20 Sep 2020
دى ثورة مميكنة يا شربينى !!
—————————-
معلش بس القافية حكمت ..
اللى كتبناه لحضراتكم فى مقالنا أول إمبارح .. واللى كنا بنرد بيه على أصدقائنا من خلال رسائلهم القلقانة على البلد .. بتشوفوه دلوقتى بيتحقق على الأرض !! … إنت المستهدف الحقيقى من كل اللى بيحصل ده .. هدفهم إسقاطك فى فخ الخوف و القلق طول الوقت .. وإثارة البلبلة وخلاص … و هم عارفين إنهم مش هــ ينجحوا .. لكن زى ما قولنالكم ده اكل عيشهم اللى بيقبضوا عليه ثمن خيانتهم !
الثورة دى مجرد حشد أليكترونى ، وتهييج إعلامى من خلال قنواتهم العميلة اللى بيقدمها مجموعة خونة وعملاء ، مالهمش اى تأثير على الأرض .. وماحدش بيسمع لهم غير فلول المغيبين من شمامين الكلة وعشاق الدونية ، اللى وصل بيهم الحال إنهم اصبحوا بيعانوا من التثور اللاإرادى على نفسهم ، ومافيش حاجة يصرفوا فيها الكلام ده غير فى العالم الإفتراضى بتاعهم على شبكات التواصل الإجتماعى !!
– صدقنى مهما كنت بائس ، مش هــ تكون أكثر بؤساً من حد مصدق إن الثورة فشلت علشان الدولة قفلت المقاهى (اللى هى اصلا مفتوحة والناس والشباب فيها بالملايين)
– صدقنى مهما كنت بائس ، مش هــ تكون أكثر بؤساً من واحد بيقولك إن الثورة فشلت علشان الشرطة إنتشرت فى الشوارع (هى دى ثورة وإلا خروجة لكوكى بارك ياكبتن !)
– صدقنى مهما كنت بائس ، مش هــ تكون أكثر بؤساً من واحد مقتنع إن اللى مانع الثوار والجحافل اللى بالملايين من النزول للشوارع ، إن الدولة قفلت الميادين .. اللى هى اصلا مفتوحة والناس عايشة فيها بشكل طبيعى .. طب ده حتى الدولة جددتلك الميادين يا سيدى و وضّبتهالك علشان تبقى تعرف تثور كدة على نظافة !!
– صدقنى مهما كنت بائس ، مش هــ تكون أكثر بؤساً من واحد داعى لثورة وبيستجدى الناس إنها تنزل … هى الناس لو عايزة تثور كانت هــ تستناك !!؟؟
المصريين واعيين وفاهمين كويس اللى بيحصل .. ممكن يكون البعض مش راضى عن بعض القرارات ، و ده طبيعى … ممكن يكون البعض مختلف مع أشياء بتحصل ، و ده العادى .. لكن إنك تقول لهم إنزلوا هدوا الدور ونبدا من اول وجديد .. ده اللى مش ممكن المصريين يتقبلوه ابدا .. وخصوصا إننا وعينا الدرس .. وشوفنا بيان على المعلم فى الكام سنة اللى فاتوا .. وعرفنا إنكم مش دعاة تغيير للأفضل .. لكنكم دعاة خراب وتدمير … والدول اللى حوالينا بتشهد بكدة …
و مع فرض حتى لو نزل الشارع عشرة أو عشرين او الف أو ألفين .. ده مش مقياس ولا مؤشر لأى شيئ …بل بالعكس .. ده كان هيبقى هو الشيئ الطبيعى الوحيد لحالة الهبل الإليكترونى اللى حاصلة دى … لكن للأسف ماحصلش … و صدقونى .. لو الكام واحد دوول نزلوا .. فــ الشرطة هتبذل مجهود كبير جدا علشان تحميهم من الشعب اللى لو سابوه عليهم .. هــ يقطعهم …
كل ثورة و دعاة الثورة والمتثورجين على روحهم طيبين ومهزومين وموكوسين ومشردين فى بلاد الله لخلق الله !!
و قيّد يابنى عندك ..
إنها ثورة اتلفها الهوى
حفظ الله مصر .. وشعب مصر