25 Oct 2020
مصر و سد النهضة .. !!
———————–
إلحق …. مصر حتضرب سد النهضة و ترامب عطاها الضوء الأخضر لتفجير السد.
إلحق …. ترامب ورط مصر في فخ و حيجرجرنا لحرب عشان العالم يعمل معانا زي ما عمل مع العراق.
إلحق …. مصر بيتنصب لها فخ … طب روح إضرب في ليبيا الأول.
كلام و هرى كتييييير ظهر اليومين اللى فاتوا بخصوص تصريحات ترامب اللى قال فيها إن تعنت أثيوبيا بيفقد مصر صبرها و ممكن يدفعها لضرب السد و تفجيره و لن يلومها أحد.
و مع إننا إتكلمنا عن موضوع السد في أكتر من مقال … و مع إننا كنا أخدنا قرار شرحناه في حينها إننا لن نتكلم مرة ثانية في موضوع السد حفاظاً على المصلحة العامة …. لكن كتر الهرى دفعنا مرة أخرى لإعادة توضيح بعض المبادىء الأساسية اللى غابت و تاهت وسط التريندات الإخوانية اللى للأسف ناس كتير عامت معاها.
و بالرغم من إن نفس الناس اللى لما مصر حطت خط أحمر للقرد العثمانلي في ليبيا قعدت تولول و تقول … طب روحوا إتشطروا على أثيوبيا و إضربوا السد الأول …. هم هم نفس الناس اللى بيعيطوا دلوقتي و بيقولوا ليه نضرب السد و حرام عليكم و بلاش نضربوا لحسن مصر تتدمّر ….. لكن خلونا نسيب الهرى ده و نتكلم في نقاط محددة شرحناها كتييييير قبل كدة.
س / إييه هي إستراتيجية مصر في التعامل مع السد و هل مشكلة مصر هي بناء السد نفسه !؟
جـ / مصر عمرها ما إعترضت على بناء سد على مجرى النيل …. بدليل وجود سدود تم بناؤها على نهر النيل في السودان … و عمرنا ما سمعنا عن مشاكل مع السودان بخصوصها …. و لكن مشكلة مصر في بناء سد (أى سد) بدون الاتفاق الملزم على أسلوب إدارته و مشاركتها في إدارته و كمية التصريفات المائية في مختلف الظروف المناخية سواء وقت الفيضان ، أو وقت الجفاف حتي لا تتضرر حصة مصر المائية اللى هى أصلا ليست كافية….. يعني مصر مش معترضة على بناء السد و لكن على مبدأ بناء سد بدون موافقتها …. و ده يدل على سوء النية من الجانب الأثيوبي و بخاصة إن فيه أخطاء في التصميم الهندسي ممكن تؤدي الى إنهياره …. و كمان لما نشوف إستماتة أثيوبيا على بناء السد بالشكل ده بتخزين 70 مليار متر مكعب و نقارنها بتقارير هندسية فنية بتقول إستحالة توليد السد لاكثر من 2500 ميجا وات فقط لعدد سكان تعدادة يقارب 100 مليون …. يعني ولا حاجه أصلا …. نقدر نعرف إن السد معمول لهدف آخر.
س / طب إييه هدف أثيوبيا من بناء السد؟
جـ / مش حنتكلم على نظرية المؤامرة اللى بيقودها النيوليبرالية العالمية ضد الدول الوطنية …. و اللى مشترك فيها دول و حكومات و مؤسسات و شركات دولية…. و مش حنتكلم عن إن أحد أهم أدواتها هي حجب المياه عن الدول الوطنية كثيفة السكان زي ما عملت تركيا مع العراق و سوريا … لكن خلونا نتكلم عن الهدف الأثيوبي …. هدف أثيوبيا هو التحكم في المياه للوصول لمبدأ بيعها لمصر بالمتر المكعب …. يعني و الله عايزين 60 مليار متر مكعب مياه في السنة …. عنيا الإتنين …. إدفعولنا 6 مليار دولار و السنة الجاية اعملوا حسابكم الأسعار حتزيد …. بمزاجنا بقي و المية عندنا ، والسد سدنا ، و ممكن نحول نهر النيل أصلا من فوق الهضبة الى مجرى تاني.
س / طب و إزاي أصلا مصر تقبل ببناء السد من أساسه و يبقي أمر واقع ؟ …. فين الجيش و فين المخابرات و فين الدولة ؟
جـ / ماتنساش حضرتك إن في الوقت اللى كان شوباب صاورى كيوت نازل في 2011 بيجعر في الشوارع علشان يسقط الدولة ، و بيحرق كل مقراتها الأمنية و القضائية و حتي التاريخية في الشوارع و بيتم إختراق الحدود الشرقية و الغربية بآلاف الإرهابيين المسلحين …. الدولة المصرية إنكمشت على نفسها و سخرت كل إمكانياتها لهدف واحد هو إحباط الهدف الأساسي لهذه الهجمة و اللى نجحت في كل دول المنطقة و هو “تكوين حرب أهلية في مصر” … و اللى نجحت فية الدولة المصرية في حينها لإنقاذ كيان الدولة و حماية شعبها …. و ماتنساش حضرتك الزيارة التاريخية اللى عملتها النخبة الوطنية الواطية المخترقة غربيا الى أثيوبيا في ابريل 2011 لدعمها في بناء السد و اللى بعد الزيارة مباشرة بأيام قليلة … أعلنت أثيوبيا رسميا بداية العمل في بناء السد…. و ده أدي الى إننا لما بدأنا نقف على رجلنا في 2014 …. كان السد أمر واقع.
س/ طب و العمل دلوقتي ؟ … إييه الأوراق اللى في أيد مصر ؟
جـ / الموضوع ده حرب أعصاب مش أكتر ….. مصر موقفها أقوي من أثيوبيا بكتييييير …. سواء على المستوى القانوني … أو المستوى السياسي …. أو على مستوى القوة العسكرية في حالة اللجوء لها …. فمصر عملت بمنتهي الذكاء بطرق جميع الأبواب الممكنة و كشف تلاعب أثيوبيا و تبيان أننا دولة سلام و نسعي الى التعاون …. و بدأت دول كتير تزهق من التعنت الأثيوبي …. و بالذات الإتحاد الإفريقي اللى أشاد رئيسه “رئيس جنوب أفريقيا ” أكثر من مرة بالصبر المصري و بالسياسة المصرية الرشيدة في التعامل مع الأزمة و شفافيتها الواضحة …. و أصبح فيه قناعة دولية كاملة أن مصر بدأت تستنفذ كل الحلول السلمية بسبب التعنت الأثيوبي اللى ممكن يدفعها الى اللجوء الى الحل العسكرى و وقتها لن يلومها أحد.
س / طب مصر عندها القدرة العسكرية على ضرب السد ؟
جـ / مصر لديها القدرة الكاملة بل الأريحية الكاملة في إستخدام أكتر من حل عسكرى بدون أي خسائر …. سواء من أنواع الطائرات أو الذخائر التى من الممكن أن تنسف السد نهائيا و للأبد.
س / طب مش ممكن يكون ترامب بيدي مصر الضوء الأخضر و بيجرجر مصر لعمل عسكرى عشان يتعمل معانا زي ما اتعمل مع العراق لما ضرب الكويت ؟
جـ/ خلينا نصلح بس بعض المصطلحات …. أولا العراق ماضربش الكويت … لكن العراق غزا الكويت و كانت مشكلة العالم معاه إنه ينسحب من الكويت مش إنه أغار عليا …. ثانيا مصر مش بتتجرجر …. لاننا لو بنتجرجر كنا دخلنا ليبيا عسكريا من 2013 و كان معانا كل الحق … او كنا ضربنا قطر او روحنا اليمن مع السعودية او حتي ضربنا السد ده من 2014 ….. ثالثا مصر مش مستنية و لا بتاخد ضوء أخضر من حد فيما يخص الأمن القومي المصري …. لما ضربت ليبيا مأخدتش إذن حد … و لما طلعت جيشك على حدود ليبيا و حطيت خط أحمر و قولت لو تركيا فكرت بس تعدي الخط و دخلت ليبيا … حخش اشيل الجميع من فوق وش الأرض …. مأخدتش إذن من حد …. و ماحدش قدر يفتح بقه معاك …. لأن مصر مش بتبلطج على حد …. لكن بتشتغل بما يتوافق مع القانون الدولى …. و لما يكون فية خطر على أمنك موجود في دولة أخرى … من حقكك تدخل تضربه و تطلع تانى …. عامة بلاش نسبق الأحداث …. إحنا فين و الكلام ده فين …. الحاج ترامب كان بيوصف القناعة الدوبلوماسية الدولية اللى مصر قدرت و نجحت إنها توصلها للعالم مش أكتر.
س / طب و أثيوبيا حتعمل إييه ؟ … و السد ده حيفضل موجود ؟
جـ / شوف …. لما تقارن ما بين كمية الإستفزاز الأثيوبي و التصريحات و العنتريات و الزعيق و الصريخ بتاعهم …. و ما بين ثقة الهدوء المصري اللى يرعب بصحيح …. أكيد مش حتقلق …. و لما تشوف التصريحات الأثيوبية اللى طوال السنتين الماضيتين اللى شوية و حيتحايلوا على مصر إنها تضرب السد … و مصر هادية تماما …. تعرف إن الملف ده نهايته حتكون من برة الصندوق …. يا بعامل بشري عسكرى …. يا بعامل طبيعي لسوء تصميم السد و بناؤه في بيئة جيولوجية غير مناسبة له …..
الخلاصة:- للمرة المليون و زي ما قولنا في كل مقالاتنا قبل كدة …. ماحدش يتكلم على موضوع السد لأن الملف بيدار بحرفية شديدة … و كتر الكلام فيه بيضر مصر و بيضغط عليها داخليا ….. و زي ما إتقال كتير قبل كده …. المياه لمصر مسألة حياه أو موت …. و أمن مصر المائي خط أحمر و غير قابل للتفاوض أو المماطلة فيه.
ربنا يحفظ مصر و تحياتنا