الحرب على منظومة الفساد .. والشئ بالشئ يذكر

8 Sep 2015

الحرب على منظومة الفساد .. والشئ بالشئ يذكر

———————————————– 

أثناء الإعداد لحرب أكتوبر 73 كان صراع العقول وصل لأعلى مستوى ، والعمليات المخابراتية على أشدها .. وكانت التقديرات المبدئية اللى وضعتها أجهزة المخابرات طبقا للمعايير العسكرية العالمية ، بتقول إن عملية العبور  هــ يترتب عليه خسائر تتراوح نسبتها من 50% الى 60% فى موجة العبور الأولى .. ومن  15% الى 20% في موجة العبور الثانية من إجمالى قوات العبور .. وعلشان كدة كان لازم يتم توفير عدد من الأسرة فى المستشفيات تقدر تستوعب العدد المتوقع من المصابين !

ولما عملت الأجهزة الإستخباراتية دراساتها ، وجدت إنه جميع مستشفيات القوات المسلحة مش هــ تكفى لإستيعاب العدد المتوقع ، وعلشان كدة كان لازم يتم تدعيم ده من مستشفيات وزارة الصحة وبعض مستشفيات القطاع الخاص .. لكن ولإن إسرائيل كان لها عيون ترصد دبيب النمل .. وزى ما قولنا إن الصراع المخابراتى كان على أشده .. وأى إجراء كانت هــ تاخده الحكومة بإخلاء عنابر أو عدد معين من الأسرة كان هــ يتم رصده ويتم تحليله من جانب الموساد ، وكانوا هــ يفهموا على طول إن مصر بتستعد للعبور .. فكان لازم يتم وضع خطة لتنفيذ الموضوع ده !!

وفى يوم من الأيام قبل إشتعال الحرب بفترة ، تم تسريح ضابط طبيب شاب من القوات المسلحة من الجبهة .. ونقله للعمل فى إحدى مستشفيات وزارة الصحة ، وأثيرت شائعات إنه قريب مسئول كبير فى الجيش .. والواسطة عملت شغل .. ومعظم زملائه هنأوه على إنه إترحم من شغل الميرى ..

وبعد اسبوعين من بداية شغل الطبيب الشاب ده فى مستشفى القصر العينى .. حصلت مشادة بينه وبين مدير المستشفى لإن الطبيب الشاب إكتشف بالصدفة إن عنبر الطوارئ فى المستشفى ملوث بميكروب التيتانوس .. ورغم رفض مدير المستشفى للموضع .. لكن الطبيب أصر على أخذ عينات من عنابر المستشفى وإرسالها للمعمل للتحليل ، وإلا هــ يشتكى لوزارة الصحة من تعنت المدير .. وأمام الضغط وافق مدير المستشفى وتم إرسال العينات إلى المعمل .. علشان تيجى النتيجة بإن عنابر المستشفى بالكامل ملوثة بميكروب التيتانووس .. 😉😃

وكانت فضيحة .. و كان لازم وزارة الصحة تاخذ إجراء عنيف .. فتم إخلاء معظم عنابر المستشفى ونزلت الصور فى الجرائد ، وتم نشر صور العنابر الفارغة ، وأطباء ولجان وزارة الصحة بيقوموا بتبخيرها ، وتطهيرها من الميكروب .. علشان تعلن بعدها وزارة الصحة عن حملة على عدد من المستشفيات للتأكد من خلوها من ميكروب التيتانوس .. وبالصدفة البحتة كان الشخص المكلف بقيادة الحملة هو نفس الطبيب الشاب قريب المسئول الكبير اللى إكتشف المشكلة فى فى مستشفى القصر العينى .. وبالصدفة برضوا تم إختيار مستشفيات معينة ومحددة ولها مواقع ذات طابع معين !!

وبالصدفة برضوا طلعت كل تقارير وتحاليل المعمل إيجابية بوجود ميكروب التيتانوس فى كل المستشفيات اللى وقع عليها الإختيار علشان تبقى فضيحة كبيرة نتيجة الإهمال فى قطاع الصحة ، إتكلم عنه كبار الصحفيين فى وقتها ، منهم الصحفى مصطفى أمين على ما أذكر .. وبرضوا تم نشر صور أعضاء فرق وزارة الصحة وهم لابسين الكمامات و بــ يلفوا ا المستشفيات علشان يطهروها … 😃😃

وفى يوم 4 أكتوبر .. كان عدد الأسرة الخالية المطلوب توافرها فى المستشفيات للطوارئ وصل للعدد المطلوب .. وبإجراءات طبيعية من غير ما أجهزة الإستخبارات الإسرائيلية أو حتى الأميريكية تشك لحظة واحدة فى إن مصر بتستعد للعبور 😊

وعبرت قواتنا المسلحة والخسائر كانت لا تذكر .. ولما حصلت إصابات ، كانت اقسام الطوارئ جاهزة لإستقبال المصابين وعلى وجه كل ضابط من ضباط المخابرات إبتسامة نصر ….. و دى كانت إحدى العمليات المخابراتية كجزء من خطة التعمية الى نفذتها المخابرات المصرية للتغطية على إستعدادات مصر لأكبر نصر عسكري فى تاريخ القوات المسلحة المصرية .. واللى كانت برغم بساطتها ، إلا إنها كانت ناجحة تماماً .. وطبعا فيه غير العملية دى عمليات كثيرة ممكن نبقى ننشرها تباعاً فى وقت لاحق ..

لكن أنا مش عارف ليه إفتكرت القصة دى لما بدأت تتنشر أخبار حملات تطهير الدولة من الفساد .. وربطتّها بالأخبار اللى كان بــ يتم نشرها فى الصحف فى الفترة اللى فاتت عن موظفين إداريين تم اعفائهم من وظائفهم فى المخابرات ، وتم نقلهم إلى وظائف أخرى في وزارات الزراعة والصحة والكهرباء  !!! 😊

ياترى عرفنا بقى إن كل شئ بــ يبقى فى وقته .. وإنه من الذكاء أحيانا إنك تدّعى الغباء !!؟؟ 😊😊😊

لمتابعة تعليقاتكم