تنتخب مين

21 Nov 2015

تنتخب مين

———– 

قبل ما نقول ننتخب مين لازم نعرف ماننتخبش مين

ماتنتخبش حزب النور أو اى حزب من الاحزاب الدينية

ماتنتخبش المصريين الاحرار  المدعوم من ساويرس صحب الفكر المادى لرجال الاعمال اليساريين اللى عايزين يهدموا الدولة

ساويرس اللى شمت بعد حادث الطائرة الروسية وقال كدة العلاقات بين مصر وروسيا بظت

ماتنتخبش أى حد بيستخدم حقه فى الترشح فى انه يدفع فلوس للناخبين لمجرد الفوز والوصول للكرسى

ماتنتخبش حد مدلس كلامه غير أفعالة ومبادئه بتتغير على حسب الحاجة .. وماتنتخبش اى حد متلون بيغير وجهه على كل شكل ولون

ماتنتخبش اصحاب الشعارات البراقة واللى بيتكلم طول الوقت عن القهر والظلم والقمع وتكميم الأفواه وهو خاربها و على طول بيتكلم ويهاجم الدولة و عمر ماحد داس له على ذيل !!

ماتنتخبش حد بيستغل اوجاع الغلابة والفقراء وبيتكلم عنهم بالرغم انه مالوش اى نشاط سرى او علنى للدفاع عن الغلابة وعن حقهم !

ماتنتخبش حد مؤمن إنه لايمكن أخذ الحق الا من خلال الفوضى والمظاهرات .. لأن اللى زى ده داخل مجلس الشعب ليه غير علشان يقلبها فوضى لأنه لا يؤمن الا بالفوضى

اللى ولائه للثقافة الغربية وشايف اننا مش هانبقى كويسين غير لما نكون ماشيين على نهج الاميريكان لأنه فى الغالب اللى زى ده بيكون منفذ لتوجهات معينة وخفية !

اوعى تفتكر ان اللى بيشترى الناخبين بالأكل وملئ البطون .. او اللى بيصرف خمسة ستة مليون على الدعاية ، ممكن يكون بيعمل كل ده حبا فى الغلابة .. احنا مش فى ارض الاحلام .. لان اللى بيصرف على الغلابة بجد  مش بيدخل الانتخابات

طب نيجى بقى للسؤال المهم .. ننتخب مين !!؟؟

انتخب حد له تاريخ وطنى مشهود مش مجرد شوية مهيصة وشعارات وخلاص

انتخب حد يكون عسكرى او له خلفية عسكرية

انتخب حد مايكونش بيستخدم دعايته الانتخابية غير بالطريقة والاسلوب المحدد للدعاية بدون اى مبالغة او توزيع اموال وسكر وزيت ولحمة على الناخبين

انتخب حد مالوش اى اجندات غربية

انتخب حد وطنى بيحب بلده بجد وعايزها احسن بلد فى الدنيا من غير ما ينتظر مقابل .. ومش مستنى نصيبه من التورتة

شارك فى الانتخابات علشان خاطر بلدك ..

وقتك هو اقل تضحية ممكن تضحى بيها علشان تزق بلدك للأمام .. ولو كان تقيل عليك انك تصحى بوقتك ، .. فخليك فاكر ان فيه ناس بتضحى بعمرها علشان خاطر البلد دى تعيش ، وعلشان انت تقدر تؤدى دورك بأمن وأمان وتعيش انت وأولادك مطمئنين

تابعونا النهاردة الساعة 11 مساء فى بوست مجمع لكل أسماء المرشحين والقوائم اللى بنوصى بهم ..

لمتابعة تعليقاتكم