14 Sep 2015
حادث السواح المكسيكيين .. فوقوا يا مصريين 1
————————————————
أثناء قيام قوات مشتركة من الشرطة والقوات المسلحة بملاحقة بعض العناصر الإرهابية في منطقة الواحات بالصحراء الغربية تم التعامل بطريق الخطأ مع أربع سيارات دفع رباعي تبين أنها خاصة بفوج سياحي مكسيكي الجنسية والذين تواجدوا بمنطقة محظور التواجد فيها .. مما أسفر عن وفاة البعض واصابة البعض الاخر من المكسيكيين والمصريين تم نقلهم إلى المستشفيات للعلاج .. وقد تم تشكيل فريق عمل لفحص أسباب وملابسات الحادث ومبررات تواجد الفوج السياحي في المنطقة المشار إليها والمحظور التواجد فيها.
ده كان ببساطة جداً مختصر بيان وتصريحات وزارة الداخلية حول الحادث ..
طب تعالوا كدة نسأل نفسنا أسئلة قبل بس ضغط الدم ما يعلى ، والواحد يفقد أعصابه من شكل وطريقة التعليقات اللى منتشرة فى كل حتة .. وبرضوا للمرة المليون ناس كتيرة أوى بتسقط فى فخ الإعلام ، وتعمل بالضبط اللى مطلوب منها إنها تعمله بسلامة نية !!!!!!!!!!
حد سأل نفسه لييه السياح يركبوا سيارات دفع رباعى من نفس نوعية السيارات اللى بيستعملها الدواعش !!؟؟
حد سأل نفسه لييه ده حصل فى التوقيت ده بالذات بعد الإعلان عن عملية حق الشهيد والنجاح اللى بتحققه العملية على الأرض ، لدرجة إعلان الدواعش على مواقعهم عن فرار كوادر تنظيم بيت المقدس من سيناء بعد عجزهم عن مواجهة الجيش المصرى !!؟؟
حد سأل نفسه لييه الحادثة دى ماحصلتش غير بعد يوم واحد أو أقل ، من إعلان تنظيم الدولة عن تواجدهم فى الصحراء الغربية وإن فيه معارك بينهم وبين الأمن المصرى !!؟؟
يا سادة الموضوع أوضح بكثير من إننا مانفهمش تفاصيله … !!
داعش بتعلن عن تواجدها فى الصحراء الغربية وبتحاول تعمل عمليات على أساس إنها بكدة قال يعنى بتشتت الجيش المصرى على جبهتين وتخفف الضغط على الجبهة الشرقية اللى كلاب النار بــ يتطحنوا فيها بقالهم كام يوم على إعتبار إن الجيش المصرى ده 5 مصفحات ودبابتين و 20 عسكرى شطرنج وهــ يحتاس بقى وكدزة !! 🙂 ..
وبعدين شوف الصدف يا مؤمن .. لما تدخل عربيات دفع رباعى من نفس النوع اللى بيستعمله الإرهابيين فيها سياح أجانب لمنطقة محظورة أمنياً .. وفيها عمليات عسكرية وإشتباكات .. (ده تنظيم الدولة اللى بيقول كدة مش مصر) .. ووزير الدفاع بنفسه كان رايح يعمل تفتيش حرب في المنطقة الغربية .. فالمفروض بقى سواءً كان اللى ضرب هو قوات الأمن البرية أو الدعم الجوى .. إنهم كانوا يسيبوهم لما يقربوا و يوقفوهم ويجيبوا لهم طاقم عصير علشان الحرّ ، ويتصوّروا معاهم سيلفى ، وبعدين يقولوا لهم بعد إذنكم الرُّخص يا كباتشن !!!
وللمرة المشعارف كام !! .. نلاقى إعلام العار بتاعنا يستبق التحقيقات .. والبيانات الرسمية … نقلاً عن وكلات الأنباء الغربية اللى عملت برضوا نفس الكلام .. علشان ما صدقوا إنهم يلاقوا جنازة ويشبعوا فيها لطم !!
بس دى مش جنازة .. ولا محتاجة مننا لطم .. وإحنا كصفحة كلام فى الصميم معترضين تماماً على تصريحات سيادة الوزير لما قال إن التعامل مع الأهداف كان بالخطأ …. لأ يا سيادة الوزير .. ماينفعش تقول كدة .. كان لازم تقول إننا هــ نحقق ونشوف مين المدان فى اللى حصل .. لأن مصر كدولة مش مدانة …. مصر دولة قادرة ، ومش بتخاف من حد .. وإطلاق النار على سيارات بالمواصفات دى وفى منطقة عمليات لازم يكون مقصود ، .. وخصوصاً مع وجود قانون لمنع سيارات الدفع الرباعي انها تمشي في مناطق الصحراء الغربية ، إلّا بتصاريح خاصة … وكمان فيه مناطق محظور التواجد فيها .. يعني ولا تصريح ولا غيره .. فــ من حق الأمن فى الظروف اللى فيها البلد إنه يضرب فى المليان وبدون تحذير فى المناطق اللى زى دى !!
ياترى بقى لو كانت العربيات دى عربيات إرهابيين مفخخة .. ودخلت فى منطقة عسكرية أو كمين أمنى وإتفجرت بكل اللى حواليها .. كان هــ يبقى إييه الموقف دلوقتى !!؟؟ .. مش نفس كذابين الزفة وشمامين الكلة وعبدة ألهة ديموكراتيّة الغرب العزييييم .. كانوا هـ يطلعوا يهاجموا الجيش والشرطة ويقولوا إن ده تقصير أمنى !!!؟؟؟ … مش هو ده اللى حصل فى مجزرة الفرافرة اللى استهدفت مجندين وضباط من قوات حرس الحدود لما فوجئوا بالهجوم عليهم بسيارات دفع رباعي .. وكل الإعلام والكولجية ونخبة النكبة طلعوا يقولوا إن ده كان تقصير أمنى !!؟؟
وللعلم بس .. الأمن الأميريكى من كام سنة قتل طفل عمره سنتين علشان إجتاز الحواجز الأمنية للبيت الأبيض .. والقضاء حَكَم بإن دى غلطة الأم الوحشة الشريرة مش غلطة الأمن .. وتم تبرئة رجال الأمن تماماً على إعتبار إن دى منطقة أمنية محظورة ورجال الأمن بيمارسوا شغلهم ..
أما بقى اللى مش عاجبهم موضع الإستهداف بالخطأ ده .. فأحب أفكرهم برضوا إن جيش الإله هبل العزييييم بتاع أمريكتهم الفزيييعة أعظم جيوش الأرض من وجهة نظرهم .. كانوا بــ يرموا أسلحة على الدواعش فى العراق .. وبعدين يطلعوا يقولوا “أوووووه ، سورى .. رمينا الأسلحة بالخطأ” .. فــ عادى بقى لما جيش الردة يقتل السواح الكفرة بالخطأ برضوا … إعتبروا إنه كان بيعمل صينية مكرونة وشاطت منه فى الفرن =D =D وإلّا إييه يا عم الكولّجى منك له !! 🙂
الخارج خلاص إحنا بقينا فاهمين هم توجهاتهم إييه ، و عايزين يوصلوا لإييه .. حتى لو فيه ناس تانية مش فاهمة .. لكن كلامى للى فى الداخل .. إرحمونا بقى وإرحموا مصر .. وفوقوا من الغيبوبة اللى انتوا فيها دى .. وخدوا بالكم إنتم باللى بتعملوه ده ممكن تودونا على فين !!؟؟ .. والرئيس قالها كلمة للمغيبين واللى عايزين يهدوا الدولة ويشردوا شعبها .. “بــ أقول لهم تانى لو خدتم بالكم كتر خيركم، ما أخدتوش بالكم ، إحنا هــ ناخد بالنا ومش هتقدروا تعملوا حاجة، مش هنسمح لحد أبداً أنه يهد بلدنا أو يشرد شعبها ..
خلص الكلام