17 Jan 2021
تريند القطار الكهربائى .. فتش عن المستفيد !!
———————————————
كل مرة بــ يعلى فيها الصراخ والعويل .. تعرف على طول إن الهراء ده كله وراه حد بيحركه .. و لأن شر البلية ما يضحك .. فــ حالة اللطميات والعواء ومصمصة الشفايف اللى إحنا شايفينها ، بــ تفكرنى بالفنان سعيد صالح فى مسرحية العيال كبرت و هو بيقول “طبق الأصل العلقة اللى فات .. لا قلم زاد ولا قلم نقص” 😁
أيوة للأسف .. نفس اللى بيحصل دلوقتى هو اللى حصل قبل كدة فى موضوع حفر قناة السويس الجديدة .. ولو إنت عايز تفهم كل ده سببه إييه .. يبقى لازم تعرف الحدوتة من البداية 🤔
الحدوتة ياسيدى إنه فى سنة 1994 بدأت إسرائيل تدرس مشروع خط السكة الحديد بين أشدود على البحر المتوسط وميناء إيلات على البحر الأحمر .. وكان الهدف من المشروع ده هو منافسة قناة السويس عن طريق نقل البضائع و الكونتينرات بين المينائين دوول من خلال التفريغ وإعادة شحن السفن فى كلا الجانبين … لكن الحقيقة إن المشروع ده توقف وقتها بسبب إرتفاع التكلفة مقارنة بتكلفة المرور فى قناة السويس !
و بعد عام 2011 فى زمن مجيدة العمشة .. بدأ الحديث عن المشروع ده يظهر تانى للوجود .. نتيجة إيجاد بعض الحلول التقنية اللى قللت التكلفة إلى حد ما .. بالإضافة إلى حالة عدم الإستقرار اللى كانت فى مصر .. و بدء عمليات إستهداف مجرى القناة بعد 30 يونيو 2013 .. و ناهيك طبعا عن طول زمن رحلة العبور فى مجرى القناة نتيجة ضيق المجرى فى جزء منه ، وإنتظار عبور البواخر الكبرى مابين قافلة شمال وقافلة جنوب وليلة كبيرة أوى ، واللى كان بــ يخلى زمن الإنتظار أحيانا يوصل إلى 22 ساعة .. و ده وقت طويل جدا !! ..
وبالتالى كان لازم مصر تاخد خطوة إستباقية .. و تحل مشكلة العبور وطول فترة الإنتظار عن طريق حفر مجرى موازى فى الجزء الضيق من القناة بطول 35 كم، بالإضافة إلى توسيع وتعميق تفريعات البحيرات المرة والبلاح بطول 37 كم ليصبح الطول الإجمالي للمشروع 72 كم من الكيلو متر 50 إلى الكيلو متر 122 .. وكل ده كان بهدف تلافي المشكلات القديمة لقناة السويس من توقف قوافل المرور والإنتظار في منطقة البحيرات المرة .. وفى نفس الوقت هــ يسمح حفر القناة الجديدة مع عمليات تعميق المجرى باستيعاب قناة السويس للسفن العملاقة بغاطس 65 قدم !
و ده كان السر اللى جعل الرئيس السيسى وقتها عنده إصرار على حفر القناة فى سنة واحدة فقط مش فى 5 سنوات أو بحد أدنى 3 سنوات زى ما كان مطروح .. و ده لأن مشروع خط سكة حديد أشدود/إيلات كان متخطط إنه يخلص فى فترة من سنتين إلى ثلاثة سنوات بالكتير .. وساعتها كانت قناة السويس هــ تفقد جزء من أهميتها الإستراتيجية !!
و دلوقتى بقى حضرتك .. وبعد التقارب بين إسرائيل و دول الخليج فى مشروع التطبيع … فالمشروع بتاع خط السكة الحديد رجع تانى يظهر علشان كمان يضيف لأنشطته وفوائده ، نقل بترول و غاز الخليج عبر إسرائيل إلى أوروبا .. وده ببساطة خالص هــ يكون له تأثير مش على قناة السويس بس ، ولكن على خط سوميد كمان ..
ولأن الدولة المصرية (دولة 7/3) علمتنا خلال السنين اللى فاتت ، إنها دايما سابقة الأخرين مش بخطوة واحدة ولكن بخطوات .. فــ مشروع القطار الكهربائى ده كان منتهى وخلصان ودراساته مكتملة ، وفاضل له تكة على التنفيذ 😉🙃
إحنا مش هــ ندخل فى تفاصيل المشروع بكل أرقامه وإمكانياته وفوائده والعائد منه سواء إقتصاديا أو إستراتيجيا أو على مستوى البنية التحتية وعوائده على المواطن المصرى .. لكننا هــ نرد بس على كام نقطة ، لأننا كلنا للأسف مش بنسمع غير ولولة وبكائيات عن ضياع فلوس مصر ، والفلوس دى تبنى كام جامعة وكام مدرسة وكام محل عصير وفخفخينا .. ومش بطون الغلابة أولى .. ومش أولانا أولى .. وإييه لازمة المشروع .. و ده معمول علشان الأغنياء وبس … نفس الكربلائيات واللطميات اللى صاحبت تدشين مشروع القناة الجديدة ، ومشروع العاصمة الإدارية .. و بــ تصاحب أى مشروع قومى الدولة بتعمله … المشروعات اللى خلّت الدولة تحقق نمو إقتصادى فى عز أزمة كورونا .. فى الوقت اللى إقتصاديات الدول الكبرى بتحقق إنكماش فى ظل الأزمة ! 🙂
🟢 مبدأيا .. اللى بيقولك إنه كان فيه تحالف مصري صيني هــ يقوم بتنفيذ المشروع بتكلفة 9 مليار دولار وإحنا روحنا جبنا سيمنز تنفذه بــ 23 مليار دولار .. ده كلام قعدات الفسحة حضرتك ، وتسريبات خالد على والإخوان اللى بــ يعتمدوا على إن البعض مش بيقرأ … لأن الــ 9 مليار دوول كانوا تكلفة خط العين السخنة العلمين فقط .. لكن الــ 23 مليار دول تكلفة المشروع كله
🟢 المرحلة الأولى من المشروع بطول 460 كم .. و هــ تربط ميناء العين السخنة بقناة السويس بالعاصمة الإدارية الجديدة بالمدينة الصناعية بالقاهرة الجديدة مرورا بالمدينة الصناعية بحلوان والمدينة الصناعية بالبدرشين و الصناعية بـمدينة 6 أكتوبر والمدينة الصناعية بمدينة السادات والنوبارية وصولًا للمدينة الصناعية ببرج العرب والمطار ومدينة الأسكندرية واخيرًا العلمين الجديدة .. و الفريق كامل الوزير إتكلم إمبارح فى مداخلة إعلامية ، إنه بــ يتم دراسة إن القطار هــ يمتد كمان لمدينة مطروح .. والمشروع إجمالا مش لنقل الأفراد فقط .. ولكن الأهم هو نقل البضائع ! .. وحط تحت كلمة بضائع دى مليون خط 😉🙂
🟢 تكلفة هذه المرحلة الأولى ، هــ تبلغ 6 مليارات دولار تقريبا .. يعنى أقل من العرض الصينى بــ 3 مليار 😁 تقريبا ..، و هــ نلاقى إنه من إجمالى التكلفة فيه 3 مليار دولار للمنظومة الإلكترونية اللي هــ تنفذها سيمنز، وباقى الــ 6 مليار دولار هــ يبقى للأعمال المدنية والإنشاءات اللي هــ ينفذها تحالف الشركات المصري .. يعنى الفلوس رايحة لشركات مصرية هــ تشتغل بيها .. وتشغل عمالة وتدفع مرتبات .. وتشغل مصانع .. وسيارات نقل .. و رواج تجارى صناعى .. ألخ ألخ …. ماهو اصل الإستفادة الشخصية مش لازم ابقى مستنى حد يكبش ويدينى فلوس أحطها فى جيبى من غير ما أعمل حاجة …
🟢 طيب وباقى الــ 23 مليار دولار اللى قالوا عليهم !؟ .. دوول ياسيدى هم باقى تكلفة إجمالى المنظومة المتكاملة لمجموعة من خطوط القطار الكهربائى السريع واللي هيوصل لإجمالي أطوال 1000 كم .. وصولا لأسوان .. و لو بصيت على الخريطة اللى فى الصورة .. هــ تلاقى إن المشروع مش مخطط له إنه يقف عند الــ 1000 كم فقط .. لكنه للوصول إلى 1750 كم بإعتباره مشروع حضارى متكامل ، هدفه القفز بمصر لأفاق جديدة .. بس كل شيئ فى وقته .. وكل وقت و له أذان
🟢 و بحسب تصريحات الوزير كامل الوزير ، فــ الرئيس عبد الفتاح السيسي نجح في إقناع سيمنز الألمانية بالتنازل عن 360 مليون دولار لبند بتضعه سيمنز فى العقود إسمه “عمولة المخاطر” .. و مش كدة وبس .. لكن حصلنا كمان علي 4 قطارات هدية من الشركة الألمانية .. وناهيك عن إننا مش هــ نبدأ نسدد أى حاجة من تكاليف المشروع حسب الإتفاق غير بعد 6 سنوات من بدء تشغيل المرحلة الأولى (خط العين السخنة/العلمين) .. والباقى على 20 سنة .. يعنى مشروع هــ يسدد نفسه بنفسه ..
وفى الأخر تلاقى واحد لسه فاضل له 10 سنين علشان بس يبدأ يطلع له ذيل .. عمّال بــ يحرض على الدولة ويتباكى على مواقع السوشيال ميديا ، ويقولك فلوس البلد بتضشيييييع !! 😁
وللعلم ياسادة .. لازم تبقوا فاهمين إن شركة سيمنز موبيليتي هي شركة رائدة في عمليات السكك الحديدية عالية السرعة، حيث أتمت 50 مشروعا كاملا حول العالم كما أن لديها خبرة في تقديم مشاريع السكك الحديدية عالية السرعة في منطقة الشرق الأوسط وأفريقيا .. كما أنها شركة من الشركات الرائده في المحركات الهيدروجينية وهي محركات مالهاش أى بصمة بصمة حرارية والعادم بتاعها بخار ميه يعني صفر تلوث بيئي .. و ده هــ يبقى المرحلة التانية من المشروع .. لأن مصر بــ تدخل شراكة مع شركة سيمنز الالمانية في ابحاث الاقتصاد الهيديروجيني .. ومصر هــ تستفيد ماديا جدا من هذا الموضوع بزيادة التعاون مع ألمانيا ..
#الخلاصة:
اللى سرّح كلاب السكك بلجانهم الأليكترونية وقنواتهم وأذرعهم الإعلامية .. وسحب وراهم المغيبين والمهزوزين وسحلوهم كالعادة وراء التريند فى موضوع #قناة_السويس_الجديدة .. هو اللى سحلهم وراه فى تريند #العاصمة_الإدارية .. وهو نفسه اللى سحلهم وراه فى مشروع #قناة_السويس_البرية الجديدة … ولو إنت مش عارف مين هو عدوك الحقيقى وإييه هى أدواته .. يبقى العيب فيك إنت 😏 .. وعلشان كدة لما تحصل حاجة زى كدة .. وكل ما تحتار ..، لازم تسأل نفسك .. هو اللى بيحصل ده بيحصل لييه !؟ .. واللى بيعملوا كدة بيعملوه لييه !؟ ,, ولمصلحة مين !؟ ومين المستفيد منه !؟ 🤔
قولناها من زمان .. و هــ نفضل نقولها .. إن كلاب أهل النار بــ أدواتهم ، بــ لجانهم ، بــ أذرعهم الإعلامية ، بــ الأجهزة اللى بتخدم عليهم ، بــ كل المغيبين اللى ماشيين وراهم .. كل ده بــ يشتغل لحساب عدوك الأساسى والحقيقى .. مهما اقنعوك بحسن مقصدهم ، وعدالة قضيتهم ، ونبل أهدافهم .. لكنهم فى حقيقة الأمر هم السوس اللى بــ ينخر فى جسد مصر لحساب عدوك .. واللى هــ نفضل كلنا كظهير شعبى للدولة واقفين لهم بالمرصاد .. زى ما إحنا برضوا هــ نفضل واقفين لعدونا بالمرصاد
مهما طال الوقت …
حفظ الله مصر وشعبها من كل سوء