08 Jul 2020
للخيانة عنوان …. !!
——————–
من 7 سنوات تقريبا .. و كل يوم يمر على مصر .. بتوضيح الصورة أكثر وأكثر (للى عايز يشوف طبعا) .. و بتظهر على حقيقتها … عملا بالمبدأ الشهير “تستطيع أن تخدع بعض الناس كل الوقت .. وتستطيع أن تخدع كل الناس بعض الوقت … ولكنك لن تستطيع ابداً أن تخدع كل الناس كل الوقت”.
كلاب الاخوان من خونة الأوطان و أبواقهم الدعائية .. طول الوقت بيحاولوا يكسروا فى أى إنجاز انت بتعمله .. سواء على المستوى الاقتصادى أو السياسى أو الاجتماعى أو العسكرى أو على مستوى أى ملف من الملفات حتى لو كان عمل فنى.
ولأنهم مش بيشتغلوا كدة اعتباطاً .. لكن فيه أجهزة هى إللى بتشغلهم وبترسم لهم الطريق و بتعرفهم يقولوا اييه ، و مايقولوش اييه ، ف دايما بيكون كلامهم متركز على الوعى الجمعى المصرى لخلق حالة عداء بين المصريين و بين التحضيرات أو الخطوات إللى بتخطيها الدولة المصرية برؤية مستقبلية لحماية الدولة و مكتسباتها .. حتى لو كان إللى اتعمل ده إجراء بسيط زى افتتاح طريق أو كوبرى وصولا لإنشاء قاعدة عسكرية فى مكان ما من أرض مصر من أجل حمايتها وحماية أمنها.
و لأن التحركات المصرية والبناء اللى بتعمله الادارة المصرية فى كل الملفات ، مايفهمش معناه و لا يفهم الهدف منه غير أجهزة استخبارات و تنظيمات وخبراء دوليين ، هم بس إللى لهم القدرة على فهم أبعاد هذه التحركات والرؤية إللى بتتحرك الدولة من خلالها .. وتأثير ده على مخططاتهم سواء بالنسبة لمصر أو بالنسبة للمنطقة .. حتى لو كان التحرك ده لسة هيبان تأثيره بعد سنوات .. فيبقى مافيش قدامهم غير انهم يطلقوا كلابهم للعواء على ما تفعله الدولة المصرية ، و محاولة شحن الناس من أجل اجهاضه … و ده بيأكد انهم مش بيتكلموا من نفسهم ، لكن فيه أجهزة بتحركهم .. وبترسم لهم الطريق … و كله بالفلوس .. 😉🙂
كانوا بيضربوا فى قاعدة محمد نجيب العسكرية ، وبيشككوا فى جدواها .. و بيشككوك فى الرؤية المصرية .. وبيلعبوا على المظلومية الاجتماعية .. ويقولك بيعمل قاعدة و بيشترى سلاح لييه .. مش كان أحسن جاب للغلابة حلبسة و سندوتشات حلاوة بالقشطة …… و كل ده هو فى الحقيقة بيضحك عليك وبيشتغل لحساب إللى مشغله وبيدفعله علشان يخون بلده وعلشان يضحك عليك و يزيف وعيك 😏
وبعد سنين أهو .. أدينا شايفين الكلام اتغير ازاى … و شايفين قوافل الارباك المعنوى والتطبيل الاعلامى بتتحرك إزاى .. وبتقول إييه .. لأنهم من الاساس ماكانوش عايزين الموضوع يوصل للنقطة دى .. كانوا عايزينك تهد بإيديك أسباب تفوقك .. علشان الموضوع مايوصلش لنقطة المواجهة … علشان يقدر يقنعك ان جيشك هو جيش المكرونة والجمبرى … رغم انهم عارفين كويس أكثر منك.. ويمكن واثقين أكثر منك فى قوة جيشك 🙄
مش كدة و بس … هم كانوا طول الوقت بيحاولوا يجملوا الصورة ، و يرتدوا قدامك مسوح الضأن .. و بيقنعوك انهم وطنيين .. و بيحبوك .. و بيحبوا البلد وخايفين عليها .. و مش عايزين يوصلوا للمرحلة إللى يتكشفوا فيها قدامك … لكن خلاص بقى ما بدهاش … و خصوصا أنه فيه إللى راح معاهم فى سكة إللى يروح و مايرجعش .. وبقى مصدق كلامهم و مقتنع بيه ، و بيلاقى له المبرر مهما كان 🤔
كان زمان بيقنعك طول الوقت انه “مع مصر ولكن” … و كنا بنقول الكلام ده غلط و دوول خونة … لكن دلوقتى خلاص بقوا بيستهجنوا علناً انهم ممكن يبقوا مع مصر … و بيقولوا علناً انهم مع تركيا و واقفين معاها و مؤيدين ليها ضد مصر
كان زمان بيقنعك ان الاخوان دوول بتوع ربنا وكيوت .. و إنهم فصيل معتدل .. و مالهمش دعوة بالعنف ولا بحمل السلاح … و إنه والله ما أنا دى أوختشى منى 😎 … و كنا بنقول ان ده كذب .. وإن حقيقة الاخوان غير كدة .. و إن الاخوان هم المفرخة الرئيسية لكل التنظيمات الجهادية .. و إن الفكر التكفيرى خرج من فكر الاخوان إللى منهجه هى تعاليم سيد قطب …. لكن دلوقتى خلاص بقوا بيقولوا علناّ ان كتائب الاخوان بتتحرك على الأرض .. كتائب الاخوان بتحمل السلاح .. كتائب الاخوان بتقاتل فى ليبيا وسوريا .. كتائب الاخوان بتدعم جيش الاغا العثمانلى ….
فيديو فاضح بيقول و يؤكد إن أوراق التوت مازالت تتساقط تباعاً .. و بتكشف الزيف إللى عشش حوالينا … و كان هيضيّع مننا بلدنا .. لولا فضل الله علينا .. ثم جيشنا وقيادتنا الحكيمة …. و حط فى اعتبارك دايما .. انك لو لم تكن فى المقدمة ، ولو لم تكن متفوقاً .. لما نبحت عليك الكلاب 💪😎
حفظ الله مصر .. وشعب مصر