تحذير .. !!

22 Jun 2020

تحذير .. !!
————

بما ان الكلام بقى على صدام عسكرى .. وسواء ده حصل أو ماحصلش … و لو حصل هل هيبقى بشكل معلن والا لأ … فلازم نبقى فاهمين اننا داخلين على حرب شائعات مالهاش أول من اخر … و بدأت امبارح بموضوع ان حكومة الوفاق قبضت على 19 مصرى علشان تلوى ذراع مصر .. وانتشر الخبر على مواقع كتيرة ، وتم تداوله فى الإعلام .. وإتقال ان مصر طلعت بيان .. وبعدين كل ده طلع فشنك !!

يعنى اخبار من نوعية “انا خطيبى ودعنى وراح ليبيا ومات هناك” .. و “انا اخويا شاب زى الورد سافر يحارب فى ليبيا ورجع جثة” .. و “انا ابن عمى بيقوللى اننا بنترمى فى الصحراء من غير حماية” .. و اصل جوز بنت عمة خالة ابويا أكدلى ان فيه كتائب مصرية بيتم إبادتها فى ليبيا .. و اصل المصدر الفلانى والموقع العلانى بيقول انه تم إسقاط عشرتاشر طيارة مصرية فوق مصراتة وسرت … و ياعينى يا ليلى الجيش المصرى بيقتل المدنيين فى ليبيا … الخ الخ الخ .. كل دى اخبار مالناش دعوة بيها .. ولا نعيرها أى اهتمام …… خليك تقيل …

مصادرنا هى البيانات الرسمية فقط …

جنرالات العالم الافتراضى يمتنعون …

خبراء الفيس بؤس إللى بيقعدوا يتحفونا بأراءهم اللوذعية من داخل غرف عمليات الفيسبوك فى بيتهم .. ياريت يرحمونا شوية .. ماحدش والله فى القنوات الفضائية هيبعت يستضيفك لأنك مجرد شخص فتّاى ..

مش كل واحد حفظ اسم سلاح و عرف خواص قتالية لكام نوع طيارة على كام نوع غواصة من على النت ، أصبح كدة خبير عسكرى …. حضرتك تنقطنا بسكاتك ..

نظام الصعبانيات ، و أصل أنا من حقى اقول رأيي .. و اصل احنا من حقنا نعرف إللى بيحصل فى ليبيا اييه … الكلام ده تروح تقوله فى القسم حضرتك …… مافيش حاجة اسمها من حقك تعرف و فيه عمليات عسكرية شغالة …

لازم تبقى عارف إن مصر بتحمى امنها القومى .. يعنى بتحمى امنك و أمن اولادك .. بتحمى مستقبلك .. بتحمى لقمة عيشك … يعنى إللى بيتعمل ده مش رفاهية … واللى يلبسلك وش اللؤم ويقولك هو انت مش فاكر إللى حصل فى 67 .. قوله لأ … انا فاكر إللى حصل فى 73 يا حيلتها ..

شغل كربلائيات وشحتفة من نوعية هم اولادنا ذنبهم اييه علشان يموتوا فى ليبيا … إللى بيقول كدة هو نفسه إللى كان بيسخنك على بلدك قبل كدة ويقولك هو الجيش لييه مايروحش يضرب فى ليبيا ويضرب السد فى اثيوبيا … و هو نفسه إللى كان بيتريأ قبل كدة ويقولك.. رائد مقاتل خط الجمبرى … طب أهو دلوقتى عندنا رائد مقاتل خط نفخ الأتراك والخرفان يا حيلتها تانى ..

الجبهة الداخلية مهمة جدا … فماتسمحش لنفسك انك تكون مجرد اداة فى ايد إللى عايز يضرب جيشك فى ظهره و يهز أمن بلدك و إستقرارها ..

ماتقلقش على جيشك و لا تخاف على بلدك … مصر قوية .. وجيشها قادر وقاهر .. و إيده تقيلة … والنبى خاف انت بس من نفسك و من إللى بتعمله فى ناسك ، لما بتكون مجرد بوق لبث الخوف والذعر فى إللى حواليك

اما إللى واثقين فى بلدهم .. وعارفين انها لما بتتحرك يبقى لازم تخلّص .. فياريت ماتنسوش الفشار … علشان تتفرجوا وتستمتعوا بأداء مصر …. سلماً … أو حرباً …

بس احنا اللى بنحب الطيب أحسن .. علشان الوش التانى اصله بيزعّل 🙂

حفظ الله مصر وشعب مصر

لمتابعة تعليقاتكم