19 Mar 2021
المصالحة .. حقيقة أم فنكوش .. !!
———————————
اتكلمنا فى المقال السابق إللى نشرنا من كام يوم عن موضوع المصالحة بين مصر ودولة الاغا .. و إنه فيه سيل من التصريحات الناعمة صدرت من معظم المناصب السياسية التركية العليا ، من أول وزير الخارجية لوزير الدفاع لرئيس الحزب الحاكم للمتحدث بإسم الرئاسة .. و وصولا لرئيس الدولة نفسه
وقولنا ان الدولة المصرية لم تعر كل هذه التصريحات أى اهتمام .. وعملت من بنها حرفيا …. وبرغم تغير حتى لهجة الخطاب الإعلامى للقنوات التركية الناطقة باللهجة المصرية لمدة كام يوم كدة .. لكن بقيت مصر على صمتها .. لحد ما أسد الخارجية المصرية اتكلم مرتين بشكل عابر .. قال فى الأولى ان مصر لا تعنيها مثل هذه التصريحات وتنتظر أفعال حقيقية على الأرض.. وقال فى الثانية مكذباً تصريحات الاغا.. انه مافيش اى تواصل امنى بين الدولتين و إن التواصل الموجود هو تواصل ديبلوماسى عادى مش جديد من خلال التمثيل الديبلوماسى الحالى على مستوى القائم بالأعمال بالنسبة للجانبين
فى الحقيقة ان أى رؤية عقلانية منصفة بتقول ان أى نوع من المصالحة ممكن تتم بين مصر و دولة الأغا هتصب بالدرجة الأولى فى مصلحة الأتراك …. ايوة .. لأن فى حقيقة الأمر تركيا ماعندناش أى حاجة تديها لمصر .. لكن العكس هو الصحيح !!
⭕️ مصر النهاردة موجودة فى ليبيا من خلال علاقات متوازنة تضع مصلحة ليبيا فى المقام الأول .. وقائمة على الاحترام المتبادل … وعلشان كدة فــ أول زيارة خارجية قام بيها رئيس الحكومة الجديدة عبد الحميد دبيبة كانت لمصر للقاء الرئيس عبد الفتاح السيسى .. اما بالنسبة لدولة الأغا.. فــ محطوط عليهم تماما وماعندهمش غير شوية المليشيات بتوعهم واللى اخراجهم من ليبيا أصبح مسألة وقت بفعل الضغوط الأممية عليهم بتأثير الخط الأحمر المصرى
⭕️ مصر النهاردة رسّمت معظم حدودها البحرية فى شرق المتوسط طبقا للقانون الدولى واتفاقية اعالى البحار إللى وقعت عليها كل دول العالم ماعدى تركيا .. وبــ نستخرج الغاز بتاعنا بالفعل من حقل ظهر .. و ميت فل وعشرة .. وعقبال حقل نور .. والبقية تأتى
⭕️ مصر فيها مقر منتدى غاز شرق المتوسط بعضوية دول عربية واوروبية مع انضمام اميريكا والإمارات كمراقبين.. فى حين إن دولة الأغا فشلت فى أى تحرك خارج نطاق الشرعية الدولية للحصول على جزء من الكعكة بكل الهيصة واللغط إللى عملته الإدارة التركية سواء من خلال حكومة السراج العميلة فى ليبيا أو بمشاكل مع اليونان وقبرص
⭕️ غاز شرق المتوسط بالكامل هيتم اسالته فى مصر ثم تصديره إلى أوروبا.. وحتى خط ايستميد إللى كان هيتعمل بين إسرائيل وقبرص وكان هــ يمر فى جزء منه من المياه الإقليمية التركية .. النهاردة وبسبب عدم جدواه الاقتصادية .. وارتفاع المخاطر .. اصبح فيه كلام عن انه هــ يمر من مصر وصولا لأوروبا.. يعنى مصر بتحطم كل أحلام الأغا فى انه يبقى له أى استفادة .. وكمان مش هــ يقدر ينضم لمنتدى غاز المتوسط لأنه مش معترف باتفاقيات ترسيم الحدود البحرية إللى تمت .. ولا معترف اصلا بالقانون الدولى إللى بــ ينظم عملية الترسيم من خلال إتفاقية اعالى البحار
⭕️ مصر وقفت فى الأمم المتحدة فى 2016 وقالت إنه لا مستقبل لأى مليشيات مسلحة فى سوريا ويخطئ من يتوهم انها ممكن تشارك فى حكم الدولة السورية … وقد حدث
⭕️ النهاردة مصر بتوقع اتفاقيات إعادة الإعمار مع العراق .. وسايبة للأغا مشاكله مع الاكراد فى الشمال العراقى ..
⭕️ على مستوى العلاقات الدولية .. فــ مصر تمتلك مستوى غير مسبوق من العلاقات الدولية مع كل دول العالم تقريبا .. فى الوقت إللى فيه دولة الأغا عنده مشاكل مع كل دول العالم تقريبا .. يمكن باستثناء كشك الخليج .. ناهيك عن غضب اوروبى من سياسة البلطجة إللى بيمارسها .. ومقاطعة اقتصادية عربية تقودها السعودية
⭕️ كثير من دول العالم بتخطب ود الجيش المصرى علشان تعمل مناورات معانا وتدريبات مشتركة فى شرق المتوسط .. يعنى الامارات والسعودية والسودان وليبيا واليونان وقبرص وفرنسا وبريطانيا وروسيا وأخيرا اميريكا من كام يوم . كل دوول جايين لحد عندنا
⭕️ اما عن الملف الاقتصادى فحدّث ولا حرج .. لأن قوة مصر الاقتصادية وتوغلها فى محيطها الإقليمي والقارّى فى تزايد .. فى حين كلنا عارفين إللى بيحصل فى الاقتصاد التركى اللى بـ تتهاوى كل مؤشراته الاقتصادية يوم بعد يوم بسبب السياسات الخاطئة
⛔️⛔️ يبقى السؤال هنا هو .. اييه اللى ممكن تقدمه دولة الأغا لمصر !!؟ …
للأسف مافيش ….. مافيش غير شوية القنوات إللى عنده بجوقة الإعلاميين “ال.خ.و.ن.ة” .. بالإضافة لعناصر الجماعة الإرهابية وشوية المرتزقة إللى مشغلهم من “ك.ل.ا.ب” أهل النار
وبغض النظر عن كل اللى حصل إمبارح .. وسواء كان ده مجرد مناورة وكروت بتترمى كعربون محبة .. وهل هــ يتم تسليم الهاربين وكل العملاء وإلا لأ …. من الأخر .. دوول مايفرقوش معانا خالص فى حاجة …. خليهم له … يلبسهم .. هم كدة كدة أصبحوا حمل عليه لأنه بيصرف عليهم هو والكشك الخليجى بدون أى استفادة ملحوظة أو تأثير حقيقى على الأرض .. وماعادوش بيقدروا يحركوا شعرة فى المصريين … ويكفى إن رد الفعل الأولى والتلقائى للغالبية العظمى من المصريين الوطنيين بعد موضوع غلق القنوات .. كان هو الشماتة والسخرية والإستهزاء .. وإننا كمصريين مش هــ نلاقى حاجة كوميدية نتريق عليها بعد كدة …
يعنى من الاخر كدة … الأغا ماعندوش أى حاجة يقدمها لمصر .. ولا هو بيمتلك حاليا من الأدوات أو القوة إللى تخليه يقدر يضغط على مصر .. يبقى اييه إللى يخلي مصر اصلا تقبل المصالحة معاه بدون أى التزامات من ناحيته
هو بقى علشان فاكر ان مصر زيه .. وإننا ممكن ننتهج سياسات البلطجة واننا كلاب فلوس وغاز زيه .. فــ بيحاول يغرى مصر بإن مصلحتنا معاه .. وإننا لو نقضنا اتفقنا مع اليونان ورسمنا حدود بحرية معاه .. واللى هى طبقا للقانون الدولى لأعلى البحار مش موجودة اصلا … فــ بكدة من وجهة نظره احنا هنكسب أكثر ويبقى عندنا مساحة بحرية أكبر بالنسبة للمياه الاقتصادية …
لا ناصح .. يعنى احنا نعادى المجتمع الدولى كله ونخالف القانون الدولى .. ونظهر امام العالم اننا دولة مابتحترمش لا قانون ولا معاهدات ولا حقوق جوار علشان خاطر سيادتك !!
لا معلش.. ابقى تعالى يوم تانى من أول النهار ..
وعلشان كدة مصر ردت وقالت إن أى مباحثات يرغب فيها الجانب التركى ، حول ترسيم الحدود البحرية بالنسبة للمنطقة المتبقية والمتنازع عليها .. لازم تبقى مباحثات رباعية بين مصر واليونان وقبرص وتركيا ، تحت مظلة الشرعية الدولية …. مش مباحثات ثنائية تحت مظلة البلطجة
الخلاصة … اى نوع من التقارب مع دولة الأغا بنفس فكرهم الحالى وقيادته الحالية وانتهاج نفس السياسات الحالية هو تقارب محكوم عليه بالفشل … لأن لا هم هيوافقوا على الشروط المصرية اللى مصر كدة كدة هتحصل عليها برضاه أو غصب عنه …. ولا مصر ممكن تقدم لهم إللى هم عايزينه …
الا لو حصل تغيير جذرى فى الداخل التركى … و ده شيئ ممكن ياخد شوية وقت …
علشان كدة كنا دايما بنقول ان المعادلة صفرية..
لكن هتخلص ازاى !!؟؟ ..
ده بقى إللى هــ يبان .. واللى هــ نشوف نتائجه لو حصل .. ومش شرط نعرف التفاصيل إييه … لأن اللعب خلف الكواليس مابيعرفهوش غير اللاعبين الأساسيين فقط
وأدينا بنتفرج … 😉🙂
حفظ الله مصر وشعب مصر