حرب التزييف الإعلامي .. حرب بقاء .. !!

24 Jul 2020

حرب التزييف الإعلامي .. حرب بقاء .. !!

—————————————

لو أى حد لسة عنده ذرة شك فى مدى تصاعد الحرب و حجم القذارة اللى وصلت لها الحرب دى بين مصر من جانب ، و الدولتين إياهم ممثلتان للتظيمات الظلامية من جانب أخر .. فــ ياريت يراجع نفسه .. وبالذات عشاق الدونية ، اللى عندهم حساسية من فكرة نظرية المؤامرة .. و أصل هــ يتأمروا علينا على إييه يعنى !! و إحنا عندناةاييه علشان يتأمروا علينا .. وكل الكلام اللذيذ ده !

الموضوع وصل لمرحلة إنهم بيقوموا بتجنيد وتوظيف خلايا من قلب البلد ، كل مهمتهم إنهم يقوموا بإنتاج مقاطع فيديو إخبارية مزيفة بــ تحرض ضد السلطات المصرية ، وبتنشر شائعات ، وبتخرب فى وعى المصريين … وهنا ييجى دور قنواتهم الإعلامية الناطقة باللهجة المصرية واللى بيقوم عليها شوية الخونة إللى حضراتكم عارفينهم ، بالإضافة لقناة الحظيرة اللى بتبث من الكشك المحتل فى الخليج العربى .. إنهم يقوموا بــ بث الفيديوهات دى و الترويج لها إعلاميا على أوسع نطاق من أجل تزييف الوعى الجمعى ، والضرب فى أسس المجتمع المصرى !!

إمبارح أعلنت وزارة الداخلية عن ضبط خلية سرية إرهابية فى إسكندرية … شغلتها إييه بقى الخلية السرية دى !!؟؟ .. شغلتها إنها تنتج فيديوهات مفبركة عن مصر وعن الإدارة المصرية ، و بتنشر شائعات ، فى محاولة تشويه كل وأى إنجاز مصرى ، وقلب كثير من الحقائق بهدف تشويه الوضع الداخلى بشكل عام ، وتشويه الدولة وأجهزتها التنفيذية والأمنية والسيادية بشكل خاص !

وزارة الداخلية عن طريق أجهزة الرصد والمتابعة قدرت تكشف المخطط العدائى اللى بينفذه تنظيم الإخوان الإرهابى، عن طريق رصد قطاع الأمن الوطنى لمعلومات بتقول إن قيادات التنظيم الهاربة بالخارج .. وكلنا عارفين طبعا فى الخارج فين !! .. أصدرت تكليف لعدد من العناصر الإخوانية والمتعاونين معهم فى الداخل المصرى ، بالعمل على تنفيذ مخططهم ، اللى بــ يستهدف إثارة الشائعات والبلبلة في أوساط المواطنين بالتزامن مع بدء الاستحقاقات الانتخابية من خلال إنتاج و إعداد تقارير وبرامج إعلامية مفبركة تتضمن اخبار مغلوطة عن الأوضاع الداخلية بالبلاد ومؤسسات الدولة وترويجها عبر شبكة الانترنت و القنوات الفضائية الاخوانية التى بــ تبث من الأناضول و من الكشك المحتل اللى فى الخليج.

الأمن الوطنى قدر يحدد العناصر الاخوانية الهاربة اللى أدارت المخطط ده والموجودين حاليا فى الأناضول ، و من أهمهم الارهابيين الاخوان الهاربين عماد البحيرى و حسام الشوربجى و سيد توكل و حمزة زوبع … و ده يعتبر طبعا نجاح كبير لأجهزتنا الأمنية وتجديد لثقتنا فيهم .. لأن الأمن الوطنى حصل على المعلومات دى من قلب التنظيم نفسه فى الخارج … وعقبال لما البهوات دوول يشرفونا بنفسهم هنا فى مصر قريب بإذن الله

المهم إن المعلومات اللى إتجمعت عند قطاع الأمن الوطنى قدرت توصلهم لأعضاء الخلية السرية دى فى الداخل المصرى .. و رصدت قيامهم بإستغلال احدى الشقق السكنية فى إسكندرية ، وتجهيزها كإستوديو لإعداد اعمال المونتاج للأفلام والفيديوهات المفبركة اللى صوروها.

رجال الأمن الوطنى إتحركوا بعد ما رصدوا كل الخيوط ، وقدروا يقبضوا على عناصر الخلية بالكامل ، وهم هشام متولى الشوبكى، و اسلام علوانى حجازى، و إبراهيم سعيد إبراهيم و محمد محمد سعيد و محمد احمد شحاته، و صهيب سامى الزقم .. وكلهم من أعضاء جماعة الإخوان الإرهابية … و كمان تم ضبط العديد من الكاميرات وأجهزة الحاسب الالى وأدوات المونتاج والتصوير وعدد من الفيديوهات المفبركة حول الأوضاع الداخلية كانت جاهزة علشان يتم ترويجها ..

الحقيقة إن مصر بتخوض حرب شرسة ضروس .. أقل ما توصف به إنها حرب قذرة ، و مع خصم ، مايعرفش أى حاجة عن معنى الشرف .. خصم ماعندوش مانع إنه يهدم بلاد ويدمر دول ويشرد شعوب بحالها علشان يحقق أطماعه وأجندته .. وياريتها كانت فعلا أطماعه .. لكنها أطماع اللى مشغلينه لحسابهم ، وبيحاربوا بيه حرب وكالة مالهاش أى هدف غير تدمير بلادنا وإسقاط جيوشنا ..

المليارات اللى انصرفت ومازالت بتتصرف طول الوقت على الحرب دى وأدواتها ، لو كانوا دفعوها للشعوب نفسها فى كل الدول اللى قالوا إنهم عايزين مصلحتها .. أو حتى إستثمروها فى مشروعات ومصانع و فى تطوير الإقتصاد .. كانت أغنت الشعوب دى وضمنت لهم كلهم حياة كريمة لعشرات السنين القادمة

للأسف إحنا زى ماقولنا بنواجه حرب قذرة .. بتمويل لا متناهى .. و مديرى الحرب دى بيستخدموا كل وأى وسيلة للنجاح .. وأهم الوسائل دى هى تدمير الوعي واللعب فى العقول المغيبة ، اللى مستعدة تساهم بإيديها فى تدمير نفسها وشعوبها لا لشيئ ، إلا لأنها تمتلك نفس الفكر الأيديولوجى اللى بيروج له إعلام المؤامرة …

ولسة الحرب دى هــ تشتد أكثر فى الفترة اللى جاية ..

و احنا جاهزين لها بإذن الله …

حفظ الله مصر .. وشعب مصر

لمشاهدة الفيديو ومتابعة تعليقاتكم