09 Mar 2021
مصر .. إعلان الجمهورية الثانية ..
———————————-
فى أول لقاء إعلامى فى 2014 إتعمل مع وزير الدفاع المصرى أنذاك بصفته المرشح لرئاسة الجمهورية … لما سأله الإعلاميين إبراهيم عيسى ولميس الحديدى عن البرنامج بتاعه .. كانت إجابته فى كلمتين “هــ تشوفوا العجب” .. وبعدين ذكر الحديث القدسى اللى بيقسم فيه ربنا بعزته وجلاله إنه هــ يرزق من لا حيلة له حتى يتعجب أصحاب الحيل (اللى هم الجن والعفاريت) …
و طبعا كلنا فاكرين من بعدها ويمكن لحد سنين قريبة كنا بنسمع السخرية والإستهزاء دايما فى جملة “ماعندوش برنامج” .. و هيئ هيئ .. وميئ ميئ .. لحد ما إختفت النغمة دى خالص .. بعد حجم وكم الإنجازات اللى بتتعمل على الأرض .. وأصبحت واقع بنعيشه … و بعد إدراك الجميع .. إن الراجل ده كان عنده حلم …. حلم كبير … لمشروع عظيم .. مشروع لو كان أعلن 10% منه فقط فى وقت ترشحه .. كان المؤيدين قبل المعارضين إتهموه بالجنون .. أو على أقل تقدير .. كانوا إتهموه بإنه بــ يبيع الوهم للمصريين !!
تخيل كدة لو كان المرشح الرئاسى عبد الفتاح السيسى أعلن فى 2014 إنه هــ يقضى على فيروس سى .. وهيعمل حملة 100 مليون صحة .. ويقضى على قوائم الإنتظار للعمليات الحرجة .. ويضاعف مخصصات الملف الصحى من الموازنة العامة ويعمل مشروع التأمين الصحى الشامل .. و هــ يضاعف الإحتياطى النقدى 4 أضعاف .. و هــ يعيد بناء البنية التحتية للدولة بالكامل .. وهيعمل عاصمة جديدة .. و هــ يبنى 13 مدينة جديدة و هيشغل أكثر من 5 مليون عاطل .. وهــ ينزّل معدل البطالة لأدنى مستوياته فى 30 سنة و هــ يعمل محطات كهرباء تعمل فائض كهربائى يكفينا ونصدر الباقى ونعمل ربط كهربائى مع الدول اللى حوالينا .. ويخلى مصر مركز الطاقة فى المنطقة .. ويعمل مشروع الرقمنة فى مصر .. و هــ يرسّم الحدود البحرية ,, وتبقى مصر HUB الغاز فى المنطقة .. ويزرع 2.5 مليون فدان و 100 ألف صوبة زجاجية .. ويقضى على العشوائيات الخطرة وينقل الناس فى سكن ادمى .. ويعمل حوالى 2 مليون وحدة إسكان إجتماعى .. ويعمل حوالى 4 ألاف كيلو طرق .. ويقضى على الإرهاب فى سيناء .. ويعمل فيها مجتمعات عمرانية وينقل لها مياه النيل .. ويبطن الترع فى مصر .. ويعمل مشروع تطوير 3500 قرية بحوالى 38 ألف مركز ونجع تابع .. ويبدأ مشروع تطوير التعليم .. ويعمل بنك المعرفة المصرى .. ويقلب منظومة الإقتصاد المصرى من إقتصاد ريعى لإقتصاد إنتاجى .. ويضاعف صادرات مصر من 12 مليار إلى 33 مليار لحد دلوقتى …. ويبنى القوات المسلحة من جديد ويضاعف القوة الضاربة ليها … وناهيك طبعا عن صورة مصر الخارجية وتعملق مكانتها بين كل دول العالم ….. وغيره وغيره وغيره .. و كل ده مجرد أمثلة وليس على سبيل الحصر
لو كان قال إن كووووووووووول ده هيتعمل فى 6 سنين .. ياترى كان ممكن حد يصدقه !!؟؟ … أكيد لأ .. مستحيل كان حد يصدق كل ده
والنهاردة .. النهاردة بس .. فى كلمته بمناسبة يوم الشهيد .. بــ يعلن الرئيس السيسى عن مشروعه …. عن حلمه اللى أمن بيه وسعى إنه يحققه .. مشروع الدولة .. دولة جديدة حديثة .. دولة تغير واقع أليم كنا عايشينه لسنين طويلة
النهاردة الرئيس السيسى بــ يعلن ميلاد #الجمهورية_الثانية .. واللى هــ يبقى بالتزامن مع إفتتاح العاصمة الإدارية الجديدة وكل المدن الجديدة اللى تم إنشائها من أول أسوان لحد العلمين الجديدة
مشروع مصر الجديدة أو مشروع الجمهورية الثانية .. كان هو المشروع اللى حاولت كل قوى الشر إنها تجهضه .. وتوقفه .. وإستخدموا علشان كدة كل كلابهم بكل اسلحتهم سواء بسلاح الإرهاب أو بسلاح الإعلام وحملات التشكيك .. أو حتى بالتهديد الفج الوقح بالتدخل المباشر فى مصر .. واللى لولا فضل الله ثم قوة جيشنا وتماسكنا كظهير شعبى للدولة المصرية .. ماكانش هــ يبقى مقدّر لمصر إنها تكمل وتقف .. وتناطح السحاب بمشروعها الجديد
المشروع اللى بالفعل تعجب منه اصحاب الحيل بفضل الله .. واثار تساؤل العالم كله .. برغم كل التحديات والصعاب .. والوقت القصيّر .. تساؤل واحد فقط مافيش غيره “أنتوا عملتوا كدة إزاى” !!!
حفظ الله مصر وشعب مصر