السلع نفذ من السوق .. والخدمات إنهارت وملم تتحمل الضغط عليها .. و ده ماحصلش فى مصر … حتى فى عز أزمتنا فى 2014 وانت طالع .. و فى عز إنهيار وتوقف إمدادات العملة الأجنبية
– شوفنا بعنينا دول كبرى ، إتقال عليها إنها عندها أفضل أنظمة صحية فى الدنيا بتاخد إجراءات بطيئة ومغير مدروسة ولا علمية ، نتج عنها نتائج كارثية .. ولما مصر كانت مبادرة ، و أخدت نفس الإجراءات اللى كانت الدول دى مفروض إنها تاخدها .. إتقال إننا ماعملناش حاجة ، وإنها ماشية بالبركة و بــ فضل دعاء الوالدين
– شوفنا بعنينا دول كبرى ديموقراطية بتاخد إجراءات تتعارض مع كل حقوق الإنسان .. وبتفرض إجراءات قسرية لحماية الناس .. فى حين إن مصر الدولة القمعية بتاعة حكم العسكر ماعملتش كدة .. وأخدت إجراءات تصاعدية تتناسب مع المستوى التصاعدى للأزمة .. بس إحنا اللى دولة قمعية وضد حقوق الإنسان
– شوفنا بعنينا فى الأزمة دى شاب عنده 17 سنه توفى بفايرس كورونا لرفض المستشفى استقباله عشان ماعهوش بطاقة تامين صحى .. وإعلامهم اللى قال كدة مش إحنا … و مش كدة وبس .. لكن فيه رئيس وزراء دولة ، قال لمواطنيه اللى يجيله كورونا يقعد فى بيته مع نفسه ربنا يتولاه ، ومايتصلش بالمستشفى غير لو حالته خطيرة .. فى حين إن مصر عالجت 5 مليون مواطن من فيروس سى ببلاش .. ووفرت الكشف والعلاج فى حملة 100 مليون صحة لكل مرضى الأمراض السارية .. وقضت على قوائم الإنتظار للعمليات الحرجة .. اللى وصلت فى بعض الدول لعام وإتنين وتلاتة من الإنتظار .. يعنى يكون ربنا إتولاك برحمته … بس برضوا هم كويسين ومصر هى اللى وحشة ودولة فاشلة
– شوفنا دول كبرى قالت إنها بتحرك أساطيلها من أجل المواطن بتاعها .. ووقت الجد ، قالت للمواطن ده “إدفع يا بلدينا علشان نرجعّك” .. فى حين إن مصر اللى مابتعملش لنفسها دعاية ولا تطبيل .. لما قالت مسافة السكة .. وقت الجد .. حركت أساطيل طيارنها بالفعل لمساعدة المصريين العالقين فى دول كتيرة .. ورجعتهم ببلاش .. والحجر الصحى ببلاش لحد تمام الشفاء …. بس برضوا إحنا وحشين و دولة فاشلة
– شوفنا أعظم دولة فى العالم بــ تأمم القطاع الخاص وتجند كل موارده لمواجهة الوضع الإستثنائى ده و بتكمم الإعلام علشان يقف مع البلد .. فى حين إن مصر كانت بــ تمر بوضع إستثنائى لمدة 6 سنوات بتحارب فيه منتخب العالم للإرهاب ، وبتحارب قنوات إعلامية بتهاجم مصر على مدار الساعة .. لكن مصر ماعملتش زيهم .. بس برضوا مصر اللى وحشة ودولة فاشلة
– شوفنا جيوش العالم بتنتشر فى الدول دى ، وبتبنى مستشفيات وبتخيط كمامات ، وتحول إقتصاد الدول لإقتصاد حرب تقشفى لمواجهة الأزمة .. فى حين إن مصر قعدت سنين فى أزمة إقتصادية وعملية إصلاح أقتصادى ، والجيش حاطط نفسه تحت جزمة الشعب على حد وصف رئيس الدولة نفسه .. وماحولناش إقتصاد بلدنا لإقتصاد حرب تقشفى وكانت كل السلع متوفرة وموجودة … لكن جيوش الدول التانية عظيمة .. والجيش المصرى وحش وشرير و هــ يودى البلد فى داهية
لو قعدنا نعدد ونقول ، صدقونى مش هنخلص ..
والوضع بالفعل على عينك ياتاجر ..
. أصدقاء كتير أقرو صحة كلامنا ده بتعليقاتهم .. وعايشين فى أكثر من دولة
لكن نعمل إييه بس فى اللى عماد مأكدلهم دوول !! 😏
الله يحرقك يا عماد إنت وتأكيدك ، واللى انت مأكدلهم ومصدقينك 🤔
المشكلة بجد انك تلاقي واحد لعشرات السنين كان مستمتع او على الاقل ساكت و راضى بكل التهم اللى بــ يتم القاؤها على بلده بالاكاذيب الخاصة بالغرب …. و لما اتفضحت الاكاذيب …. ضميره نقح عليه و بيقول يا كماحة عيب تشمتوا في غيركم …. انتوا تطولوا تعيشوا العيشة بتاعتهم …. طب كانت فين اخلاقك دى و انت سامع الكذب لعشرات السنين على بلدك ؟؟؟
و احنا مش بنشمت …. احنا قولنا حقائق …. هو احنا كذبنا زى ما كنتوا بتعملوا ….
الخلاصة .. إحنا لا شمتانين فى حد .. ولا بــ نتشفى فى حد .. و فى نفس الوقت مابـنقولش إننا أحسن بلد فى الكون … وربنا يحفظنا من اللى أصاب الدول الأخرى علشان لو حصل ، أكيد مش هنفرق عن اللى بيحصل لهم فى حاجة !! …. إييه يافندم .. بتقول إييه !!؟ .. مش هنفرق عنهم … أيوة …. يعنى إحنا لو فى وضعهم ، مش هــ نبقى أحسن منهم .. بس كمان هم مش أحسن مننا فى شيئ
مصر عملت “الهوم ورك” بتاعها صح .. و مشيت زى ما بيقول الكتاب .. ومش أقل من إننا نعطى كل ذى حق حقه .. و ندعى ربنا إنه يحفظ مصر من المصير السيئ .. و من المتربصين … اللى هم كتير الحقيقة 😎
حضرتك بقى مُصّر على وجهة نظرك .. و مش عايز حد يغير قناعاتك ويحطم التابوهات الخالدة اللى فى ذهنك .. برغم إن القطنة مابتكدبش .. فــ ده براحتك .. لكن كمان ياريت ماتلومناش إننا فخورين ببلدنا .. وشايفين إن مصر لاتقل عن أى دولة فى العالم .. بل تزيد ، لو حطينا فى إعتبارنا فارق الإمكانيات المادية
حفظ الله مصر وجيش وشعب مصر