29 Sep 2020
أرمينيا \ أذربيجان .. هو إييه اللى بيحصل !!!
———————————————
طبعا كلنا متابعين التصعيد اللى حاصل بين أرمينيا وأذربيجان .. وكلنا عرفنا إن أرمينيا أغلقت مطاراتها بعد حدوث إشتباكات حادة بين الجيشين الأرمينى والأذربيجانى .. وبغض النظر عن أسباب الحرب دى ، وموضوع إقليم «قره باخ» ذى الأغلبية الأرمينية المسيحية الواقع داخل الأراضى الأذرية ، واللى أوجد مشكلة مزمنة بين الدولتين منذ تسعينات القرن الماضى و ماحدش عارف يحلها لحد النهاردة … لكن كالعادة ، إحنا هــ ننظر للأحداث دى بعيون مصرية .. وعلاقة اللى بيحصل ده بمصر !
فى البداية لازم نبقى فاهمين إن أذربيجان دولة غنية بتروليا وغازيا .. وهى تمثل كنز إستراتيجى للكيان الإسر$ئيلى لأن قرابة نصف واردات الكيان من الغاز والبترول قادمة من أذربيجان ، وناهيك طبعا عن التعاون العسكرى والإستخباراتى بين الدولة الأذرية و دولة الكيان .. واللى يهمها فى المقام الأول إستقرار أذربيجان لضمان مصالحها .. إلا إنها ماتقدرش تتدخل عسكريا هناك نظرا لطبيعة المنطقة .. وبسبب البعد الحدودى بين الدولتين
و هنا ييجى دور المرابى العثمانلى .. القرد اللى بــ يتنطط فى كل حتة علشان يؤازر أذربيجان على حساب أرمينيا .. وطبعا لازم نضخ حقنين البنج فى عروق البهاليل من عبيد القرد بتصوير اللى بيحصل ده على إنه نصرة للدين وللمسلمين الأذاريين فى مواجهة الأرمن المسيحيين .. برغم إن الأذاريين ينتشر بينهم المذهب الشيعي الأثنا عشري فى حين إن تركيا دولة سنية !
و المرابى العثمانلى هنا بيلعب اللعبة بأكثر من وجه .. جزء كبير من هذه الأوجه لهم علاقة بمصر !!
طب إزاى !!؟؟
أولا هو بيلعب الدور اللى دولة الكيان مش هــ تقدر تلعبه زى ما شرحنا من شوية ، و ده طبعا مش وليد الصدفة .. وخصوصا إنه زى ما كانت تركيا أول دولة تعترف بقيام دولة الكيان .. كذلك رفض الكيان لحد النهارة الإعتراف بمذابح الأرمن على إيدين الأتراك … و الحدق يفهم !!
ثانيا .. القرد العثمانلى المرابى ، إقتصاده بــ يكح تراب حرفيا .. و بــ يدوّر على أى مصلحة عند أى دولة تمتلك غاز أو بترول .. بدءً من سوريا ، لــ ليبيا ، لأذربيجان ، علشان يقدر يعطى حقن إنعاش لإقتصاده اللى بــ يتهاوى وعملته اللى بتنهار ,, وطبعا مش هــ يلاقى دولة حدودية قريبة منه أفضل من أذربيجان علشان يدعمها فى قضية محورية فى مقابل نصيب من الثروة .. وخصوصا إن فيه خط أنابيب بترول بالفعل بــ يصل بين أربيجان وبين تركيا .. و ده غير خط أنابيب «تاناب» للغاز واللى هــ يبدأ تشغيله فى 2026 .. وطبعا هو مش هــ يدعمها بجيشه .. لكن بجيش المرتزقة اللى بيشتغلوا بالصفارة وبالدولار بعد ما أصبح وجودهم فى سوريا مصدر إزعاج له ، وهم قاعدين كدة من غير شغل !!!
ثالثا .. موقف القرد اصبح صعب جدا فى مواجهة أوروبا وأميريكا بعد اللى حصل فى مواجهته مع اليونان ، وإنقلاب أوروبا عليه وتهديدهم له بتوقيع عقوبات ، واللى فى الغالب هــ يبدأ تنفيذها مع نهاية شهر أكتوبر .. وهو عايز يوصل لهم رسالة إنه ممكن يلعب دور مهم لصالح الناتو فى مواجهة الدب الروسى ، ويقرفه فى دولة إستراتيجية زى أرمينيا .. و ده يعتبر فى نفس الوقت ، كارت بــ يحاول يصلح بيه علاقته مع الأمريكان بعد تدهور العلاقات بين الدولتين نتيجة إرتماء القرد فى احضان الدب الروسى !
رابعاً .. توقيع مصر إتفاقيات ترسيم الحدود البحرية مع قبرص واليونان ، قفل الطريق تماما على الأتراك إنهم يبقى لهم أى دور فى غاز شرق المتوسط .. و مع رسم الخط الأحمر المصرى فى (سرت \ الجفرة) فى ليبيا من أكثر من شهرين ، وعجز القرد بمليشياته عن تجاوز الخط .. وكمان إستقالة السراج الخادم المطيع لخليفة القرود .. ومحاولة الأتراك مغازلة مصر للتفافض و عدم رد مصر عليهم .. فقد القرد الأمل تماما فى الإستفادة من البترول الليبى .. و أصبح مافيش عنده أمل غير إنه يحاول يلعب دور فى أذربيجان الغنية بالغاز والبترول !
المشكلة اللى بتواجه القرد إن أهمية أرمينيا بالنسبة لروسيا تفوق بمراحل أهمية سوريا للروس .. وبالتالى ، فــ الدب الروسى مش هــ يقف يتفرج .. وخصوصا إن أرمينيا نقطة محورية للروس فى مواجهة أوروبا والناتو .. وإمتلاك بوتين لقواعد عسكرية فى أرمينيا وإنتشار عسكرى ، ونشر المنظومة الصاروخية S300 مع توقيع أرمينيا لإتفاقية دفاع مشترك مع الروس .. و ده اللى مش ممكن أبدا روسيا تتنازل عنه.
وناهيك طبعا عن إن القرد بيحاول يوجد لنفسه نقطة قوة يقدر يقف بيها فى مواجهة الروس في سوريا اللى بيعانى فيه بالفعل أمام الروس ، بعد فشله الذريع فى الملف الليبى بسبب التدخل المصرى ، وإنذار الخط الأحمر المصرى الشهير ، واللى قام الرئيس المصرى بتكرار التحذير ده فى خطابه من كام يوم فى الأمم المتحدة أمام العالم كله !!
اللى إحنا قولناه ده ممكن يفسر ، ويرد على تساؤلات البعض ، لييه بوتين مش بــ يتعامل مع تركيا بعنف ، ومش بــ يرد على اللى بيعمله القرد ، من أول حادث إغتيال السفير الروسى فى أنقرة ، إلى موضوع إسقاط الطائرة الروسية ، إلى عدم الرد بقوة على اللى كان بيعمله القرد فى سوريا .. و أوضحنا قبل كدة فى ردودنا على بعض الأصدقاء ، إن سياسة الروس مع القرد هى سياسة الإحتواء .. مع الوضع فى الإعتبار إن تركيا تعتبر ثاني أكبر مستورد للغاز الطبيعي من روسيا .. و بلغ حجم صادرات روسيا إلى تركيا من المنتجات الروسية فى 2019 حوالى 21.3 مليار دولار، مقابل واردات بقيمة 4.2 مليار دولار ..
نرجع تانى لموضوعنا ، ونقول إن اللى بيحصل بين أرمينيا وأذربيجان هو حرب بالوكالة من الطراز الأول لصالح أطراف عديدة مشاركة فى خلفية الأحداث … وكله بيلعب لمصلحته بغض النظر عما إذا كان من الممكن أن يشعل ما يحدث حرب إقليمية حقيقية تتورط فيها أطراف دولية ..
والحقيقة إن حرب زى دى كانت ممكن تشتعل فى ليبيا .. وعلى حدودنا … لكن ده ماحصلش بفضل الله أولا ، ثم بفضل قوة الجيش المصرى ، وقيمة مصر السياسية والعسكرية … اللى وضعت خط أحمر بعمق ألف كيلومتر خارج حدودها ولم يستطع أحد تجاوزه !
ربنا يكون فى عون الأبرياء فى كل دول العالم اللى أصبحوا مجرد وقود لجنون السطوة وأطماع الثروة وصراعات القوة والسيطرة …
واللى له جيش مايتضربش على بطنه .. !!
حفظ الله مصر وشعب مصر