11 Jun 2020
عندما يستأسد الأغا .. !!
————————-
النوعية اللى إحنا ناشرينها دى من الأخبار بتوضح حقيقة الوضع على الأرض عامل إزاى ، حتى وإن بدى عكس ذلك بسبب حالة التعمية الإعلامية … والجميل فى الموضوع إن التصريحات الواردة عن تركيا ، خارجة من إعلامهم هم .. إعلام الجزيرة ..
الأغا بعد ما كان مستأسد ، وبيقولك مش هــ نتراجع غير بعد دخول سرت .. لأن سرت مهمة لينا ، لأن فيها بترول .. فجأة كدة اللهجة إتغيرت ..
فجأة كدة بقى بيردد نفس الكلام اللى قالته مصر فى المبادرة ، إنه الحل العسكرى ماينفعش فى ليبيا
فجأة كدة أصبح الأفضل لمصر إنها تتعاون مع تركيا ولا تتجاهلها .. بتقول إييه يا أووستاااذ .. أاه والله زمبؤلك كدة .. بيعترف رسميا إن مصر مش معبراه ، وسايباه يـهاوهاو مع نفسه 😁
طب كل ده لييه بقى !؟
مالناش دعوة بإن بيانات التأييد نزلت ترف من كل القوى العالمية الكبرى بمجرد إطلاق المبادرة المصرية ، وكأنهم كلهم بينقطوا فى فرح 🙂
مالناش دعوة بتصريحات البيت الأبيض اللى بتقول ناقشنا مع الرئيس المصري سبل خروج (جميع) القوات الأجنبية من ليبيا و العودة لمفاوضات 5+5 😉
ماناش دعوة بكل اللى شعر راسه وقف ، وقعد يلطم ويندب ، بمجرد ظهور فيديوهات على السوشيال ميديا لكام شاحنة شايلة كام دبابة مصرية ، وبتتحرك ناحية الحدود الغربية !
مالناش دعوة بالطيارات الرافال اللى تاية فى سماء ليبيا ، واللى كله بيقول إنه مالوش دعوة بيها ، واللى ضربت قوات أردوغان ومليشياته فى ليبيا ، فيما حول سرت وحتى مصراتة !
مالناش دعوة بكلام الجيش الليبى عن ضرب كتيبة مدفعية ورتل شاحنات عسكرية تابعة للمليشيات الأردوغانية ، وقتل مئات العناصر وقتل 8 ضباط وجنود أتراك 😈
مالناش دعوة بالمتداول عن إستهداف و تدمير غرفة العمليات التركية فى مصراتة .. وتراجع كامل لقوات الوفاق التابعه للسراج 90 كم غرب سرت بعد ماكانوا على مشارف المدينة
مالناش دعوة بأخبار ترسيم اليونان لحدودها البحرية مع إيطاليا ، ولا قرب توقيع إتفاقية الترسيم مع مصر !
مالناش دعوة بسفينة الشحن التركية المحملة بالإسلحة ، واللى تم أسرها فى البحر وإقتيادها لليونان
كل الكلام ده مالناش دعوة بيه ، ومصر دولة جميلة وكيوت وماشية جنب الحيط .. لكن الواضح دلوقتى إن لهجة أردوغان وعنتريته بعد نهاية الــ 48 ساعة التمهيد لبدء الهدنة تنفيذا للمبادرة المصرية ، إتغيرت تماما لسبب ما .. وبقت على طريقة “يا دكتور ، أنا مش أنا” بصوت الفنان محمود عبد العزيز فى فيلم “جرى الوحوش”
مصر مش بتحارب .. ولا عايزة تحارب .. ولا فى نيتها إنها تحارب .. لكن لو كان من الحرب بد ، فمن العار أن تصمت مصر .. بس كله بحسابه .. لأنه زى ما قولنا قبل كدة .. الموضوع مش عنتريات ..
مصر بتتحرك بفهم لكيفية إدارة الحلبة فى إطار من الصمت والصبر الإستراتيجى .. والفعل اللى بــ يؤدى إلى نتائج .. سواء عرفنا باللى بيتعمل ، أو ماعرفناش