18 Jul 2020
ليبيا – تركيا و الحرب النفسية (هام جدا) !!
—————————————-
في ظل تسارع الأحداث في المنطقة … و إقتراب المواجهة الصفرية لتدمير الجنس العربي …. و التي نجحت في معظم منطقتنا العربية حتي إستفاق الشعب المصري و تذكر دوره التاريخي الذي يقوم به على مدي التاريخ لحماية نفسه ، و المنطقة كلها و يعيد و يكرر ما يفعلة تاريخيا مع قوى الشر و يوقف الهجمات البربرية و يحبطها …. ثم يستنفر جيشه ليقوم بالمعركة الفاصلة التى تنهي هذا الشر الذي يحرق الأخضر و اليابس.
ما نعيشه و نشاهده الآن هو تأكيد على أن دائما التاريخ بــ يعيد نفسه من أول الحيثيين الى التتار و المغول و الصليبيين و محاولات تقويض الإحتلال العثماني على يد محمد على و الاحتلال الغربي على يد عبد الناصر.
و لأننا دخلنا في الجد …. فــ ياريت نركز مع بعض الفترة اللى جاية و اللى هــ نتابع معاكم في سلسلة مقالات قادمة مهمة جدا ، هــ نحاول نشرح فيها الأحداث …. لكن أهم حاجة هــ نركز عليها النهاردة هي الحرب النفسية و اللى هــ تبدأ على عقول الشعب المصري بمنتهي الشراسة .. ده إذا ما كانتش بدأت أصلا …. لأن أهل الشر لا يجيدون غيرها …. و خلينا مانتكلمش كتير و نتكلم في نقاط محددة:-
* ممنوع منعا باتا نشر او مناقشة أي أخبار عسكرية أو اي صور تخص تنقلات الوحدات العسكرية بخلاف ما ينقلة المتحدث الرسمي للقوات المسلحة.
* الأفلام و الفيديوهات و الأخبار المفبركة المضروبة عن سير العمليات إتحضرت خلاص …. أخبار عن إسقاط طائرات ، و إغراق وحدات مصرية ، و تدمير أرتال مدرعة ، و أسر ضباط و جنود مصريين ، كل دى خلاص إتعملت و جاهزة على النشر …. لما تشوفوا الأخبار دي أهملوها تماما.
* هــ تشوفوا فيديوهات قديمة لضرب و تدمير وحدات عسكرية اتصورت في العراق و سوريا و اتعمل عليها مونتاج و إضافة مؤثرات صوتية … و هــ تشوفوا كمان فيديوهات لكومبارس اخوان لابسين جنود مصريين و عاملين إنهم أسرى و بيعيطوا و بيستنجدوا و شوية كلام فارغ …. ده شغل الإخوان اللى هرونا بيه السبع سنين اللى فاتت ….
* هــ تشوفوا أخبار مضروبة من محطات إخبارية أجنبية هــ تنزل في وقت متزامن …. ماتصدقش أي خبر لا إيجابي أو سلبي …. و مش مطلوب منك غير إنك تفتكر اللى حصل في 1 يوليو 2015 لما معظم محطات الأخبار الأجنبية أذاعت أخبار مؤكدة إن داعش إحتلت سيناء و دمرت الجيش المصري و أسرت وحداته و إستولت على سلاحه …. و اللى ظهر بعد كده إن العكس هو الصحيح ….. و إفتكروا إنهم عملوا كده في سيناء اللى جوة مصر …. فما بالك هــ يقولوا إييه عن سير عمليات في ليبيا.
* هــ تلاقوا خرفان و نعاج كتييييير الفترة اللى جاية بــ ينشروا قصص عن خطيبها اللى ماكانش موافق يحارب و رجع في صندوق و اللى هــ يأكد أنه واقف قدام المستشفي و فيه مليون جثة لسة واصلة على عربية ربع نقل و اللى بتصرخ و تقول ولادي الـ 14 اتقتلوا في ليبيا …. و قصص عجيبة … أظن إحنا اتهرينا من الهبل ده سبع سنين بحالهم …. فالكذب و نشر الإشاعات عند الإخوان هو فرض عين و حيستقتلوا في نشره.
* تاني متصدقش و متاخدش أخبار غير من البيانات الرسمية للمتحدث العسكري للجيش المصري.
* الله يرضي عليكم …. ثقافة إستديوهات تحليل ماتشات كرة القدم و إن الحرب لازم تتذاع على الهواء مباشر وإنى من حقى اعرف اللى بيحصل .. و المفروض ينقلوا حضرتك الى غرفة عمليات القيادة العامة للقوات المسلحة دي انساها خالص …. حضرتك ماكنتش بتعرف خطة المدرب بتاع أسمنت أسيوط لما كان بيلاعب غزل المحلة …. فــ حضرتك مش من حقك تعرف خطط و تنقلات و خط سير العمليات العسكرية اللى حضرتك مش بتفهم فيها أصلا….. إهدي كده على نفسك و سيب القادة يشوفوا شغلهم.
* التدريبات العسكرية فيها نسبة خسائر …. و بالتالي أي عمليات عسكرية حقيقية لازم يكون فيها خساير …. اللى واقف على الحدود و هــ يحارب العدو العثمانلي … بــ يدفع ضريبة الدم عشان حضرتك تفضل آمن قاعد على الفوتيه في بيتك تحتسي النيسكافية و سايب عيالك في الشارع في أمان …. مش مطلوب منك غير إنك تدعم جيشك و تثق فيه …. صعبة دي !!؟
* العثمانلي قام بجمع كل الإنكشارية اللى يقدر عليها من حريم السلطان …. سواء من السوريين أو من دول المغرب العربي أو من وسط أسيا من الشيشان و اذربيجان او من الحرس الثورى الإيراني …. بخلاف قواته النظامية …. و الجيش المصري قادر تماما على سحقهم في ليبيا عسكرياً … و ده إحنا متأكدين منه و واثقين تماما فيه …. لكن القلق الحقيقي على قواتنا مش من الأتراك و عبيدهم … القلق الحقيقي أنك تصدق قطيعهم في الداخل و تنشر إشاعاتهم و تقوم بدور في هدم الروح المعنوية للرجاله اللى شايلة سلاح و بتحارب …. إثبت كدة و إوعي تتهز …. آخرهم كلام و إشاعات … و دة شوفناه و جربناه و مش محتاجين نثبت كذبهم.
تاني و للمرة الألف …. مفيش أخبار غير من مصدر واحد … المتحدث الرسمي للقوات المسلحة المصرية .. والدول مش هـ تخبى عننا حاجة …… فياريت بقي نبعد شوية عن اخبار المرضى النفسيين بتوع الصقور اللى مش بينام و الحمام اللى مش بيبيض ….. مش وقتهم خاااالص!
ثقتنا في الجيش المصري لا حدود لها …. و ثقتنا فيكم و في وعي الشعب المصري و جيناته التاريخية بدون حدود …. فأنتم من أوقفتم و أسقطتم أكبر مؤامرة على الجنس العربي في التاريخ …. و أنت تقدر تكمل دورك في الحفاظ على الجبهة الداخلية و تساعد أخوك اللى بيحارب العدو ، عن طريق دعمه معنويا و دعم تماسك الجبهة الداخلية.
حفظ الله مصر .. وشعب مصر