06 Jan 2021
مؤتمر العلا – و بيان المصالحة .. !!
————————————-
شفت اللى حصل ؟؟؟ … أهو الخليج إتصالح مع قطر و باع مصر ….
قطر دلوقتي بقت حلوة !!!! …. يعني طلعت مظلومة من الإتهامات بتاعتكم.
أهو قطر صمدت و إنتصرت و هي اللى كسبت معركتها أمام الرباعي العربي.
مصر راحت و مضت الإتفاقية و وزير المالية القطرى وصل مصر عشان يتفاوض و يدفع قرشين يشترى بيهم مصر.
دي بعض التعليقات اللى سارح بيهم قطيع الجماعة إياها من إمبارح و هما بيتخبطوا و مش عارفين يقولوا إيه و هم شايفين التحول في قناتهم المفضلة الجزيرة تجاه دول الخليج و إحساسهم إنهم ممكن يتباعوا بأرخص تمن.
و لأن للأسف ناس كتييييير بتتكلم بعاطفتها … و زي ما إتعودنا إننا نقسم الصورة و نفككها و نعيد تركيبها مرة أخرى عشان نشوف الصورة صح بعيون مصرية لا ترى إلا المصلحة المصرية فقط و ذلك بتأصيل الأمور و تسميتها بمسمياتها الحقيقية ….. فهات كوباية الشاى بتاعتنا لاننا حنتكلم النهارده على اللى حصل في نقاط محددة و بتركيز شديد و بعيون مصرية خالصة .
شوفوا بقي و عشان نأصل الأمور …. مبدأيا كدة و تاريخيا …. المصالحة دي مصطلح يتقال بين دولتين كان بينهم إختلاف في وجهات النظر أو خلاف عابر بين دولتين ….. لكن مفيش حاجة إسمها مصالحة بعد حرب لازم ينتصر فيها طرف على الآخر …. فأوروبا مثلا بعد الحرب العالمية الثانية …. ماكانش فيه سلام حقيقي ما بينهم إلا بعد سحق دول التحالف المحور النازي تماما و إفناؤه من الوجود …. بعدها تم تقسيم أوروبا الى قسمين شرقي و غربي.
حتي السلام ما بين مصر و اسرائيل …. هو سلام بارد و هدنة مؤقتة الى حين …. و دائما و أبدا فيه سباق تسليح بين الدولتين …. باعتراف الإسرائيليين أنفسهم لان اللى في القلب في القلب.
و مصر في حرب وجود ما بينها و بين نظام عالمى أحد أهم أدواته في المنطقة هو التنظيم الدولى للأخوان المسلمين اللى بيسيطر على ( تركيا و قطر و إيران) …. فموضوع المصالحة ده مش وارد إطلاقا إلا بتغيير نظام الحمدين في قطر و أردوغان في تركيا و الملالي في إيران.
أومال اية اللى حصل و بالذات ان محدش شاف اي تفاصيل … و حتي بيان المؤتمر … كان بيان عام كله كلام إنشاء و ليس بيان محدد…. أقولك …. و بالراحة كدة.
مصالحة اييه بس و الرباعي العربي لم يحضر أحد من قادته المؤتمر (الرئيس السيسي – الملك سلمان – الملك حمد – الشيخ محمد بن زايد) و لم يتم الإعلان عن أي شىء غير فتح الأجواء للطيران مقابل تنازل قطر عن قضايا تعويضات دولية ضد السعودية … اللى أصلا أخر حاجة ممكن تفكر فيها هي الفلوس!!!!! …..
و حتي مصر أرسلت وزير خارجيتها للتوقيع على الإتفاق الخليجي كشاهد و ليس كطرف إلتزاما من سياسة مصر التاريخية بتواجدها في أي فاعلية للتضامن العربي و لدعم الأشقاء في دول الخليج.
القصة و ما فيها إن فيه شواهد كتييييير لترتيب عسكري بيحصل دلوقتي في المنطقة خاص بإيران محدش يعرف تفاصيله …. و كان لازم قطر يتم تحييدها و تحييد الطيران المدني القطري من إستعمال الاجواء الايرانية اللى كانت المنفذ الوحيد لها بعد غلق الأجواء الخليجية أمامها….. فكان لازم يتم إعادة فتح الأجواء الخليجية مرة أخرى.
و بعدين بالعقل كده …. مصر موقفها ثابت و لم يتغير تجاه نظام الحمدين في قطر من 2013 و مصر في أضعف حالاتها و العالم كله ضدها …. تخيل بقي تيجي النهارده بعد 8 سنوات و أنت في أقوي حالاتك العسكرية و الإقتصادية و السياسية و الإقليمية و تقدم تنازلات ؟؟؟؟ …. طب تيجي إزاي بس ؟؟؟؟
ده إنت عامل تحالفات إقليمية مع فرنسا و اليونان و قبرص و اسرائيل و روسيا و ايطاليا في شرق المتوسط و
انشأت منظمة غاز شرق المتوسط كان من نتيجتها طرد العثمانيين الجدد تماما من المنطقة …. و بقالك شهور طويلة حاطط لهم خط أحمر في ليبيا و تم القضاء على التنظيم الإخواني في السودان و جيش مصر موجود هناك و علاقاتنا في أفضل حالاتها و قطر محاصره بقالها 3 سنين و نفوذها تقلص تماما في المنطقة …. و سوريا بعد تفاهمات كتييييير أصبح الوضع فيها هدي خالص … و حتي في العراق قمت ناطط هناك بإتفاقيات إقتصادية و عسكرية.
يعني مصر بتفرش نفوذها و بتتمدد إستراتيجيا بقوتها العسكرية و الإقتصادية بهدووووء شديد و حرفية و معلمة في الشرق الأوسط كله …. في مقابل إنكماش واضح في الجانب المقابل للعثمانيين الجدد و النظام القطري .
و بعد كل ده تيجي تقول مصر رضخت و إتصالحت 😊 😊 😊 …. طب إزاي بس !!!!! … طب اية الورق اللى في ايدين قطر اللى ممكن تضغط بيه على مصر !!!! إييه المقابل ؟؟؟؟ ….. شوية الرقاصين اللى بيطلعوا يشتموا في القنوات اللى عندهم …. و مين قال ان مصر عايزاهم أو ان ليهم قيمة أصلا .
من الآخر كده …. السعودية الفترة اللى جاية حتكون مستهدفة و عليها ضغوط كتيييير من النظام الأمريكي الجديد ….. و مصر بتنسق معاها و حتقف في ضهرها زي ما السعودية وقفت معانا قبل كده … فالفترة اللى جاية حتشوفوا بعض التغيرات في السياسة السعودية زي بعض التقارب المحسوب مع تركيا لان الموجة الجاية كبيرة جدا على السعودية و تركيا …. فمحدش يقلق و لا يركب مرجيحة الترندات الإخوانجية.
السعودية و الخليج أمنهم القومي هي مصر ….. و عشان كده شوفنا الخليج وقف في ضهر مصر في وش أمريكا بكل ثقله …. فياريت محدش يزايد على العلاقات الخليجية المصرية لانها علاقات أمن قومي متبادل.
آخر نقطة …. وزير المالية القطرى اللى وصل مصر بطائرة سعودية …. ماكانش جاي في زيارة رسمية …. ده كان جاي يفتتح مول و فندق لشركة ديار المملوكة لحمد بن جاسم بعد رفض مصر دخول حمد بنفسه لإفتتاح الفندق ….. و بالمناسبة …. الفندق تم بناؤه في عهد أول جاسوس مدني منتخب …. و فضل مقفول لمدة 7 سنوات حتي تم إفتتاحة اليوم.
و فى النهاية ….. بنأكد على الثقة المطلقة فى القيادة المصرية .. إللى مش بتتحرك بناء على انفعالات عاطفية لأفراد الشعب .. و احنا مش مفروض فى الظروف الراهنة بشكل عام اننا نطلب من الدولة تفسير لكل تحرك بتعمله .. ولو ما اخدنا التفسير ده نقوم نغضب وننفعل ونتهم الدولة ونعوم على وش التريند … لأننا كدة بنبقى عاملين زى الدبة إللى بتقتل صاحبها و مثال على كدة لما كلنا فى 2013 كنا بدأنا ننزل الشوارع لكن كان كتير مننا فى حالة غضب و قلق و شك من حضور وزير الدفاع وقتها لخطاب الجاسوس المعزول مرسى .. وناس كتيرة قالت ان الجيش باع الشعب للاخوان .. لكن شوفوا اييه إللى حصل بعدها بكام يوم … تخيلوا بقى لو كان وزير الدفاع طلع و هدى الناس وفهمهم هو هيعمل اييه كمان كام يوم .. تفتكروا كان ينفع !؟ و ده إللى احنا ذكرناه فى خواطر أدمن امبارح .. اننا نثق فى القيادة السياسية ثقة مطلقة .. ونفتكر كلمة الرئيس السيسى لما قال فى مرة .. “هو انا كنت ضيعتكم قبل كدة علشان أضيعكم بعد كدة”
إطمنوا و متخلوش حد يلعب بدماغكم …. و ربنا يحفظ مصر و تحياتنا