17 Nov 2020
والأن.. مع الفقرة الكوميدية .. !
لما شوفت الفيديو ده ماقدرتش امسك نفسى من الضحك … بجد الناس دى بقت مجرد فقرات كوميدية لما بنشوفها ، بنشوفها للتسلية مش أكثر .. بنشوفهم علشان نفرح فيهم ، لأنهم بالفعل ماعادوش قادرين يداروا خيبتهم .. واصبحوا فعليا فى قمة البؤس !!
الأخ محمد ناصر بيتنطط زى اليويو بعد ما شاف امبارح السفن والزوارق الحربية المصرية و هى بتعبر البسفور والدردنيل أمام عيون الأتراك وعيونه وعيون جماعته الإرهابية و همّ رافعين العلم المصرى … وعمّال يحزق ويجيب من جوة وهو مافيش على لسانه غير سؤال واحد بس “اييه إللى وداكم هناك !؟؟ انت رايح تعمل اييه هناااك !!؟” … ..
و من كثر حرقته ياعينى نطق إسم الدردنيل غلط !!
طب تحب أقولك رايحين هناك نعمل اييه يا محمااا ولا تزعلش !!
لأ ارجوك .. اوعى تفهم كلامى صح .. ايوة … احنا رايحين هناك نعمل مناورات مع واحدة من اقوى القوى العالمية فى الحتة بتاعة الأغا بتاعك وقدام عنييه … بنعمل مناورات مع قوى عالمية من مستوانا … مالك انت بقى !!؟ ..
و بعدين احنا نروح الحتة إللى احنا عايزينها .. و بمزاجنا … أصلنا مش محطوط لنا خط أحمر مش عارفين نعديه … واخدلى بالك انت
لأ و زعلان أوى وبيقول ان السفن الحربية المصرية رافعين العلم المصرى ولسان حالهم بيقولوا “ياريت حد يفكر يضربنا كدة” … ايوة ياعم .. احنا بنبلطج على الاغا بتاعك .. وهنعلم عليه فى الرايحة والجاية كمان
وكمان بيقول ان مصر هى إللى مسخنة الدول الاوروبية على تركيا .. ياااااااا … ده احنا جامدين أوى بقى أهو !!
موشّكرييين أوى حييّتك … ده انا لو من صاحب الشغل إللى مشغلك ، ارفدك بعد الكلام إللى قلته فى الفيديو ده .. لأن الكلام إللى انت قلته ده بيأكد كل إللى بقالكم سنين بتحاولوا تنفوه وبتقولوا عكسه لكل المغيبين إللى بيتابعوكم !!
شكرا لكل اعلام الخونة على الفقرة الكوميدية دى ..
و دمتم محروقين و موكوسين و مهانين ومشردين فى بلاد الله ..
ماتنساش يا ناصر تبقى تقول تحيا مصر ثلاث مرات
احنا بنقول تحيا مصر مليون مرة ..
تحيا مصر ليوم الدين …
لمشاهدة الفيديو و متابعة تعليقاتكم