01 Feb 2021
المظاهرات فى روسيا .. كيف ولماذا .. !؟
—————————————-
طبعا كلنا سمعنا عن المظاهرات اللى إندلعت فى روسيا بقالها أسبوع تقريباً … و بجملة المصادفات .. فــ المظاهرات دى بدأت تحصل بعد أيام من وصول الأخ “بايجون” للحكم فى أميريكا … وإمعانا فى الصدف .. و زى ما ذكرنا فى مقالنا السابق ، إنه فيه شخص إسمه “أليكسي نافالني” بــ يقولوا عليه زعيم المعارضة .. طلع فجأة كدة بدون مقدمات ، وهاجم الرئيس الروسى وإتهمه بالفساد ، وإنه عنده قصر سرى فى مكان سرى .. وإن قيمة القصر ده حوالى شخرمنتاشر دشليون دولار وفيه 500 غرفة .. وإن الرئيس الروسى عايش فى بذخ وسايب الناس الغلابة مش لاقيين ياكلوا !! 🤔 ..
لأ و إييه بقى … الأستاذ نافالنى، مصور القصر السرى ده غرفة غرفة وطبعا دخل القصر إزاى ، وعرف حكايته منين ، وقدر يتجول جواه بمنتهى الأريحية كدة بأمارة إييه ماحدش عارف … ولما تسأل الأسئلة دى ، هــ تحس كدة إنك سامع صوت الفنان محمد شرف رحمة الله عليه فى شخصية عماد فى فيلم الرهينة وهو بيقولك ” جرى إييه يا كلاوى .. وإحنا من إمتى فى الثورات والمظاهرات بنسأل الأسئلة دى .. !!؟” 😁 …
وبرغم نفى الرئيس الروسى لملكيته للقصر المزعوم ده ، هو أو أى حد من عيلته .. وبرغم نشر التلفزيون الحكومي صوراً للقصر اللي لا يزال في طور البناء .. وكمان أكد الملياردير أركادي روتنبرغ الشريك السابق لبوتين في الجودو واسمه مدرج على لائحة عقوبات غربيّة، السبت إنّه هو مالك العقار وإنّه بــ يبني فندق مش قصر ولا حاجة .. إلا إن ماحدش عايز يصدق !
تحس يا أخى كدة إنك شايف الواد “محما على” بتاعنا وهو بيتكلم وبيهيج الناس … و كأن سيناريوهات التهييج الجماهيرى واللعب على فكرة المظلومية والكربلائيات تم تدريسها لكل العناصر المشمومة دى فى نفس الكيلاس ! 😉🙂
طب السؤال اللى بيطرح نفسه .. هل دى أول مرة يحصل فيها مظاهرات فى روسيا … طبعا لأ .. بتحصل كتير .. وبيحصل إضرابات ، والناس بتنزل تعبر عن رأيها عادى .. منها مثلا فى يوليو الماضى لما حصلت مظاهرات حاشدة بسبب توقيف وإقالة حاكم مدينة خاباروفسك في أقصى الشرق الروسي واللي بــ يحظى بالشعبية لدى سكان المنطقة، وتعيين مسؤول آخر من قبل الكرملين .. ومنها كمان مظاهرات 2018 ، لما قررت الحكومة حجب التليجرام فى روسيا لدواعى أمنية .. وغيرها وغيرها من المظاهرات اللى بتحصل كل فترة والتانية … لكن إييه بقى اللى خلّى المرة دى الموضوع مختلف ؟؟
#أولا: إندلاع المظاهرات ده كانت بــ تتزامن زى ماقولنا مع وصول :بايجون” للحكم .. ومش كدة وبس .. لكن كمان طبقا لرأى الخبراء ، فــ المراقب لإختيارات “بايجون” لفريق الإدارة الجديدة هــ يلاقى إن معظم المسؤولين عن ملفات الخارجية والدفاع والأمن القومي والمخابرات والداخلية الأمريكية من نوعية الخبراء المنتمون إلى خبراء ملف العلاقات الروسية ، وملف الشرق الأوسط والملف المصري تحديدا.. و ده معناه إن التركيز فى التعامل مع الملفات الخارجية ، هــ يكون النصيب الأكبر له هو روسيا ومصر.
#ثانيا: إن المظاهرات ماكانتش مظاهرات عفوية ، لكنها مظاهرات مدبرة ، و مبنية على أكاذيب موضوع القصور والفساد ومظلومية الفقر والغلابة ، من أجل إشعال الأرض والدفع بالمواطنين للشارع .. بــ يفكرنى بموضوع الــ 70 مليار بتوع مبارك ومظلومية المعارضة الكيوت الجميلة ، وكربلائيات الإخوان والنشطاء !! .. وكل ده تم إدارته وتضخيمه بشكل ممنهج من خلال مواقع السوشيال ميديا .. حاجة كدة شبه اللى حصلت فى مظاهرات الخراب العربى وكل الثورات الملونة اللى حصلت فى بعض دول أوروبا الشرقية ..
ده اللى حدى بالنظام الروسى للقيام بحملة إعتقالات لأكثر من أربعة آلاف شخص بينهم أكثر من ألف شخص في موسكو على خلفية التظاهرات دى ، وعلى رأسهم “أليكسي نافالني” نفسه وتقديمه للمحاكمة .. وخصوصا مع تصاعد حدة المظاهرات ووصلت لبعض الصدامات فى بعض المدن الكبرى زى “سان بطرسبرج” و موسكو العاصمة اللى تحولت إلى قلعة محصنة في بعض الأماكن مع انتشار العشرات من شرطة مكافحة الشغب بالدروع والهراوات .. ناهيك عن إعتقال حولى 35 صحفيا وفتح أكثر من عشرين قضية جنائية على خلفية التظاهرات والإشتباكات
و طبعا مش محتاجين نقول إنه كعادة الضباع اللى بــ تعيش على أكل الجيف .. دخلت الإدارة الأميريكية على الخط ، وبدأت بالتنديد بالـ “أساليب العنيفة” بحق المتظاهرين في روسيا … و على تويتر، قال وزير الخارجية الأميركي أنتوني بلينكن إن الولايات المتحدة “تدين استخدام روسيا المستمرّ للتكتيكات الوحشية ضد متظاهرين سلميين وصحافيين للأسبوع الثاني على التوالي وتجدّد دعوتها إلى الإفراج عن الموقوفين من بينهم أليكسي نافالني .. يعنى نفس الإدارة اللى سحلت وقمعت وقتلت المتظاهرين اللى إقتحموا مبنى الكونجرس من كام يوم ، و أسمت اللى حصل بــ “الإرهاب المحلى” .. وإن كل اللى شارك فى اللى حصل ده يعتبروا مخربين … هى اللى بتطلب من روسيا النهاردة عدم قمع المتظاهرين السلميين 😁 … ماعرفتكش أنا كدة 😉🙃
و فى نفس الوقت أعرب وزير خارجية الاتحاد الأوروبي جوزيب بوريل عن أسفه لـ”التوقيفات الكثيفة” و”الاستخدام غير المتكافئ للقوة” خلال المظاهرات .. الكلام ده بيفكرنى لما هاجموا مصر فى معركة الإرهاب فى سيناء وإتهموا الجيش بــ إستخدام العنف المفرط مع الإرهابيين السلميين الكيوت اللى يادوب معاهم تسليح جيوش بس .
أاااه .. و نسيت اقول لكم إن زوجة “أليكسي نافالني” بتقوم ببطولة ملحمية على الإنستجرام ، وبــ تهاجم الدولة ، ويسقط الزولم والكمع .. وياحرية فينك فينك قمع الدولة بيننا وبينك … تحس كدة إنك قدام ثنائى “أيمن نور وجميلة إسماعيل” بس فى ثوب خراشو و كاك-ديلا 🙂
#الرد_الروسى: خرج من وزارة الخارجية بمطالبة الولايات المتحدة بوقف التدخل في شؤون روسيا الداخلية … وأقرت الخارجية الروسية بشكل قطعى إن التدخل الأمريكي الفظ في الشؤون الداخلية لروسيا حقيقة قائمة ، بالترويج المزيف والدعوات لتجمعات وحملات غير مرخص لها عبر منصات الإنترنت اللي بــ تسيطر عليها واشنطن .. وأضاف البيان إن “دعم وزير الخارجية أنتوني بلينكين لخرق القانون هو تأكيد آخر على دور واشنطن من وراء الكواليس”.
وشدد بيان الخارجية الروسية إنه “ليس هناك شك في أن الإجراءات التي تهدف إلى تشجيع الاحتجاجات هي جزء من استراتيجية احتواء روسيا”، وإنه يجب “وقف التدخل في الشؤون الداخلية للدول ذات السيادة”.
طبعا مش محتاجين نقول إن روسيا مش هــ تقول كدة وتتهم أميريكا فى بيان رسمى ، إلا لو كان تحت إيدين الإستخبارات الروسية أدلة ومعلومات بــ تؤكد الكلام ده !… يعنى المظاهرات اللى بتحصل على نطاق واسع وبشكل مفاجئ و بــ يتم الترويج لها بإستخدام السوشيال ميديا مش موزاهرات عفوية بــ يقودها الشوباب التاهر النكى !! … يعنى الدعم الخارجى وطلبات الإفراج عن اللى بــ يكدر السلم والأمن العام مش طلبات شرعية ولا دعم للحريات !! … يعنى المعارضة اللى بتكذب و تدلس على الناس وتستغلهم للدفع بيهم للنزول للشوارع لتحقيق أجندات وأهداف خاصة أو خارجية مش معارضة شريفة !! … يعنى تكرار الحدث بنفس الشكل والنسق والأسلوب مع إختلاف الزمان والمكان مش من قبيل الصدفة البحتة !! … يعنى بجد إنتى لكى الله يا مصر .. إنتى فعلا جبل اللى إستحملتى كل اللى حصل فيكى ده ! 😌
طب هل ده معناه إن روسيا خلاص بتقع !؟
أكيد لأ طبعا …
صحيح روسيا سقطت فى فخ الثورات الملونة قبل كدة ، مرة أثناء الثورة البلشفية ومرة بعد إنهيار الإتحاد السوفيتى و سقوطه فى مستنقع التقسيم … لكننا نستبعد ده بشدة فى الوقت الحالى .. لأن الوضع مختلف والزمان مختلف والإدارة مختلفة .. سواء إتفقنا أو إختلفنا حول شخصية الرئيس بوتين .. لكنه ثعلب حقيقى ، يجيد التعامل مع الأمور بالشكل المناسب !
القصة ومافيها زى ما قال بيان الخارجية الروسية .. إن اللى بيحصل ده هو سياسة الإحتواء .. يعنى حاجة كدة شبه سيب وأنا أسيب .. فى الوقت اللى أكدت فيه المتحدثة باسم الخارجية الروسية ماريا زاخاروفا، ضرورة اتخاذ إجراءات فعلية فى سبيل تنظيم أنشطة شركات الإنترنت العالمية ومواقع التواصل الأمريكية، وقالت زاخاروفا – في تصريحات أوردتها قناة (روسيا اليوم) إن سفارة الولايات المتحدة في موسكو وزعت عبر مواقع التواصل الاجتماعي بيانات مؤيدة للمظاهرات ، وتمت ممارسة أنشطة واسعة النطاق في هذا الصدد … يعنى الموضوع بقى عينى عينك .. وبجاحة .. وبلطجة
لكن الأهم بقى إن “ماريا زاخاروفا” قالت إنه بــ تجرى الآن دراسة خيارات الرد المحتمل على ما فعلته منصات الإنترنت الأمريكية، ولن يكون هذا الرد بشكل بيانات فقط، بل يجب اتخاذ إجراءات فعلية محددة 😱… طب الإجراءات دى اللى هى إييه يا ست الحاجة !؟ …
أدينا هــ نشوف ..
واللعب هــ يحلو ..
حضروا الفشار .. 🙂
حفظ الله مصر وشعبها من كل سوء