09 Aug 2020
لبنان .. إلى أين !؟
—————–
هــ يكون من العبث فصل اللى بــ يحصل فى لبنان عن اللى بيحصل فى المنطقة بكل ما فيها من تداخل وتشابك مصالح بين جميع القوى التى تتصارع وتتناحر من أجل الثروات و من أجل موطئ قدم لكل قوة على حساب القوى الأخرى.
كمان من العبث ، فصل اللى بــ يحصل فى لبنان عن مؤامرة الربيع العبرى اللى إنطلقت فى 2011 بنكهة تنظيمات التأسلم السياسى تحت رعاية الأنظمة التوسعية كأدوات للقوى الكبرى فى محاولة إعادة تشكيل ورسم خريطة المنطقة ، والتى تصب فى النهاية فى صالح طرف واحد فقط لا غير.
و هــ يكون من سوء التقدير إتهام حزب الشيطان اللبنانى بإنه وراء الإنفجار الرهيب النووى التأثير ، اللى حصل من كام يوم ، و أودى بحياة العشرات وأصاب الألاف من الأبرياء لأنه أكيد مش هــ يضرب نفسه علشان يحط نفسه ورقبته تحت مقصلة المجتمع الدولى .. طب يعنى حزب الشيطان مش مسئول عن اللى حصل !!؟؟ .. هنا بقى لازم نوضح شيئ مهم جداً
المرفأ اللى إنفجر يقع بالكامل تحت سيطرة وإدارة حزب الشيطان .. وبالتالى فهو مسئول مسئولية تامة عن كل ما يتم تخزينه داخله ، و عن كل الأنشطة اللى بــ تتم من خلاله … وبالتالى فالمواد اللى إنفجرت سواء كانت مواد كيمائية فقط أو معاها اسلحة زى ما بيقول بعض المحللين والخبراء من خلال تحليل بصمة الطيف للإنفجار .. أو أيا كان اللى أدى لهذا الإنفجار المروع .. فهو يخضع فى النهاية لسلطة ومعرفة حزب الشيطان .. فى ظل غياب تام للحكومة اللبنانية ، اللى ماعندهاش علم المواد دى دخلت إمتى ، وإتخزنت إمتى ، وتم تهريب جزء منها إمتى ، ومين اللى عمل كدة ، وإزاى .. و ده اللى بيأكد إن حزب الشيطان بيقول على طريقة أحمد السقا “من النهاردة مافيش حكومة .. أنا الحكومة”
يعنى بالعقل والمنطق كدة ، إحنا بــ ننفى إنه يكون حزب الشيطان هو اللى عمل التفجير .. لكن هو نفسه المسئول مسئولية تامة عن وجود المواد و الأسلحة دى كلها فى المكان ده بالذات ، بل وعن كل الإنشطة المالية سواء كانت الرسمية أو المشبوهة (In & Out) .. و اللى بــ تدور داخل المرفأ من تهريب سلاح ومواد كيميائية وتخزين مواد محظورة وتهريب أفراد ألخ ألخ .. بما إن المرفأ بالكامل تحت سيطرته …
طب يعنى انت عايز تقول إن التفجير ده بفعل فاعل !!؟؟ .. أيوة طبعاً …
طب واللى عمل كدة ما يفرقش معاه أرواح ألالاف من الأبرياء لمجرد إنه يوصل لهدفه فى الحرب الدائرة بن قوى الصراع !!؟ …. أكيد طبعا مايفرقش معاه خالص …. إلا إذا كنت حضرتك شايف إنه فرق معاه أرواح ومستقبل الملايين اللى ماتوا وإتشردوا وإتهجروا من بلادهم فى كل المنطقة ، وتريليونات الدولارات من الخسائر فى البنية التحتية والمنشأت ومصادر الطاقة كنتاج لوكسة الربيع العبرى من 2011 ، لحد النهاردة
فى مقالنا السابق بعنوان (“لبنان والعراق والشيطان .. تفرق شعرة“) واللى ياريت تقرأوه بتمعن
قولنا بالحرف إن النظرة الشاملة بتقول إن إيران خلاص تم تقليص تواجدها وتأثيرها فى سوريا للحد الأدنى … صحيح بعد فوات الأوان .. وبعد خراب مالطا .. وشبح التقسيم اللى بــ يطل بوجهه القبيح على الحبيبة سوريا .. لكن هو ده الحاصل دلوقتى .. من خلال تفاهمات وتواؤمات قوى كتيرة إقليمية ودولية .. و دلوقتى جاء الدور على العراق ولبنان .. علشان نهدم الهلال الشيعى اللى كان بــ يتم بنائه على مدار السنين اللى فاتت .. فى شكل توسع ايديولوجى عرقى دينى …
و تأكيدا لما ذكرناه فى المقال السابق ، وتخوفنا من الإنخداع بالشعارات و الإنجراف لمرحلة الفوضى .. نقدر دلوقتى نقول إن لبنان سقط فى هوة اللادولة .. والقوى الدولية كلها بتجرى دلوقتى عليها علشان تلحق اللى تقدر تلحقه فيما يتوافق مع مصالحها .. !! ..
فــ هنلاقى مثلا فرنسا بتحاول تستعيد نفوذ تاريخى بتواجد فعلى على الأرض ، وإيجاد منطقة نفوذ لها فى لبنان بما إن كثير من النخبة اللبنانية هواهم مع فرنسا
والأتراك بيحاولوا يغازلوا الشق السنى لإيجاد موطئ قدم لهم فى لبنان كمتنفس على البحر المتوسط كمحاولة لتحقيق أى نصر حتى ولو كان إعلامى للتغطية على الفشل فى العراق وسوريا وليبيا حتى الأن .. و ناهيك طبعا عن إن تركيا بــ تسعى جاهدة لإفساد التواجد الفرنسى فى لبنان ، نكايةً فى فرنسا .. كرد فعل على وقوف فرنسا ضد تركيا فى الملف الليبى .. علشان تقدر تستخدم الملف اللبنانى كورقة ضغط بعد كدة ضد فرنسا !
والسعودية بتحاول تلعب دور الأب الروحى لكسب الشارع فى مواجهة إيران .. وتستغل التوجه العام ضد حزب الشيطان اللبنانى فى محاولة لضرب النفوذ الإيرانى عن طريق قصقصة ريش حزب الشيطان أو حتى القضاء عليه تماماً لو سنحت الفرصة لذلك !
وحزب الشيطان كممثل لإيران أصبح فى مرحلة صراع البقاء مع الوضع ، ومستعد لإشعال الأرض تماما ، أو حتى إدخال البلاد فى أتون حرب أهلية ، أو الزج بيها فى حرب خارجية على خلفية دينية من أجل حماية نفسه من السقوط .. مع الوضع فى الإعتبار إن النفوذ الإيران مازال يمتلك النصيب الأكبر والأقوى من التأثير على الشارع اللبنانى ..
وحكومة نتنياهو متربصة لإستغلال ما يحدث من أجل تحقيق اكبر مكاسب سياسية …
والشعب اللبنانى اصبح مجرد اداه فى إيدين الكل .. وكل مجموعة منه بتلعب لصالح الطائفة أو الجماعة أو الفكر السياسى أو التوجه الأيديولوجى اللى بينتموا إليها … والتعلب فات فات و فى ديله سبع لفات !!!!
وإفتكروا كلام اللى قال فى خطابه لشباب العالم بشكل عام ، وشباب المنطقة بشكل خاص “خللوا بالكم من بلادكم .. لأن الدولة اللى بتقع ، مش بتقوم تانى” … و كان معاه حق ..
وختاما … وبعد كل اللى بنشوفه بيحصل حوالينا ده … و مع كل يوم بيعدى علينا .. بــ يثبت للجميع (ماعدى ناس معينة كلنا عارفينهم ، وخصوصا بتوع طقطوقة أنا كمواطن إستفدت إييه) .. إن النهج اللى إنتهجته الإدارة المصرية ، برغم إنه كان محفوف بالصعاب .. إلا إنه كان النهج الصحيح .. بل هو النهج الأصح على الأطلاق فى ظل كل ما تمر به المنطقة من تحديات ومؤامرات …..
و فى الوقت اللى الأوضاع بــ تتجه فيه من سيئ إلى أسوء فى معظم دول المنطقة .. بــ نلاقى الأوضاع فى مصر رايحة فى الإتجاه الإيجابى سواء على المستوى الداخلى ، أو على مستوى وضعية مصر الدولية فى كل الملفات السياسية والإقتصادية والعسكرية .. ويمكن علشان كدة بتلاقى الضغوط بتزيد على مصر فى محاولة لتعطيلها .. أو على الأقل إبطاء سرعتها فى التوجه نحو الأفضل ونحو الريادة
حفظ الله مصر .. وشعب مصر