22 Aug 2020
فى اتفاق وقف اطلاق النار الليبى
الكبير كبير .. !؟
—————————-
بدون مزايدة أو تطبيل … و لو انه مش عيب يعنى ان الواحد يطبل لبلده … و خصوصا إن الاخرين يمتلكوا القدر الكافى من الصفاقة ، مش للتطبيل فقط لأعداء البلد .. ولكنهم وصلوا لأقصى مستوى ممكن حد يوصل له فى قاع مستنقع الخيانة …
لكن ما علينا … مش ده موضوعنا …
بقالنا سنين بنحاول نقنع البعض من عشاق الدونية والانبهار بالآخر ، ان الدولة المصرية مش وليدة الصدفة … و ان أى إنجاز بيحصل ، ماجاش كدة ضربة حظ … و ان مصر قوية .. و مؤثرة .. ولها ثقل سياسى دولى .. سواء سياسيا أو عسكريا .. وكمان دلوقتى اقتصاديا .. لكن لأن الغرض مرض .. فالمرض بيخلى الشخص عاجز عن رؤية الحقيقة مهما كانت واضحة .. وتلاقيه بيبحث عن كل شيئ و أى شيئ علشان يؤكد بيها وجهة نظره المريضة دى !!
لكن القطنة مابتكذبش …
عايز تعرف مين هو القوى !!؟ …
القوى هو إللى بيفرض رؤيته ويفضل وراء هدفه لحد ما يحققه.. فى حدود المتاح .. و الدولة القوية هى إللى بتقدر بتضافر قيادتها و جيشها وشعبها ، انها تحقق اهدافها مهما بلغت التحديات والصعوبات ، من أجل حماية أمنها القومى …
القوى … هو اللى وقف فى قلب الأمم المتحدة وقال انه واهمٌ من يتصور ان يكون للتنظيمات الإرهابية دور فى حكم سوريا فى المستقبل… و قد كان ..
القوى … هو إللى لما تم الاتفاق على قاعدة عسكرية فى السودان لتهديد مصر … تم ازالة النظام السودانى من الوجود
القوى … هو إللى لما عمل مبادرة سلام فيما يخص دولة تانية … العالم كله وقف على ظوافره .. وبيانات التأييد نزلت ترف علينا زى النقطة إللى بتنزل فى فرح ، و كأن كل دولة كانت تخشى انها تبقى خارج إطار المبادرة المصرية
القوى … هو إللى لما قال ان (سرت / الجفرة) خط أحمر مافيش حد قدر يتخطى الخط ده بأى شكل من الاشكال .. برغم كل التهديدات والاستهانة بالبيان المصرى.
القوى … هو إللى قال هاعمل ترسيم حدود بحرية مع قبرص ولم يلتفت لكل دعاوى التخوين والعمالة والتفريط فى الحقوق والثروات ..
القوى … هو إللى كمل مشوار الترسيم ، وعمل اتفاقية مع اليونان و رسم كمان خط أحمر ، وضرب بكل التهديدات عرض الحائط .. وبرضوا ماحدش قدر يتخطى الخط البحرى الجديد.
القوى … هو إللى قدر يحمى ثروات مصر فى عرض البحر و ماحدش قدر يخترق السياج الامنى المصرى
القوى … هو اللى قال بمنتهى الهدوء و بنفس ثقة كلامه عن الخط الاحمر … ماتقلقوش من موضوع سد النهضة لانه مسألة حياه او موت …. في حين ان الطرف التانى عمال يصرخ و يتنطط زى الكورة الكاوتش و كل 5 دقائق تصريح .. و زى ما كل حاجة بتخلص بالصبر الاستراتيجى … الملف ده كما هيخلص .. و زى ما مصر عايزاه يخلص بالضبط !!
القوى … هو إللى لما بيقول كلمة بينفذها .. و لما بيمشى فى مسار يخص الأمن القومى المصرى .. كل الأطراف المعنية بتمشى فى سكته و بتدور فى إطاره.
و طبعا بدون الدخول فى تفاصيل اتفاق وقف اطلاق النار .. لان لسة فيه تفاصيل كتيرة ماحدش يعرفها … ولسة البيانات بتتوالى … لكن سبحان مغير الأحوال.. حتى السراج من خلال تويتة ، شكر مصر والرئيس السيسى على مجهوده فى إقرار السلام.
الكبير كبير … و حفظ الله مصر .. وشعب مصر