10 Oct 2020
مناورات جسر الصداقة (مصر \ روسيا) فى البحر الأسود .. !!
————————————————————
بعد ما نفذّت القوات البحرية المصرية والأسبانية تدريباً بحرياً عابراً بنطاق الأسطول الشمالى بالبحر المتوسط ، بإشتراك الفرقاطة المصرية ( توشكى ) مع الفرقاطة الأسبانية ( REINA SOFIA ) .. و تضمين التدريبات دى للعديد من الأنشطة التدريبية المختلفة ومنها تمرين دفاع جوى ، مع تنفيذ تشكيلات إبحار بالإضافة إلى تنفيذ تدريبات طيران بحرى .. هــ تقوم القوات البحرية المصرية بتنفيذ مناورات جسر الصداقة فى نسختها الثانية مع البحرية الروسية بعد ماتم تنفيذ النسخة الأولى منها فى يونيو 2015 قبالة السواحل المصرية .. ولكن المرة دى هــ تتنفذ فى البحر الأسود لأول مرة فى تاريخ مصر وروسيا
أهمية المناورات دى إن البحرية لمصرية بــ تخرج من نطاق محيطها الإقليمى زى ما ذكرنا إمبارح ، و بــ تنتقل إلى أقصى شمال نطاق الأمن القومى المصرى .. والأهم هو إتفاق الروس وسماحهم بدخول واحدة من القوى العسكرية الكبرى على مستوى العالم لعمل مناورات مشتركة داخل نطاق المحيط الحيوى الروسى .. و مش كدة وبس .. لكنه كمان هــ يكون تحت سمع و بصر نظام الأغا العثمانلى لأن المناورات هــ تكون على أعتاب إن لم تكن فى عقر دار الأغا و داخل نطاق محيط أمنه القومى ..
المناورات دى مفيدة لينا جدا .. لأنه إذا كان ترتيب البحرية المصرية السادس على العالم ، فالبحرية الروسية ترتيبها الثالث على العالم .. و ده هــ يضيف لينا خبرات كبيرة ، و هــ يخلى البحارة المصريين يستفيدوا من قوة وكثافة التسليح الروسي و يختبروا أفضل الطرق والتكتيكات الروسية مع معدات حديثة ومتطورة ، و الاطلاع على أفضل القطع الروسية .. مع الوضع فى الإعتبار إن بيئة المناورات هى بيئة مختلفة .. و ده فى حد ذاته بــ يضيف لكفائة قواتنا المزيد من القدرة على القتال فى بيئات مختلفة عن المعتاد فى نطاق محيطنا الحيوى
لكن كمان المناورت مفيدة جدا للروس ، لأن البحرية المصرية قامت بتحديث نفسها بقطع معظمها أوروبى .. فى حين إن التسليح الروسى تسليح شرقى .. و دى فرصة للروس إنهم يتعاملوا فى مناورات مباشرة وبالذخية الحية مع السلاح الغربى .. و ده هــ يخلى البحرية المصريين تضيف خبرة كبيرة للروس نتيجة لتعاملهم بتكتيكات غربية وشرقية ومصرية خالصة … ناهيك طبعا عن إن القوات البحرية المصرية صاحبة أعلى خبرات تراكمية على مستوى العالم .. وهى الأكثر مشاركة إما فى حروب مباشرة أو فى مناورات حربية بالذخيرة الحية ..
اللى تم الإعلان عنه إن المناورات دى هــ يشارك فيها مجموعات تكتيكية من السفن الحربية التابعة لأسطول البحر الأسود التابع للبحرية الروسية والبحرية المصرية ، بدعم من الطيران ، و هــ تشمل التدريبات تنفيذ مهام مشتركة لحماية الطرق البحرية من التهديدات المختلفة (واخد بالك إنت يا إردو ) .. ده بالإضافة إلى إنه برغم إنها مناورات بحرية لكن هــ يتم إختبار مقاتلات MiG 35 من الطيارين المصريين ، وجايز جدا يتم تجربة طائرات السوخوي سو-35 المصرية اللي تحت الاختبار ..
فى الغالب مش هــ تشارك حاملات المروحيات المصرية من طراز “Mistral” فى المناورات بسبب بنود معاهدة مونترو اللى بــ تمنح تركيا حق السماح وتنظيم مرور السفن فى مضيق البوسفور والدردنيل واللى تم توقيعها في مدينة مونترو السويسرية عام 1936، ودخلت حيز التنفيذ يوم 9 نوفمبر 1936 .. و قام بالتوقيع على المعاهدة دى ، تركيا وبريطانيا وفرنسا وبلغاريا ورومانيا ويوغوسلافيا واليابان وأستراليا، إضافة إلى الاتحادين اليوغوسلافي والسوفيتي السابقين.
المعاهدة دى بتسمح للسفن الحربية التابعة لدول حوض البحر الأسود بحرية الحركة من دون قيد أو شرط .. أما بالنسبة للسفن الحربية التابعة لدول من خارج حوض البحر الأسود ، فبموجب المعاهدة يجب أن تكون سفن سطحية و قطع خفيفة ولانشات وحاملات صواريخ … و إحنا بصراحة بنحترم القانون والمعاهدات جدا
طبعا الهدف المعلن من المناورات دى هو تعزيز وتطوير التعاون العسكري بين البحرية المصرية والبحرية الروسية لتحقيق الأمن والاستقرار في البحر ، إضافة إلى تبادل الخبرات بين الأفراد في صد التهديدات المختلفة في مناطق الملاحة الثقيلة … لكن المناورة دى لها هدف سياسى عسكرى .. و هو إرسال رسالة للجانب التركى أننا قريبين جدا وإننا نمتلك القدر الكافى من القوة الغاشمة اللى تخلينا نقدر بيها نخترق كل الحواجز ، ونوصل لعقر داركم .. سواء كان فى شكل مناورات سلمية … أو لو لزم الأمر فى شكل حرب شاملة
و فى النهاية مش عارف لييه راسم فى ذهنى صورة تخيلية لوزير دفاع السيد “جرب أحمق بغبغان” وهو داخل بيقول له بصوت الفنان عادل إمام:
“يا سعادة البيه … إحنا كنا قاعدين .. وبعدين لاقينا الأسطول المصرى معدى من بحر إيجه .. وإحنا قاعدين .. وبعدين راح معدى على بحر مرمرة .. وإحنا قاعدين .. وبعدين إخترق مضيق البوسفور بتاعنا .. وإحنا قاعدين … وبعدين وصل البحر الأسود على دماغك ودماغنا كلنا علشان يعملوا مناورات مع الروس.. وإحنا قاعدين ..” ..
خلاصة الكلام …
الأسطول المصرى فى البحر الأسود . و دى رسالة مش ممكن يتم تجاهلها .. رسالة مسجلة لأصحابها بعلم الوصول ..
رسالة فى الصميم ..
حفظ الله مصر وشعب مصر