جهاز كشف الوَلوَلة

 20 May 2015

 جهاز كشف الوَلوَلة

——————–

طبعاً بما إننا عايشين فى مصر .. وبما إننا أصبح عندنا أطياف وألوان من الأراء .. فــ كان لازم كل واحد يدلو بدلوه فى موضوع تعيين المستشار أحمد الزند وزيراً للعدل خلفاً للمستشار محفوظ صابر !!

النهاردة بقى ، هــ تلاقوا مندبة مفتوحة فى جميع برامج التوك شو .. وطبعاً معظمهم ماشيين على خطى قنوات ومواقع وصفحات الإخوان ، اللى شغّالين وَلوَلة بسبب الموضوع ده .. وتباكى على مستقبل مصر ، وعلى العدل اللى مضى زمانه  .. ومستقبل أولادنا اللى ضاع ، وإنهم عمرهم ما هــ يتعينوا فى القضاء .. و .. و .. و .. و كل الهرى ده بالرغم من إن الحكاية مش كدة خالص ..

طب أمّال إييه الحكاية !!؟؟

الحكاية كلها إن تعيين وزير العدل الجديد هى قصة سعر كيلو البامية بتاع النهاردة 🙂  .. ماهو أصل لازم يبقى كل يوم فيه قصة ، علشان الكولّجية وإعلام السبوبة يعرفوا يشتغلوا وياكلوا عيش .. و بــ ينسوا أو بــ يتناسوا إنهم ماشيين وراء نعيق الإخوان اللى مش طايقين نفسهم بسبب إن المستشار أحمد الزند كان أحد الأعمدة الصلبة اللى وقفت أمام طغيان وفاشية الإخوان فى عز جبروتهم وتحكمهم فى الدولة .. وخصوصاً بعد الإعلان الدستورى الشهير بتاع مرسى ، بالإضافة لمخطط التمكين ومحاولات إختراق المؤسسات السيادية فى مصر واللى من ضمنهم مؤسسة القضاء .. وأحب أفكركم بحركة قضاة من أجل مصر الإخوانية … بس للأسف إحنا بــ ننسى !!

الشئ المهم بقى هو إن فيه ناس كتيرة قوى لعبت على وعى الناس .. فــ تلاقى مثلا جريدة زى جريدة الوطن منزّلين إستقصاء عن “هل أنت راضى عن إختيار احمد الزند وزيراً للعدل” .. وحاطين الإختيارات (نعم / لأ / لا أهتم) .. بس الذيذ بقى إنهم حاطّين المؤشر بتاع “نعم” باللون الأحمر .. و دى عملية نفسية سيكولوجية باللعب على علاقة الألوان بالسيكولوجية النفسية عند اللى هــ يشترك فى الإستقصاء علشان يعطى نوع من الإشعار التحذيرى لو حد عايز يقول نعم .. !! ..

لكن الشئ الأهم هو إن معظم اللى بــ يتكلموا النهاردة بــ يلعبوا على جهل الناس بالصلاحيات الفعلية لمنصب وزير العدل .. 🙂

طب إييه هى صلاحيات وزير العدل

إنت يا كابتن تعرف إييه هى صلاحيات وزير العدل !!؟

طب الأستاذ اللى زعلان و متنرفز هناك تعرف !!؟

طب الأخ الثورى اللى عمال بــ يزعّق على جنب ده .. تعرف !!؟؟

طب الأخت اللى بتعيّط على مصير العدل فى مصر .. تعرفى !!؟؟

طب طلبة كلية الحقوق ياترى تعرفوا !!؟؟ وإلّا انتم معانا إنتساب مش إنتظام .. وإلّا إييه بالضبط !!؟؟

صلاحيات وزير العدل وفقاً لقانون السلطة القضائية يا أساتذة .. إختصاراً  كدة وعلشان ما نرغيش كتير ، فى المجمل كلها صلاحيات إدارية ، وكلها متعلقة بالقضاة وليس بالقضاء .. زى مثلاً إنه مشرف على التكييف القانونى للموازنة المالية للسلطة القضائية .. وندب القاضي مؤقتا للقيام بأعمال قضائية غير عمله .. و إصدار قرار بقبول استقالة القاضي .. و دعوة مجلس القضاء الأعلى للانعقاد عند الضرورة .. و الإشراف الإداري على جميع المحاكم .. و صلاحية الطلب من النائب العام بإقامة الدعوى التأديبية ضد احد القضاة .. و الطلب من أحد قضاة المحكمة العليا بإجراء تحقيق مع أحد القضاة قبل إقامة الدعوى التأديبية بحقه .. و الطلب من مجلس القضاء الأعلى بوقف القاضي عن مباشرة أعمال وظيفته أثناء إجراءات التحقيق عن جريمة منسوب إليه ارتكابها .. و حضور أداء النائب العام لليمين أمام الرئيس .. و يقوم أعضاء النيابة العامة بأداء اليمن أمام وزير العدل وبحضور النائب العام .. و يقوم بتعيين مكان عمل أعضاء النيابة ونقلهم خارج دائرة المحكمة .. و إصدار القرار الخاص بتشكيل المجلس الأعلى للقضاء …. ألخ

يعنى كلها أعمال إدارية والمنصب يعتبر منصب شرفى مالوش علاقة بسير العدالة 🙂

للأسف إن فيه ناس لسة بتصدق لغاية دلوقتى إعلام السبوبة و إشاعات الاخوان .. زى ما صدقوه زمان وأخدوا موقف من المستشار الزند على الاساس ده .. وللأسف برضوا إن الناس صدقت اللى بيتكلموا على إن السيسى أخطأ فى إنه بيسمع لكلام مستشاريه .. وإنه وافقهم على تعيين المستشار الزند !!

ياحبيبى انت وهو .. السيسى كان رئيس المخابرات الحربية أيام ما كان الزند رئيس نادى القضاة .. يعنى من الأخر كدة عارف كويس قوى هو بــ يعيّن مين فين .. فــ معلش الله يخليك ماتعملش فالح وفاهم أكتر من الأجهزة الأمنية ومن رئيس الدولة .. 🙂

وخليكم فاكرين إن الناس اللى بتتكلم عن وزير العدل دلوقتى ، هى نفس الناس اللى هاجمت تعيين وزير الخارجية و وزير الداخلية .. واللى الإتنين دلوقتى عاملين أكبر قلق لأعداء مصر وأذنابهم فى الداخل والخارج 🙂 🙂

إختلف مع المستشار الزند كما تشاء .. وإغضب كما تشاء .. وكن على يقين إنك من حقك تعبر عن رأيك ووجهة نظرك وتدافع عنها .. لكن لازم يكون رأيك من دماغك ، و مبنى على حقائق .. مش علشان بــ تاخد رأيك من خلال الموقع الفلانى، أو من الإعلامى الفلانى !!

اللهم أرنا الحق حقاً وأرزقنا إتباعه ، و أرنا الباطل باطلاً وأرزقنا إجتنابه.

لمتابعة تعليقاتكم