10 Apr 2020
فيرس كرونا … إحنا رايحين على فين !!
—————————————-
الحالات الجديدة معدلها بيزيد …. احنا خلاص عدينا الالف حالة يبقي كده احنا ضعنا ….. مفيش ماسكات في المستشفيات … الحكومة مخبية الحالات عندها جوه و مش بتقول الحقيقة …. نسبة الوفيات عندنا كبيرة …. هو الحظر حيفضل لغاية امتي … اشغالنا واقفة … اقتصادنا رايح فين …. أسئلة كتير بتجيلنا على الخاص و كلام كتير بيتقال …. و عشان نلخص الموضوع زي ما اتعودنا … حنتكلم كلام مباشرحنرد فيه على كل التساؤلات.
س :- هو فعلا فيرس كرونا ده وباء و لا مؤامرة ؟
جـ :- مبدأيا احنا مش في وباء … لان الوباء بيبقي مرض محدود في مدينة او بلد او اقليم …. لكن فيرس كرونا المستجد هو “جائحة عالمية ” … يعني ضارب الكوكب كله … و ممكن واحد اتصاب بيه بينك و بينه 14 ساعة طيران تاني يوم عادي جدا انك تلاقي المرض ده ضارب مدينتك …. الفيرس ده بقي سواء كان ….. طبيعي او تم تصنيعه … او بيتم استخدامه سياسيا و تهويل الاصابات بيه … أو هو صراع بين نظام عالمي قديم و نظام جديد بيتم تكوينه و بيتم تركيع حكومات العالم بيه …. متشغلش نفسك دلوقتي … الحقيقة الوحيدة اللى على الأرض ان فعلا الفيرس في الشارع اللى تحت بيتك مالهوش علاج لغاية دلوقتي و لا مصل … فلازم تاخد حذرك لغاية لما ربنا يبقي يفكها علينا.
س:- طيب احنا حنفضل في الحظر ده قد إيبه … و ممكن على رمضان الدنيا تفك و الجوامع و الكنايس تفتح و نروح المصايف و نرجع نعيش حياتنا طبيعي ؟
جـ :- احنا مش حنضحك على بعض و لا حندفن راسنا في الرمل …. حضرتك دى جائحة عالمية سببها فيرس ممكن يقتلك …. و الحل الوحيد له انه يتم تطعيم حضرتك بيه … و مادام مفيش مصل تم اختراعه … فالوضع ده حيفضل زي ما هو … يعني الحل الوحيد انك تاخد المرض علشان جسمك يكون اجسام مضاده بيه و يتم تحصينك منه زي ما تم تحصينك ضد امراض زي شلل الاطفال و الدرن و السل و غيرها من الأمراض … سواء بقي الفيرس ده دخل جسمك بالحقنة لو تم اختراع المصل …. او انك تصاب بالفعل بالمرض و انت و حظك … يا تبقي من ضمن الـ 95% اللى مش بيموتوا منه أو تكون من نسبة الـ 5% و ربنا يرحمك…. عامة دول العالم شغالة على المصل بكل قوه لكن لو توصلوا للمصل مش حيكون قبل العام القادم….. إلا بقي لو حصلت معجزة ….. و لاحظ اننا بنتكلم على المصل و ليس العلاج.
س:- يعني لو ماتوصلوش لمصل حنفضل محبوسين كده ؟؟؟؟
جـ :- ده صحيح … و لان مفيش دولة في العالم تقدر تقفل مصانعها و مزارعها فترة كبيرة لان ده معناه افلاس و مجاعة فعلية ….. فـ شوفنا دول كتير زي مثلا انجلترا اعلنت بوضوح ان مادام مفيش مصل … يبقي المجتمع كله ياخده و يعمل مناعة طبيعية منه بسياسة “heard immunity” او مناعة القطيع و نخلص بقي من الفيلم الاسود ده … و حتي لو مات مننا 200 او 300 الف و يعيش 60 مليون …. يبقي حمينا المجتمع … لكن الموضوع ده اصطدم بامكانيات المنظومة الطبية اللى انهارت تماما بشكل كارثي في اكثر دول العالم تقدما …. و كلنا شوفنا مهازل … و بقوا في موقف صعب جدا … لا هما عارفين يسيطروا على انتشار المرض … و لا عارفين يوقفوا سقوط آلاف الضحايا يوميا او دعم المنظومة الصحية …. و لا هما عارفين يسيطروا على انهيار الإقتصاد اللى تسبب بخسائر غير مسبوقة حنحتاج سنين عشان نتعافي منها.
س:- طب إحنا فين بقي من الكلام ده ؟
جـ :- شوف يا سيدي … مصر أعدت نفسها كويس جدا جدا للموضوع ده … و مش من اليومين دول ده من زمااااان … اوعي تفكر ان مستشفيات الحجر الصحي اللى انت اتفاجئت بيها دي اتعملت بين يوم و ليلة …. ده فريق الدكاترة و الممرضين اخدوا الدورات التدريبية و المستشفيات تم تجهيزها بالمعايير الدولية الخاصة بمنظمة الصحة العالمية اللى فتشت عليها بدل المرة عشرة ، عشان تجيزها سواء في تجهيزاتها او في معدلات الأمان او في توافر مهمات الوقاية للفريق العامل بها او حتي لتدريب اطقم الاسعاف و توزيع الملابس المناسبة لهم و غيرها من المعايير الكتييييير اللى عشان تتعمل بتاخد وقت و جهد كبييييير …. و اتعمل حساب أسوء السيناريوهات اللى ممكن تخطر على بالك و كيفية مواجهتها طبقا للامكانيات المختلفة.
س:- طب ليه الدولة بتخبي الإصابات … ده انت لو حللت للناس عشوائي حيطلع عندك بتاع مليون مصاب …. و ماتقوليش بيانات منظمة الصحة العالمية لانهم بيقولوا بيانات وزارة الصحة اللى هى اصلا بتخبي؟
جـ:- إصابات اييه اللى الدولة بتخبيها يا عم الحاج … إعقل كده و هدي نفسك لانك بتتكلم على حاجه مش عارفها …. أولا لو حضرتك مصدق إن في مصر مليون مصاب …. فطبقا لإحصائيات منظمة الصحة العالمية كنا لقينا على الأقل 150 الف واحد بيقعوا في الشوارع بيفرفروا …. و بتنقلهم الاسعاف … و اكتر من 50 الف توفوا في غرف الإنعاش …. انت شوفت المنظر ده في الشوارع ؟؟؟ … و لا انت بتتمناه ؟؟؟ … تاني حاجة منظمة الصحة العالمية مقرها الإقليمي في مصر … و ليها مفتشين كتيييير بيشتغلوا على الأرض … و بيلفوا يوميا يفتشوا على مستشفيات العزل و مستشفيات الحميات و الصدر بطول مصر و عرضها …. و أي تحليل بيتعمل لكل حالة بيروح يتعاد داخل معامل منظمة الصحة العالمية … تحليل تحليل و حالة حالة …. يعني الـ 25 الف تحليل اللى مصر عملتهم اتعاد التحليل للعينة داخل معامل المنظمة …. و فيه اشراف كااااامل على كل اجراء بيتم اتخاذه لكل حالة سواء اللى ثبتت ايجابية تحليله …. أو لعشرات الآلاف اللى تم عزلهم احترازيا و تم تسريحهم بعد فترة العزل …. و مفيش فرصة جت لمسؤولين في منظمة الصحة العالمية إلا كان فيه إشادة صريحة بالإجراءات الاحترافية و الكفائة والتعاون التام بين الحكومة المصرية و منظمة الصحة العالمية…. و ده ماشوفناهوش بيحصل لأى دوله زي ما بيحصل مع مصر.
س:- طب ازاي مصر مافيهاش أعداد كبيره زي اللى بنشوفها في تركيا مثلا او اوروبا؟
جـ :- ده له سبب زي ما قلنا ان مصر من أوائل الدول اللى كان عندها خطة مسبقهدة و كانت جاهزة للتطبيق …. و بدأنا في اول فبراير الإجراءات الإحترازية من بدرى جدا و قبل ظهور اول حالة في مصر في 14 فبراير … و بدأنا اجراءات الترصد و الترقب في المطارات و غيرها كتييير من الاجراءات … و ده اللى حد كتيييير جدا من انتشار الحالات.
س:- طب ماهو إحنا عدينا رقم الألف حالة خلاص …. و لييه كانوا بيقولوا ان أهم حاجة الأسبوع الرابع و بعده الخامس …. و ادينا دخلنا في الاسبوع التاسع …… و اييه الجراف اللى في الصورة دي ؟؟؟ ….
جـ :- زي ما قلنا اننا في جائحة عالمية … و المرض ده مش حيمشي غير لما يتم تطعيم الناس منه …. لكن النقطة هنا مش الارقام …. التركيز ماكانش على انك توصل او متوصلش للـ 1000 حالة … لكن كان المهم حتوصل ليها امتي …. و الجراف اللى في الصورة ده بيشرح الوضع …. ان مصر بدأت اول حالة ليها في 14 فبراير …. و قدرنا ننجح حتي الان اننا نكبح جماح خط الزيادة و انه يمشي بخط افقي … و السعودية قدرت تنجح بشكل ما ايضا في كده … طبعا بغض النظر عن عدد السكان …. لكن تركيا مثلا …. بدأت بعدنا بشهر كامل …. لكن الخط طالع بشكل رأسي و فقدت السيطرة تماما زيها زي امريكا و دول اوروبا …. فطول ما معدل الزيادات في حدود الـ 100 او حتي 300 …. فده كويس جدا و حيفضل الخط بتاعنا افقي و مش حيكون فيه ضغط كبير على القطاع الصحي …. و حتتكون المناعة المجتمعية للمرض بشكل بطىء…. يعني الوضع مطمئن جدا.
س:- معدل الوفيات مرتفع جدا ؟
جـ :- الأصل في الموضوع ان معدل الشفاء هو اللى مرتفع و وصل الى 79% من إجمالي الـ (closed cases) و معدل الوفيات وصل الى 21% من إجمالي الـ (closed cases) … و نسبة الوفيات دي هي نفس النسب العالمية طبقا لموقع ال (world meter)…. بخلاف ان النسبة ليها اسباب اجتماعية بإمتياز… لان الناس بتروح للمستشفيات في حالة متأخرة جدا خوفا من تنمر المجتمع عليهم او على اسرهم … فللاسف بيموت كتير منهم قبل او في نفس يوم الوصول للمستشفي .
س:- طب روح شوف المستشفيات … مافيش ماسكات و مستشفيات الحميات مافيهاش ماسك واحد يوحد ربنا …. الدكاتره بتصرخ حرام عليكم؟
جـ :- ده كلام خايب مالناش دعوة بيه … هو نفس كلام خطيبي مجند في الجيش حيوده ليبيا و قاعد يعيط 😊 …… عامة سيبك ان مصر أصلا كانت بتكفي نفسها من الكمامات و مستلزمات الوقاية من مصانع كتير على ارضها و بتصدر الفائض لاوروبا …. و سيبك ان الاحتياطي الاستراتيجي المصري كبير جدا و معندناش اي ازمة فيها …. و سيبك ان لسه بالامس تم افتتاح مصنع كبير باستثمارات صينية في مصر بينتج مليون و ربع كمامة في اليوم الواحد ….. بقي يا مؤمن عايز تفهمني إنك مصدق ان الدولة بتوفر الكمامات يوميا للبنوك و عمال المترو و السكك الحديدية و المواصلات العامة و غيرها من المواقع اللى فيها اختلاط بالجمهور … و مش عارفة توفر كمامات لدكتور شغال في مستشفي ؟؟؟؟ … طب يعني المستشفيات دي وقفت عمليات خالص و لا الدكاترة بيخشوا و هما حاطين اديهم على بقهم ؟؟؟ …. ده حتي دكتور خروف كان منزل فيديو بيعيط فيها ان يا عيني مش لاقي الكمامة … تاني يوم راحت لجنة تفتش لقت في مخازن المستشفي مهمات وقاية تكفيهم سنة لقدام …. من الاخر …. ده كلام خايب مايتردش عليه.
س:- طب إحنا حالنا واقف …. نعمل حظر كامل و نخلص؟
جـ:- مفيش حاجة اسمها حظر كامل … لان لو ده حصل مش حتلاقي علبة جبنة او كيس مكرونة في اي سوبر ماركت و الناس فعليا حتموت من الجوع سواء معاها فلوس او معهاش …. و الدولة المصرية مش حتلاقي فلوس تدفع مرتبات للناس او حتي تصرف على محطات الكهرباء و المياه اللى انت بتستخدمهم في البيت …. لكن عايزين بقي نصارح نفسنا بحاجة مهمة … اننا النهاردة عرفنا و تأكدنا ان اكتر ناس مضرورة من الوضع ده هم اللى فاتحين القهاوي و السايبرات و بتوع التكاتك و اي نشاط اقتصادي غير انتاجي … و ان الناس الاقل ضرراً هم اصحاب الأنشطة الإنتاجية اللى الدولة بتشجعها على العمل و عدم الاغلاق …. فدائما و ابدا الأقل ضرراً هو صاحب الصنعة و الحرفة و اللى بيشتغل بإيده …. أما أنشطة الهمبكة و الفهلوة هم اول ناس بتتفرم في الظروف الصعبة.
ربنا يحفظ مصر و تحياتنا