11 Nov 2020
حرب التيجراى الأثيوبية وسد النهضة .. من منظور واقعى !!
———————————————————–
علشان نخش فى الموضوع على طول ، وبدون الدخول فى تفاصيل كتيرة ماتهمناش إحنا كمتابعين للأحداث اللى بتحصل فى أثيوبيا فى إقليم التيجراى .. سواء كان إييه اسباب اللى بيحصل ده ، أو إييه التأصيل التاريخى لمشكلة إقليم التيجراى ، وعلاقتهم بالحكم فى أثيوبيا ، وسبب الصراع ، و ليه الموضوع ده تم تفجيره دلوقتى ، والخناقة على إييه .. ألخ ألخ ألخ .. لكن اللى يهمنا نفهمه كمصريين .. هل اللى بيحصل ده ف مصلحة مصر وإلا لأ !!؟؟
و ده يقودنا للسؤال الأهم ، وهو هل التوترات الحاصلة وتفجير الأوضاع فى الداخل الأثيوبى هــ يكون له تأثير على ملف سد النهضة !!؟؟ .. يعنى بالعربى كدة .. هل اللى بيحصل ده ممكن يوقف موضوع بناء السد ، اللى بــ يثير فى نفوس المصريين القدر الأكبر من القلق على مستقبل مصر المائى وحصتها التاريخية من مياه النيل ؟؟
والحقيقة إن الإجابة صعبة حبتين … لييه بقى !!؟؟
اللى بيحصل فى اثيوبيا لو تطور للأسوء ، والموضوع قلب بحرب أهلية ، أو حتى ماقلبش لكن فضل الوضع فيه عدم إستقرار ، فــ أكيد ده هــ يتسبب فى وقف أعمال السد بسبب عدم الإستقرار وتوقف التمويلات اللى أكيد أصحابها ماعندهمش إستعداد يرموا فلوسهم فى بير مايعرفوش اخره إييه … و ده طبعا أكيد هــ يكون فى مصلحة مصر .. لكن ماننساش إن ده هــ يكون بشكل مؤقت .. لأن الملف نفسه لم يحسم بعد !!
و لكن … الوضع فى المجمل عمره ما هــ يكون فى مصلحة مصر … طب لييه !!؟
شوف يا سيدى ..
#أولا: أثيوبيا كدولة تقع فى نطاق محيط الأمن القومى المصرى … وبالتالى فــ إستقرار أثيوبيا كدولة قومية لها نظام مستقر ، هــ يكون أفضل من إنها تنهار أو تسقط ضحية حرب أهلية تدمرها وتهز إستقرارها لأن ده هــ يأثر على كل الدول المحيطة
#ثانيا: لما تكون مصر بــ تتعامل مع دولة مركزية مستقرة لها قيادة موحدة حتى لو كنا مختلفين معاها ، هــ يكون أسهل بكثير من إنك تكون بتتعامل مع عدة قيادات فى حالة تمزيق الدولة دى ، واللى يصحى الصبح بدرى ويستولى على الحكم الأول يبقى هو الدولة ، أو إنك كل يومين تلاتة تلاقى حد طالع يقولك انا اللى بــ أمثل الدولة مش التانيين .. وخصوصا لما يكون فيه بينك وبين الدولة دى ملفات حيوية زى ملف المياه
#ثالثاً: سقوط دولة بحجم أثيوبيا فى نفق مظلم من عدم الإستقرار ، وشبح حرب أهلية .. مع تعداد سكانها اللى بــ يبلغ قرابة الــ 110 مليون مواطن ، هــ يؤدى إلى موجات كبيرة من النازحين واللاجئين الى الدول المجاورة ، و ده هــ يمثل تهديد كبير على كل الدول المجاورة وعلى إستقرارها .. وبالذات فى دولة زى السودان ، قادرة بالكاد تحافظ على نفسها من السقوط ، وكمان بمساعدة مصر …
#رابعا: تفجر الوضع بالشكل ده ، هــ يفتح مجال للتدخلات الخارجية ، أقلها بحجة الحفاظ على الأمن والإستقرار فى المنطقة .. و دى طبعا هــ تكون الحجة المعلنة ، و ما خفى كان أفظع … و ناهيك عن ظهور موجات من التمدد الإرهابى الناتج عن حالة عدم الإستقرار ، و ده برضوا هــ يأثر على كل الدول اللى فى المحيط الإقليمى الأثيوبى ، واللى من ضمنهم مصر … و إحنا طبعا عارفين الإرهابيين وتنظيمات التأسلم السياسى بيحبوا مصر قد إييه .. ومن الطبيعى إن الوضع ده هــ يزود الحمل على القوات المسلحة المصرية فى عمليات تأمين الحدود من الإختراقات .. و خصوصا إن كل الدول المحيطة مش دول قوية يعنى وماسكة نفسها !!!
وبالتالى فــ اللى بيحصل فى اثيوبيا ده مش فى مصلحة مصر … وعلشان كدة ، إحنا بنطلب من الناس اللى بتهلل وفرحانة ، إنهم يفكروا فى الموضوع بعقلانية شديدة … أكيد من الطبيعى إننا نفرح لما يبقى فيه نظام بيننا وبينه مشاكل ، وتجيله مصيبة .. لكن مش لدجة إنهيار الدولة !
أما بقى بالنسبة للى بيتكلموا عن النمور والأفاعى والحدادى والصئووور اللى مش بتنام .. وأيوة بقى شدوا حيلكم وهدووها على دماغهم …. أبوووووس إيديكم بلاش صئرنة والنبى … لأنكم كدة بتلبسوا بلدكم وأجهزتها الأمنية فى حيطة من غير ماتخدوا بالكم .. ولأن مصر عمرها ما هــ تساهم أو تتورط فى التخطيط لشيئ ممكن يضرها ، و ده علشان كل الأسباب اللى إحنا ذكرناها قبل كدة ..
إحنا لو عملنا كدة ، هــ نبقى عاملين زى اللى حب يتخلص من فار عامل له إزعاج جوة بيته ، فــ راح مولّع فى البيت كله علشان يخلص من الفار ده !! .. لكن العقل بيقول إننا بدل ما نولع فى البيت ، نعمل للفار مصيدة أحسن ..
مش كدة وإلا إييه ..
حفظ الله مصر وشعب مصر ..