رسائل هيلارى كلينتون (كشف المستور) .. !!

12 Oct 2020

رسائل هيلارى كلينتون (كشف المستور) .. !!

———————————————

على الاقل لأصحاب الفكر المستنير ، والعقول المنفتحة ، والولاء والانتماء لوطننا مصر .. واللى جمعتنا بيهم صداقة وطيدة من سنوات من خلال صفحتهم كلام فى الصميم … مافيش بالنسبة لهم اى جديد فى تسريبات هيلارى كلينتون إللى تم نشرها فى خلال اليومين إللى فاتوا دوول …

نفس الكلام اللى كنا بننشره وبنتناقش فيه مع بعض .. ونتفق ونختلف حوله و حول ملابساته ، والشخوص المرتبطة بيه ، وكيفية ادارة مخططاته ، و الهدف من المخططات دى على المدى القريب والبعيد … بس الفارق الوحيد بين زمان و دلوقتى.. اننا زمان كنا بنشرح الكلام من خلال مراقبة متأنية للأحداث ، وتحليلها ، وقراءة متعمقة للمشهد ، وربط الصور ببعضها من خلال إدراك حقيقى لأبعاد إللى بيحصل علشان نوصل لحقيقة الصورة الكاملة بنسبة قد تصل إلى حد الكمال … لكن دلوقتى بقى فيه دليل … والكلام بقى على عينك يا تاجر … والصورة بقت مثبتة بحقائق لا يستطيع أن ينكرها أحد ….

حقيقة الربيع العربى إللى دمر المنطقة .. و إزاى تم التخطيط له .. و إزاى تم استخدام تيارات التأسلم السياسى كبديل للأنظمة العربية القائمة … وحقيقة الدور اللى لعبته الادارة الاميريكية ممثلة فى براك أوباما و هيلارى كلينتون بالتعاون مع قطر واستخدام قناة الجزيرة لضرب الأمن والسلم المجتمعى لدول المنطقة .. وبالذات مصر ….

حقيقة الدور القطرى والدور التركى فى تدمير المنطقة ، و إزاى تم استخدام جماعة الإخوان الارهابية القذرة (خونة الاوطان) على مدى سنوات من أجل إدخال الدول فى دوامة الفوضى بهدف إسقاط الأنظمة ثم القفز على السلطة بدعم قوى إقليمية ودولية .. و كأن التاريخ بيعيد نفسه و بيقدم لنا من جديد قصة الخائن “خاير بك” واللى عمله فى مصر وخيانته لها وللمماليك و لجيش مصر لصالح السفاح التركى سليم الأول !! .. نسخة تاريخية طبق الأصل من إللى عملوه خونة الأوطان فى عصرنا الحديث (خان .. يخون .. إخوان).

حقيقة التواصل مع الامريكان وانشاء قنوات إعلامية ممولة بدعم مئات الملايين من الدولارات ، و تقودها جماعة الإخوان لضرب وعى الشعوب كجزء اساسى من حروب الجيل الرابع لتنفيذ مخطط الاستيلاء على المنطقة والسيطرة على ثرواتها لتمرير الأجندة الأمريكية الغربية.

الكلام ده يضاف إلى اللى قاله دونالد ترامب قبيل الانتخابات الاميريكية السابقة لما قال ان نظام (اوباما/كلينتون) هم إللى صنعوا داعش و دعموا الإرهاب من خلال دعمهم لتيارات التأسلم السياسى .. و إن كلينتون بدأت منصبها وداعش موجودة فى 3 دول فقط .. والنهاردة فى 2016 أصبحت موجودة فى 22 دولة .. و كنا نشرنا على صفحتنا كلامه ده !

حقيقة استخدام النظامين الايرانى والتركى كبيادق على رقعة شطرنج المنطقة سياسيا و إقتصاديا وتنظيميا وحتى عسكريا لأحداث حالة من عدم الاستقرار وخلق مناخ من التوتر إللى ينتج عنه فى النهاية انهيار الدول وفقدانها لوحدة تماسكها !

حقيقة استخدام النظام القطرى فى إسقاط معمر القذافى وتدمير ليبيا ..

حقيقة الضغوط إللى تم ممارستها على السعودية من أجل تحجيم دورها فى منطقة الخليج ومحاولة سلخ البحرين من الأسرة الخليجية وضمها للثوب الايرانى .. ناهيك عن الضغوط عليها بسبب دعمها لمصر إللى وقفت حجر عثرة امام مخططات تدمير المنطقة ، واللى كان انهيارها هيكون بمثابة الجائزة الكبرى وصافرة الانطلاق لإسقاط المنطقة كلها فى فخ الفوضى !!

لما كنا بنقول ويؤيد كلامنا العقلاء من أصدقائنا أصحاب الوعى الرشيد ، ان ثورات الربيع العربى تم صناعتها فى المطبخ الغربى ونفذها الاخوان ، وإنه تم اللعب على الشعوب بفكرة الثورة من أجل الوصول للديموقراطية إللى هى اصلا مش موجودة فى الغرب بالشكل إللى كانوا عايزيننا ننفذه عندنا فى شكل فوضى وسيولة مجتمعية تهوى بنا فى جحيم اللادولة .. كان بيتم اتهامنا كلنا بالتطبيل والكذب وكنا بنتشتم بأحط الألفاظ والاوصاف …

لما اتقال ان يناير 2011 كانت ثورة على خلفية مؤامرة اشعل جذوتها فى الخلف جماعة الاخوان خونة الأوطان ، و أججت نيرانها قناة الجزيرة وبعض الخونة والمغيبين على السواء فى الداخل .. كنت تلاقى إللى طالع يقولك يعنى الملايين إللى نزلوا دوول كلهم خونة !!؟ .. و طبعا ده سؤال حق يراد به باطل … لأنه اكيد الملايين إللى نزلت دى ماكانوش خونة .. بالعكس كانت نيتهم سليمة وكانوا طمعانين فى التغيير … لكن فرق كبير بين إنك تعمل ثورة .. وإنك يتعمل بيك ثورة.

و بغض النظر عن ان نشر الرسائل الاليكترونية لهيلارى كلينتون هو جزء من المعركة الانتخابية بين حزبها الممثل فى جو بايدن ، وبين دونالد ترامب وحزبه … وبغض النظر عن ان إللى بيحصل ده جزء أصيل من الحرب القائمة بين ممثلى النظام العالمى الجديد والقديم … لكن المهم انه اصبح هناك حقائق لا تقبل الجدل على كل حدوتة ال 10 سنوات إللى فاتوا ، واللى تجرعت المنطقة كل مصاعبهم والامهم .. واللى نتج عنهم خسائر تريليونية من الدولارات .. وعشرات الملايين من القتلى و اللاجئين والمشردين فى بلادهم وخارجها ..

الأسئلة الأهم إللى بتطرح نفسها دلوقتى:-

– ياترى فهمنا الحدوتة !؟

– ياترى المغيبين فاقوا والا لسة بيعاندوا والكبر واخدهم !؟

ياترى وعينا الدرس كلنا … وخصوصا اننا دفعنا ثمنه غالى أوى !؟

– والسؤال الأهم … ياترى ممكن ينضحك علينا تانى .. أو بمعنى أخر .. ياترى عندنا استعداد لتكرار إللى حصل ده تانى ، وخصوصا بعد مافهمنا الفولة وعرفنا إللى فيها !!؟ …

((( أعتقد لأ )))

اللينك التالى فيه مجموعة مقالات على موقعكم الأرشيفى “موقع كلام فى الصميم” فى باب “خريف عربى” … ياريت تحاولوا تقرأوا المقالات دى .. وبالذات مجموعة مقالات “أصل الحدوتة” .. و “أصل مخطط التقسيم” ….

وخليكم فاكرين ان مصر هى الدولة الناجية بإمتياز بعد فضل ربنا علينا .. بفضل قوة جيشها ، وتماسك شعبها و وعيه إللى خلاه وقت الجد يقلب الترابيزة على دماغ كل المتأمرين وتجار الدم وخونة الأوطان …. و مازال

حفظ الله مصر وشعب مصر

لمتابعة تعليقاتكم