رسالة طمأنينة من فارس الطاقة الإيجابية !!

07 Apr 2020

رسالة طمأنينة من فارس الطاقة الإيجابية !!
——————————————-

ظهور متميز للرئيس السيسى النهاردة بكامل الحكومة وعلى رأسهم رئيس الوزراء و وزيرة الصحة و وزير النقل وغيرهم من اعضاء أقوى حكومة فى تاريخ مصر .. بالإضافة لقيادات القوات المسلحة المصرية .. علشان يرسلوا رسالة إطمئنان وتحفيز لكل المصريين

كالعادة الرئيس ماسابش حاجة تخص المواطن والوطن وحتى ما له علاقة بنا فى العالم ، وكمان ما يتعلق بالوضع الراهن إلا وإتكلم فيه علشان يزيل أى إلتباس لدى المصريين فيما يخص الوضع الراهن .. وإحنا مش هــ نخوض فى التفاصيل .. لكن هــ نذكر أو هــ نأكد على بعض النقاط السريعة كدة على الماشى 🙂

– المصريين بــ يجنوا النهاردة ثمار كل اللى إتعمل فى الكام سنة اللى فاتوا ، واللى لولاهم ، كان الوضع فى مصر النهاردة هــ يبقى كارثى !

– الدولة المصرية قوية وقادرة على تخطى الأزمة دى … ومافيش حاجة تخوفنا لأننا عندنا حكومة قوية بتتعامل بإحترافية مع الوضع الراهن .. وعندنا جيش قوى ، جاهز للتدخل لو تطلب الأمر ذلك .. لكن بشكل عام الوضع تحت السيطرة .. ولكن كل المطلوب إن المصريين يلتزموا بالإجراءات علشان المرحلة دى تعدى

– مصر بتعلن كل حاجة بمنتهى الشفافية ، وماعندناش حاجة نخبيها .. ولا عندنا سبب يخلينا نخبى .. لأن دى جائحة عالمية .. ومافيش حاجة تكسف فيها .. بل بالعكس .. إحنا لازم نبقى متأكدين إن الدولة بتتحرك بمنتهى الإحترافية والشفافية

– الشرطة المصرية المدنية اللى إتكسرت من 9 سنوات وكان الهدف من إستهدافها وكسرها هو هدف خبيث .. النهاردة هى فى أوج قوتها .. واصبحت قادرة على تنفيذ وإدارة قرارات الحظر دون أى حاجة لنزول الجيش …

– كالعادة هناك من يريد هز ثقتكم فى بلدكم ودولتكم وقيادتكم .. والناس دى معروفين ، ومكشوفين قدامنا .. فــ ياريت مانسمحلهمش إنهم يرجعوا تانى ويعيدوا تدوير نفسهم وسطنا من جديد بشائعاتهم وأكاذيبهم .. لأننا إحنا فقط اللى ممكن نسمح بتسللهم من جديد لمجتمعنا زى ما عملنا زمان .. فــ ياريت مانسمحش تانى بكدة 🤔

– مافيش حاجة قالها أهل الشر إلّا وكذبوا فيها .. وكل عمليات التشكيك والكذب اللى مارسوها على المجتمع خلال الــ 6 سنوات اللى فاتت ثبت مع الوقت كذبها .. فــ ياريت مانديهمش فرصة من تانى

– أعمال التجاوزات فى أى ملف من الملفات شيئ غير مقبول ، والدولة مش هــ تتهاون فيه .. وإوعى حد يفتكر إن الدولة هــ تبقى ملخومة فى موضوع الكورونا ، طافية مكن فى الملفات الأخرى .. بالعكس .. الدولة قائمة وبتتحرك فى كل الملفات الداخلية بالتوازى .. و مش هــ تسمح لحد إنه يستغل الوضع العالمى الحالى علشان يعمل أى تجاوزات

– برغم الظروف الصعبة ، لكن الدولة أخذت حزمة من الإجراءات للمواطن المصرى فى الداخل فى حدود المتاح .. ما أخدتهاش أى دولة من الدول الكبرى مع مواطنيها .. وإحنا شوفنا بعنينا فى الإعلام والسوشيال ميديا .. و ده تقديرا لقيمة مصر والمصريين

– بعد ما كان المصريين بيسألوا الدولة ، إنتى بتودى الفلوس فين .. اصبح المصريين بيسألوا الدولة إنتى بتجيبى الفلوس منين

– إستعراض قوى للجيش المصرى ، والتصريح بإن الجيش مش بس كان قادر يواجه الإرهاب .. لكنه قادر يواجه أى تهديد داخل حدود القطر المصرى ، حتى لو كان التهديد ده فيروس خطير وخبيث .. والجيش جاهز لتقديم أى تضحيات علشان مصر والمصريين يفضلوا بخير

– فرض حظر كامل هو قرار خطير ومخيف ، وتأثيراته كارثية على المواطن ، وعلى الإقتصاد .. فــ سيبكم من اللى بينفخوا فى النار طول الوقت و عايزين يشدوا الفيشة بشكل كامل .. لأننا كمصريين مش هــ نقدر نتحمل تبعات قرار زى ده .. إضافة لكل التضحيات الإقتصادية اللى مصر قامت بيها من بداية ظهور الأزمة عالميا فى يناير الماضى لحد النهاردة

– الموقف الحالى هــ يعدى و مش هــ يستمر .. ولازم شركات القطاع الخاص وكل قطاع السياحة ، يبقى جاهز بأدواته وموظفينه قريب جدا لعودة الأمور لما كانت عليه .. و خصوصا إن دول العالم بدأت تعمل تقدير موقف ، وبقت شايفة إن إستمرار الخسائر الإقتصادية بالشكل ده مش ممكن يستمر ، لأن خطورة الوضع ال راهن على الناس هــ يبقى اقوى واشد من خطورة تأثير فيروس كورونا نفسه

– مصر بخير .. وهــ تفضل بخير .. وقادرة بإذن الله على تخطى الأزمة .. بس أهم شيئ إلتزام المصريين بالقرارات الحالية علشان مانبقاش مضطرين للجوء إلى حزم أخرى من القرارات الأشد قسوة

مصر هــ تعدى بإذن الله 💪✌️
و حفظ الله مصر وشعب مصر

لمتابعة تعليقاتكم