الفاكسين و سنينه

14 Dec 2020

الفاكسين و سنينه .. !!

———————–

إصابات الكورونا فى مصر بالملايين ، والناس بتموت فى الشوارع !

يابنى يا حبيبى ربنا يهديك .. فين بس ده !!؟ .. هو إحنا عايشين فى بلد غير البلد اللى انت عايش فيها !؟ .. وبعدين منظمة الصحة العالمية بتنزل فى تفتيشات دورية بالتعاون مع وزارة الصحة المصرية لأن مقر المنظمة فى الشرق الأوسط موجود اصلا فى مصر !

ده الوفيات بعشرات الألاف فى الفيمتوقانية ، والحكومة مخبية علينا و مش عايزة تعلن !؟

يابنى يا حبيبى ربنا يهديك … ماشى الحكومة مخببية ..، طب وأهالى المتوفيين كمان مخبيين !!؟؟

الحكومة عملت إغلاق وقفلت المدارس والجامعات والكافيهات والمحلات بسبب إنتشار الفايروس ، ونسبة الوفيات كتيرة وغير معلنة ، علشان الحكومة مش عايزة تعالج الناس .. بس الإغلاق ده هــ يخلينا نموت من الجوع !!

يابنى يا حبيبى ربنا يهديك .. طب والحكومة مصلحتها إييه فى كدة .. عايزة تخلص من الشعب مثلا !؟ .. طب بس إنت إلبس كمامة وبعدين كلمنى عن إنتشار المرض

الحكومة مش عايزة تعمل إغلاق ولا تقفل المدارس والجامعات ولا تقفل الكافيهات برغم إنتشار المرض .. وعدم الإغلاق ده هــ يخلينا نموت كلنا من الكورونا .. !

يابنى يا حبيبى ربنا يهديك .. إنت مش كنت من شوية خايف تموت من الجوع .. طب برضوا إلبس الكمامة وخلى بالك على نفسك

دول العالم كلها شغالين على أبحاث الفاكسين …، فين مصر بقى من ده كله !؟ وبعدين يعمل إييه الفاكسين فى وطن ضايع !؟

يابنى يا حبيبى ربنا يهديك .. مصر شغالة زى معظم دول العالم على الفاكسين ، و وصلت لمرحلة متقدمة من النتاتج فى المركز القومى للبحوث ! .. وغير إننا شغالين فى بروتوكول تعاون بيننا وبين الإمارات والصين على الفاكسين الصينى .. بس ياريت تلبس الكمامة

هأ هأ هأ .. أهو العالم بدأ يطلع الفاكسين … وطبعا إحنا ولا هــ نشوف الكلام ده علشان الحكومة بتاعتنا نايمة ومايهمهاش الشعب !

يابنى يا حبيبى ربنا يهديك .. مصر تعاقدت على ملايين الجرعات من الفاكسين الصينى والروسى وأكسفورد .. غير الفاكسين المصرى اللى أعلن الدكتور ممدوح معوض، نائب رئيس المركز القومى للشؤون البحثية إن نتائجه وصلت إلى 95% و هــ يتم طرحه فى صيف عام 2021 .. بس إلبس إنت الكمامة الله يخليك

هأ هأ هأ … إبقو قابلونى لو شمينا ريحة أى نوع من اللقاحات دى قبل سنة 2080 … إحنا دولة فاشلة فى ذيل الأمم

يابنى يا حبيبى ربنا يهديك .. مصر تعتبر من أول خمسة دول فى العالم اللى بدأت إستلام اللقاح الصينى .. وفيه 50 ألف جرعة بالفعل وصلوا من يومين إلى مطار القاهرة

أااه .. 50 ألف جرعة بس .. جيابينهم علشان الحكومة والأغنياء .. لكن هــ تسيبوا الفقراء يموتوا

يابنى يا حبيبى ربنا يهديك .. دى مجرد بداية ، وإحنا ماشيين حسب تعليمات منظمة الصحة العالمية بالتطعيم فى شرائح .. نبتدى بالأطقم الطبية الأول ، وبعدين كبار السن وأصحاب الأمراض المزمنة وبعدين الأطفال وبعدين باقى شرائح المجتمع .. و دى ملايين الجرعات !!

أااه طبعا .. جايبين لنا اللقاح الصينى اللى ماحدش يعرف عنه حاجة … علشان تدوه للشعب الفقير الغلبان علشان يموتوا ، ومش هــ تدوه للأغنياء ولا للحكومة

يابنى يا حبيبى ربنا يهديك .. ده لقاح تم بــ بروتوكول تعاون بين الصين ومصر والإمارات والأردن ، وفيه أكثر من مليون شخص تم تجربة اللقاح عليهم فى التجارب السريرية بين الدول الأربعة من ضمنهم وزيرة الصحة المصرية دكتورة هالى زايد نفسها .. ونتائج اللقاح هايلة

أااه طبعا .. وجايبين اللقاح علشان تدوه للناس بفلوس والناس تدفع بالدولار … هو الشعب الغلبان ناقص يدفع فلوس ، ياعينى هــ نجيب منين وإلا منين !! …

يابنى يا حبيبى ربنا يهديك .. الحكومة أعلنت إن اللقاح هــ يبقى بالمجان لكل فئات الشعب .. يعنى ماحدش هــ يدفع ولا مليم .. زى ما الدولة عملت فى حملة الــ 100 مليون صحة ، والكشف عن أمراض التقزم وقصر النظر لأطفال المدارس ، وإنهاء قوائم الإنتظار للحالات الحرجة وإجراء عملياتها على نفقة الدولة ، وعلاج مرضى كورونا فى المستشفيات الحكومية بالمجان ألخ ألخ ألخ

وإشمعنى يعنى اللقاح الصينى !؟ … طبعا أكيد لقاح مضروب ..، ماهو إنتم مش هاممكم صحة الناس ، والشعب اللى يموت .. ياعينى عليكى يا مصر

يابنى يا حبيبى ربنا يهديك .. مصر تعاقدت على جرعات من اللقاح الصينى والروسى ، وأكسفورد ، وفايزر ، و ده غير اللقاح المصرى اللى هــ يتم طرحه زى ما قولتلك فى النصف الثانى من 2021 .. غير إننا عملنا مصانع إنتاج ، لإنتاج اللقاح الصينى فى مصر وحق توزيعه فى أفريقيا .. وفى إنتظار الإنتهاء من التفاصيل المادية لإنهاء الإتفاق ده

وأنا إيش ضمنّى بقى إنى أخد اللقاح الصينى ويجرالى حاجة !؟

يابنى يا حبيبى ربنا يهديك .. ده لقاح متجرب على مليون شخص .. وعموما لو مش عاجبك الصينى ، عندك الروسى والإنجليزى والأمريكانى ، إختار اللى انت عايزه وخده !

هأ هأ هأ … يعنى إنتم جايبين لنا لقاحات ماكملتش سنة ، وأبحاثها غير مكتملة ، وعايزيننا ناخدها … طبعا .. ما أنتم مش خايفين علينا ، ومش فارق معاكم ارواح الناس

يابنى يا حبيبى ربنا يهديك .. لو خايف من اللقاح ، ماتاخدوش

إييه ده .. إنتم مش عايزيننا ناخد اللقاح .. أااه طبعا ما إنتم عايزين الناس تموت ، ومش فارق معاكم ارواح الناس !!!

قوم من هنا ياض يابن الــ %#$%*&%$#@

ومازالت القصة مستمرة

ملحوظة: مصر واحدة من خمسة دول قدرت تحصل على اللقاح الصينى ، وإستلمنا الجرعات فعلا من كام يوم .. ياترى بقى عرفنا سر زيارة الوزيرة هالة زايد للصين ، ودعم مصر للصين فى عز بداية الأزمة .. واللى كثير جدا من الناس سخروا منه ، و دللوا بيه على فشل الدولة ، وإنعدام الرؤية ، وإننا بنراهن على حصان خسران !!؟؟ …. و ده الفارق بين منظور الدولة اللى بتتحرك من خلاله برؤية شاملة .. وبين الرؤية القاصرة لشريحة المواطن البيضوحباطى

حفظ الله مصر وشعب مصر

لمتابعة تعليقاتكم