03 Aug 2020
الحرب على الهوية .. !!
———————–
الكلام إللى تم اثارته من يومين حول ان إللى بنى الأهرامات هم مخلوقات من كوكب آخر ، ده مش المرة الأولى.. ولن تكون الأخيرة….
إللى آثار الكلام ده هو “أيلون ماسك – Elon Musk” .. وهو رجل أعمال ومهندس كندى اميريكى .. ومؤسس شركة سبيس إكس ومديرها التنفيذى .. ومعاها كدة شوية حاجات تانية فى العديد من الشركات وشبكات المصالح الدولية … والحقيقة انه بيتم تلميعه علشان يبقى الايقونة إللى هتخلف “بيل جيتس” كأيقونة دولية بعد رحيله ..
عموما مالناش دعوة احنا يا موهى … خلينا نرجع تانى لموضوع بناء الأهرام .. و قولنا ان ما تم اثارته ده مش أول مرة يتقال .. بالعكس ده اتقال كتير قبل كدة … و اتقدم فى افلام هوليودية كتيرة .. و اتعمل عليه ابحاث .. و مرة يقولك إللى بنى الاهرام دول مخلوقات فضائية .. ومرة يقولك لأ دوول أهل اطلانتس الغارقة .. و مرة تلاقى ابحاث مجهولة بتلف السوشيال ميديا عن إن إللى بنى الأهرامات هم قوم عاد إللى جم من أرض الجزيرة العربية و إللى ربنا ذكرهم فى القرأن وقال انهم كانوا بيتطاولوا فى البنيان وينحتون من الجبال بيوتا … يعنى المهم ان إللى بنى الأهرام هم أى حد غير انهم يكونوا مصريين
و من ناحية تانية وعلى مدار سنين طويلة تلاقيهم بيرسخوا عندك كلمة “الفراعنة” مش “المصريين القدماء” رغم أن اسم فرعون كان خاص بشخص واحد فقط وليس صفة عامة لكل ما يمت بصلة لتاريخ المصريين القدماء .. برغم ان ربنا ذكر فى عصر سيدنا يوسف ان حاكم مصر كان اسمه الملك .. و مش كدة وبس .. لكن حتى النقوش المصرية القديمة مافيش فيها اى اثر لكلمة فرعون او الفراعنة … عموما ما علينا … مش هندّخل نفسنا فى قضية جدلية تخرجنا من سياق الحدث إللى بنتكلم فيه !!
و من ناحية ثالثة يطلقوا عليك كلابهم المتدثرين بعبائة الدين علشان يقولك ان قدماء المصريين كانوا وثنيين وفجرة وحضارة عفنة .. واللى يلاقى تماثيل اثرية حجرية تحت بيته يكسرها أو يطمسها .. ولو كانت دهب يسيحه ويبيعه .. علشان ده ميراث عفن ماينفعش تسلمه للدولة أو تستنفع به … الخ الخ من هذه الفتاوى …. والكلام ده شوفنا عينة بسيطة منه فى سنة حكم الاخوان .. والبكابورت إللى اتفتح علينا فى قنواتنا فى برامج “التوك شو” .. بالاضافة للقنوات بتاعتهم اللى كانوا مدورينها
و فى النهاية.. تلاقى نفسك أمام حل من اتنين … يا تتقبل فكرة ان المصريين القدماء دوول كانوا مخلوقات من كوكب تانى يعنى مش تبعك ولا لك علاقة بيهم … او انهم حضارة عفنة .. وبالتالى تتكسف من انتمائك لهم او تتبرى منهم .. وانت بنفسك إللى تقول انك مش تبعهم.
إللى بيحصل ده هو محاولة تجريدك من تاريخك … تجريدك من كل موروث ثقافى ومظهر حضارى ممكن تنتمى اليه و تفخر بيه … ولو عجزوا عن كدة او كدة … تلاقيه بيستهدفك بحملات السخرية .. والتريقة على حضارة 7 الاف و 10 الاف سنة … ويقولك ياعم سيبك من التاريخ وقوللى انت عملت اييه .. وتشوف وتسمع السخرية من المصريين القدماء .. ولما يبقى عندك مناسبة أو حدث عالمى كبير ، وتعمل شعار مأخوذ من تراثنا الحضارى .. تلاقيه بيقولك “هو احنا مافيش عندنا غير الحضارة المصرية القديمة” … … وكأن الموضوع ده بيغيظهم ويستفزهم !
يعنى من الاخر .. هو عايزك تنسلخ من تاريخك و من مكونك التراثى .. برغم ان الحملات دى مش بتتعمل على الحضارة الصينية مثلا … وماسمعناش عن حد بيقول ان مخلوقات مريخية هم إللى بنوا سور الصين العظيم … مع العلم ان سور الصين هو البناء الأرضى الوحيد إللى ممكن رؤيته من على سطح القمر … لكن ده مش مهم … المهم حضارتنا احنا وتاريخنا احنا هو إللى لازم يتمسح …. سميها بقى مؤامرة .. سميها حمادة بالجنزبيل .. المهم ان ده الواقع إللى بيحصل
ولاحظ أن أول حاجة عملتها داعش لما دخلت العراق وسوريا انهم دمروا الآثار وحرقوا المكتبات وسيطروا على آبار النفط… يعنى هدفهم كان تدمير تاريخك التراثى وسرقة حاضرك من الثروات …. علشان ميبقاش عندك لا ماضى ولا حاضر .. وبالتالى مايبقاش فيه مستقبل.
والمشكلة انهم نجحوا انهم يسيطروا عقول البعض من أبناء بلادنا صاحبة الحضارات ويغتالوهم فكريا .. ويستخدموهم هم نفسهم فى الترويج لأفكارهم فى ضرب تاريخنا وتراثنا الثقافى.
الحرب على الهوية مستمر … و بكل شراسة … و فى الوقت إللى الاخرين بيحاولوا يخترعوا لنفسهم تاريخ ويزوروا الحقائق علشان يقولوا احنا كنا كذا و كنا كذا … بنلاقيهم بيضربوا فى تاريخنا وهويتنا ومكوننا الحضارى والتراثى .. وبيحاولوا يهدموه بشتى الطرق .. مش بس بإيديهم .. لكن كمان بإيدين اصحاب المكون الحضارى نفسهم …
خللوا بالكم …
حفظ الله مصر .. وشعب مصر