20 Jan 2021
و رحل دونالد ترامب .. !!
————————–
النهاردة خرج الرئيس الاميريكى دونالد ترامب من البيت الأبيض علشان العالم يبتدى مع رئيس أميريكى جديد لمدة الاربعة سنوات القادمة …
الرئيس الجديد إللى صرح فعليا انه هيعيد النظر فى الاتفاق النووى الإيراني .. وانه هينضم تانى لاتفاقية المناخ العالمية .. وانه هيرجع الدعم لمنظمة الصحة العالمية .. وانه هيعيد الانضمام لمنظمة التجارة العالمية .. وهيوقف بناء الجدار العازل مع المكسيك … يعنى من الاخر هيلغى معظم إللى ترامب عمله … و ده بيأكد كلامنا إللى قولناه قبل كدة فيما يخص توقعاتنا عن توجهات النظام الجديد .. وكلامنا عن منظومة العولمة ..
رحل دونالد ترامب بعد ما خلانا نشوف ونتأكد إن الرئيس إللى مابيقفش وراه شعب وجيش مش ممكن يكسب مهما كان معاه حق !
رحل دونالد ترامب بعد ما خلانا نشوف ونتأكد إن الإعلام الغربى اعلام مسيس ومضلل (بضم الميم و كسر اللام) وبيشتغل بأجندات الإملاءات السياسية.
رحل دونالد ترامب بعد ما خلانا نشوف ونتأكد إن الشركات العابرة للقارات زى شركات السوشيال ميديا والأدوية وصناعة الاليكترونيات وغيرها .. ناهيك طبعا عن المال السياسى .. هى إللى فعلا بتحكم العالم و انها فوق أى قانون وانها تقدر تتحكم فى مقاليد الامور .. ويوصل بيها الأمر انها تمنع رئيس أكبر دولة انه يقدر يتواصل مع شعبه … يعنى لا شرعية ولا حرية ولا حلاوة حمصية. 😏
رحل دونالد ترامب بعد ما خلانا نشوف ونتأكد إن وقوف أى رئيس أمام منظومة العولمة وتمييع الهوية وضرب الولاء والانتماء الوطنى و دعم الحرية الجنسية الخ الخ .. بدون أى ظهير عسكرى أو غطاء شعبى مؤمن برئيسه هيكون نتيجته الخسارة الحتمية.
رحل دونالد ترامب بعد ما خلانا نشوف ونتأكد إن الشرعية لإستقرار الدولة واستقرار مؤسساتها .. ومافيش حاجة اسمها شرعية ثورية ولا ديباجة “الحكم للميدان مش للبرلمان” و كل الهراء الفكرى إللى ضحكوا بيه على المغيبين فى بلادنا
رحل دونالد ترامب بعد ما خلانا نشوف ونتأكد إن دولة العواجيز هى الدولة اللى بتصدر الأكذوبة دى لبلادنا .. وإن كبر السن مش نقيصة ولا عيب .. وإحنا بنشوف الدولة اللى البعض شايفها أمل الشباب ..، فيها رئيس عنده 75 سنة ومرشح رئاسى منافس فاز عليه وهو عنده 78 سنة ومجلس شيوخ وبرلمان الغالبية العظمى فيه من المعمرين .. ومعظم القيادات العليا فى الحكومة تخطوا سن الخمسين .. وإن مصر هى دولة الشباب .. فيها برلمان شاب ورئيس وزراء شاب وحكومة أكثر من نصفها من الشباب .. وبتعمل برنامج رئاسى لتمكين الشباب 🙂
رحل دونالد ترامب بعد ما خلانا نشوف ونتأكد إن الجيش مكانه مش الحدود وانه له وجود مؤثر فى السياسة و له كلمته حتى وإن بدى عكس ذلك .. و إن موقف الجيش وردة فعله هى الضمانة الوحيدة لاستقرار الدولة.
رحل دونالد ترامب بعد ما خلانا نشوف ونتأكد إن المواطنين بيعملوا لافتات يشكروا فيها الجيش والشرطة على إللى بيعملوه .. مش زى ما قال البرادعى ان ده مش بيحصل فى الدول المتقدمة لأن ده شغلهم و ماحدش بيشكر حد على شغله
رحل دونالد ترامب بعد ما خلانا نشوف ونتأكد انه فيه اعتقالات بحجة حماية أمن الدولة .. وإن تهديد أمن مؤسسات الدولة اسمه ارهاب محلى .. وإن الشرطة بتستخدم الرصاص الحى مع المتظاهرين لو حصل اقتحام لمؤسسات الدولة .. و إنه فيه رئيس جديد بيعلن انه هيركز مع الإرهاب المحلى للحفاظ على الدولة … يعنى الإرهاب مش فزاعة زى ما البعض بيقول …. يعنى مجابهة تهديد أمن الدولة مش حجة لمزيد من القمع زى ما ضحكوا على المغيبين ..
رحل دونالد ترامب بعد ما خلانا نشوف ونتأكد انه الغرب برضوا بيقول انه فيه مؤامرات و إن الأمن الداخلى مش بيتكسف يطلع تقارير يقول فيها ان الاطرابات الداخلية بتبقى مدعومة من الخارج لو توفرت لهم معلومات بكدة .. ومافيش حد بيقول لهم “مابلاش بقى نظرية المؤامرة دى يا كماحة”
رحل دونالد ترامب بعد ما خلانا نشوف ونتأكد إن شخصيات رامبو وكوماندو وغيرها من الشخصيات الهوليودية هى مجرد شخصيات خيالية و أكذوبة هدفها فقط الدعاية للجيش الاميريكى إللى احنا شوفنا رجاله الحقيقيين و هم واقفين متهالكين .. أو نايمين على الارض داخل مبنى الكونجرس …. و إن الابطال الحقيقيين هم ولادنا إللى بيواجهوا الإرهاب بصدور عارية وايمان وعقيدة لا تتزعزع
رحل دونالد ترامب بعد ما خلانا نشوف ونتأكد إن علم الدولة شيئ مقدس .. و إن المسئولين فى الغرب بيقسموا بالولاء لعلم الدولة ولحماية الدستور .. مش زى ماكانوا بيفهموا المغيبين ان العلم والوطن وكل المسميات دى طقوس وثنية .. والعلم ده حتة قماش .. والوطن حفنة من التراب العفن !
رحل دونالد ترامب بعد ما اتأكدنا ان ان مصطلحات زى الحلم الامريكي و الديمقراطية هى اكبر كذبه بيضحكوا بيه على الشعوب الهبلة لما شوفنا اكبر حزبين في اميريكا هم مجرد كرفان لمجموعة من اصحاب الشركات و المصالح لما تحالفوا عليه و زوروا الانتخابات و منعوا رئيس امريكا من التواصل مع شعبه حتى قبل اعلان النتائج …. و ده بسبب انه الرئيس الوحيد من بعد الحرب العالمية الثانية الذى لم يقم بحرب و لم يمت في عهده جندى امريكي واحد في عملية عسكرية و واجه شبكات المصالح العابرة للقارات في استثمار ميليشيات الارهاب .. و ده قفل السبوبة على شبكات المصالح وشركات السلاح والأجهزة الامنية إللى بتلعب لصالحهم !
رحل دونالد ترامب علشان نشوف ونسمع الرئيس الاميريكى الجديد وهو بيهتف فى أخر خطبة التنصيب ويقول “المجد لأميريكا وحفظ الله قواتنا” .. مش زى ما البعض عندنا بيسخر من كلمة تحيا مصر وبيسمى الجيش عسكر !! 🤬
رحل دونالد ترامب علشان نشوف ونسمع ….
والا بلاش نكمل ونستفيض ونعدد فى إللى شوفناه بعنينا .. و خلانا عرفنا أن كل إللى كان بيتقال لنا كان مجرد شحن فكرى و استعداء على الوطن وجيشه ومؤسساته علشان نهدم اوطاننا بإيدينا وندمر استقرارنا ونشرد شعوبنا
اللى شوفناه بيحصل فى كل دول العالم فى السنتين الاخيرتين فقط .. خلانا نتأكد انه مافيش حاجة اسمها دول ديموقراطية فى العالم .. لكن فيه دول بتعرف تمثل انها ديموقراطية 😏 .. و إن الدولة المصرية فى حقيقة الأمر هى أكثر ديموقراطية من كل من يدّعون تطبيق الديموقراطية .. مهما اقنعوك بغير كدة .. واللى مايشوفش من الغربال .. يبقى أعمى 😎
حفظ الله مصر وشعبها من كل سوء