من أكاذيب إخوان إبليس – مساجد محور المحمودية المهدومة

31 Aug 2020

من أكاذيب إخوان إبليس – مساجد محور المحمودية المهدومة

————————————————————

البوست لكل الناس اللى مش عايشين في مدينة الإسكندرية …. لان كل الإسكندرانية عايشين و شايفين كويس جدا كل اللى حنقوله …. احنا النهاردة حنتكلم عن محور المحمودية اللى افتتحه الرئيس السيسي من يومين.

اللى عايش في اسكندرية عارف كويس جدا انها أهملت لسنين طويلة … و إنها مدينة حسب مساحتها المحدودة على الشريط الساحلى …. و طبقا لخدمات البنية التحتية المنفذة ليها … تستوعب على أقصي تقدير مليون و نصف المليون مواطن فقط …. و لأن كان كل هم النظام السابق بحكوماته المتتابعة هي الإستقرار السياسي بالتركيز على توجيه كل مقدرات الدولة الى دعم الطاقة و الغذاء حتي لو بالاستدانة و تسليم مقدرات الدولة الاقتصادية من أراضي و مصانع لرجال الأعمال في مقابل تثبيت أسعار منتجاتهم و تم وضع كل خطط التطوير المستقبلي للمدن لإستيعاب الزياده السكانية الأدراج ….. فـ أهملت الإسكندرية زيها زي باقي المحافظات و باقي المجالات لعشرات السنين … و أصبح عدد سكان الإسكندرية الأن 5.5 مليون مواطن يعيش معهم نفس العدد من باقي المحافظات طلبا للرزق في مساحة مخططة لمليون و نصف المليون مواطن فقط ….

و لزيادة الطلب على السكن بشكل كبير في نفس المساحة …. تكونت شبكة فساد متشعبة في محليات الإسكندرية مع طبقة تجار و مقاولين تتاجر بإحتياجات الناس … و اللى بدأت من بدايات الثمانينات …. و تكونت مجموعات منظمة لسرقة أراضي اليونانيين و الايطاليين و غيرهم من باقي الجنسيات أو حتي من أراضي الأوقاف و الدولة …. و أصبح البناء الغير مخطط سداح مداح … و عادي جدا إنك تلاقي شارع عرضه لا يتجاوز 5 متر فقط … تم هدم عماراته التي لا تتجاوز 3 او 4 أدوار … عشان تطلع 20 دور بدون ترخيص و لا حتي معايير أمان …. و بيخدمها طرق و محاور و بنية تحتية مخططة لخدمة مليون و نصف مواطن فقط ….. و ده أسفر عن ان صرف الإسكندرية لا يتحمل شوية مطر زيادة …. فتغرق الإسكندرية …. أو إن أي رحلة بالسيارة داخل الطرق أصبحت معاناه من الزحام …. و إن التحدي اليومي لأى مواطن سكندري أنه يلاقي مكان يركن فيه عربيته يوميا ، اللى اصبح سبب رئيسي للشجار اليومي في الشوارع لقيام كل صاحب قوة سلطة او مال بوضع السلاسل في الشوارع لحجز مكان لركنة سيارته.

المجموعات دي مع الوقت توحشت و أصبحت أكبر من سلطة أي محافظ … لدرجة أنهم ممكن بسهولة جدا يتسببوا في إقالة اي محافظ لمجرد تدخله في مصالحهم و أصبحت الإسكندرية أهم مدينة لغسيل الأموال بعشرات المليارات سنويا في عمليات البناء الغير منظمة و وصلت أنها اصبحت اهم مركز لغسيل أموال الجماعة الإرهابية في عمليات البناء … و الناس فقدت الأمل تماما في إصلاح الوضع و تعايشت مع معاه ….

حتي جاء رئيس و حكومة تواجه الفساد بقوة و بإرادة حقيقية …. و الناس مصدقتش إن فعلا فيه إرادة غير لما شافت بعنيها لما اتقبض على أكبر زعماء التنظيم ده “سعاد الخولى” نائب المحافظ اللى كانت بتتسمي المرأه الحديدية اللى كان محدش يتصور إن فيه حد يقدر يجيب إسمها أصلا … و اللى أخدت حكم مشدد بـ 12 عاما و غرامة بعشرات الملايين و مصادرة أملاك … و بعدها بدأت عملية تفكيك هذه الشبكة و اللى وصلت بقرار الحاكم العسكري بالقبض على جميع المقاولين في الإسكندرية و أباطرة البناء اللى تضخمت ثرواتهم في العشرين سنة السابقه …. و اللى تم صدور قرارات عسكرية ناجزة ضدهم بغرامات تصل لكل فرد فيهم لمئات الملايين و اللى دفعوا مليارات لتصفية القضايا العسكرية ضدهم … و اللى شوفنا المليارات دي في تمويلات بشاير الخير و محور المحمودية اللى تم افتتاحة .

المقدمة دي كانت مهمه جدا عشان نفهم سبب بكائيات جماعة الإخوان الإرهابية على موضوع تطوير الإسكندرية اللى من ناحية قفل عليهم مصدر مهم من تمويل الجماعة في عمليات غسيل الأموال …. و من ناحية تانية إن محور المحمودية يمتد بطول الإسكندرية من أول حي غرب بمنطقة ميناء البصل و شرقا حتي حدود الإسكندرية مع محافظة البحيرة قاطعا أحياء عشوائية شبه معدومة الخدمات المخططة و مكتظة بالسكان و اللى كانت بيئة مثالية لإنتشار نشاط الجماعة الإرهابية … و اللى كانوا بيستخدموا جوامع عشوائية مبنية على شط الترعة بمساحات صغيرة جدا كمراكز لنشر أفكارهم الإرهابية و التواصل مع قواعدهم …… و ده اللى تم القضاء عليه تماما.

الجوامع اللى تم هدمها حوالى 12 جامع صغير …. و اللى اتعمل مكانهم 15 مركز تنموي متكامل كلهم بنفس الصورة اللى على الشمال فوق …. كل مركز تنموي من الـ 15 يحتوى على الأتي :-

– مسجد كبير يسع لأضعاف العدد اللى كان موجود في الجوامع الصغيره القديمة مجهز بأحدث نظم الصوت و الإنارة و البناء المعمارى الفاخر من رخام و زخارف و سجاد فاخر و منبر مع كل الخدمات المجهزه من مصلي منفصل للسيدات و ميضه و دورات مياه مجهزه.

– مكتبة إسلامية تشرف عليها وزارة الأوقاف تحتوى أهم الكتب التي ترد و تقاوم فكر الجماعة الإرهابية.

– صالة مناسبات.

– دار لتحفيظ القرآن و تفسيره مفتوحة لخدمة أطفال و أهل الأحياء المحيطة.

– صالة ألعاب رياضية Gym مجهزة بأحدث الأجهزة و المتخصصين في اللياقة البدنية.

– صالة ترفيهية لألعاب تنس الطاولة و البيلياردو و ألعاب الفيديو جيم.

– حمام سباحة متاح لأطفال الحي.

– ملعب كرة قدم.

– مركز إسعاف.

– مركز مطافي.

طبعا كل ده بالنسبة للجماعة الإرهابية مش مهم …. لأننا بالنسبة ليهم مجتمع كافر يستحل قتلنا و مساجدنا ديار كفر و نفاق … فهم بيتباكوا على شقي عمرهم و استثمارهم اللى ضاع بتواجدهم في المنطقة دي و اللى حل محلهم وزارة الأوقاف … و أيضا فقدوا التواصل مع الأهالى اللى طايرين من الفرحة بالمحور الجديد …. اللى اي واحد تكلمه يقولك احنا كنا مدفونين بالحياة … لكن انا دلوقتي بقيت ساكن على الكورنيش

احنا كمان ماتكلمناش على باقي منشآت المحور من محلات تجارية و غيرها من المنشئات … بخلاف احساس كل قاطني الإسكندرية بسيولة مرورية كبيرة جدا على الكورنيش و طريق جمال عبد الناصر بسبب سحب المحور لكثافات مرورية كبيره منهم لانك دلوقتي تقدر تاخد اسكندرية من اولها لاخرها بسهولة جدا باستخدام المحور الجديد في 10 دقائق فقط .

مبروك لأهالينا و اصدقائنا في اسكندرية و ربنا يحفظ مصر و تحياتنا

لمتابعة تعليقاتكم