الرسالة المصرية .. والعلاقة بين القناة والسد

02 Apr 2021

الرسالة المصرية .. والعلاقة بين القناة والسد !!

———————————————–

الرئيس السيسى من يومين وهو بــ يفتتح مدينة الدواء قال جملة مهمة جدا … قال إننا مستعدين لتقديم مايلزم علشان يبقى عندنا خاماتنا للتصنيع .. علشان مانبقاش محتاجين نجيب مواد خام من الخارج إلا فيما ندر ..  لأن الهدف مش المكسب ولكن الهدف هو #إمتلاك_القدرة … لأن إمتلاك القدرة أمر يتجاوز فكرة التكلفة والمكاسب أيضاً

هى دى خلاصة فكر الدولة بقيادتها السياسية الحالية … إمتلاك القدرة … لأن إمتلاك القدرة يخليك قلبك قوى .. وظهرك مسنود ومتأمن … وإرادتك حرة … وقرارك مستقل …

وعلشان كدة الدولة بتتحرك فى كل الملفات بالتوازى .. مهما كانت الإنتقادات .. ومهما كانت وجهات النظر الأخرى عن فقه الأولويات … وإييه اللى لازم يتعمل الأول … يعنى حاجة كدة عاملة زى التقدم فى ساحة المعركة .. وكل ماتتقدم خطوة .. تظبط خطوطك .. وتبنى تحصيناتك .. وبعدين ترجع تتقدم تانى .. وبالتالى الخطوط اللى إنت سايبها وراك بتبقى متأمنة تماما ويصعب إختراقها .. وإنت بتبنى عليها وبتخطى لقدام ..

مصر بتعمل كل حاجة على طريق إمتلاك القدرة .. وناهيك عن إمتلاك القدرة العسكرية .. لكنك بتتحرك فى كل حاجة .. أمن غذائى من زراعة وثروة سمكية وحيوانية .. وإعادة ترميم وبناء بنية تحتية قوية .. ومدن جديدة .. وتوطين صناعات .. وتحقيق فائض طاقة سواء غاز أو بترول أو كهرباء .. وبناء شبكات طرق .. وخطوط نقل .. وتنفيذ مشروع رقمنة متكامل .. وتوطين صناعات ..  وربط مفاصل الدولة .. وربط الشرق بالغرب والبحر الأحمر بالمتوسط .. وربط الدولة بمحيطها الإقليمى والدولى … ألخ ألخ ألخ ….

وأظن إننا شوفنا عينة صغيرة جدا من إمتلاك القدرة دى فى زمن كورونا .. لما كانت دول كبيرة بتعانى من أزمات فى السلع الغذائية مثلا .. وإزاى الناس كانت بتتخانق على الأكل فى السوبرماركت .. وإزاى كانت أرفف المحلات بتبقى خاوية .. لكن فى مصر كانت الأمور ماشية بشكل طبيعى جدا .. ومافيش سلعة واحدة نقصت من السوق …. و مش كدة وبس .. لكن مصر كانت من الدول القليلة جدا على مستوى العالم اللى حققت نمو إقصادى إيجابى فى 2020 .. مش إنكماش إقتصادى زى ما حصل مع كبريات اقتصاديات العالمية .. و مش إحنا اللى بنقول كدة .. لكن دى المؤسسات الإقتصادية الدولية هى اللى بتقول.

طب إييه علاقة المقدمة دى بالقناة وبالسد !!

أقولك يا سيدى ..

منظمة التجارة العالمية قالت إن أثناء تعطل القناة . كان الإقتصاد العالمى بيخسر حوالى 400 مليون دولار فى الساعة .. يعنى حوالى 9.5 مليار دولار فى اليوم .. يعنى قرابة الــ 58 مليار دولار فى خلال الــ 6 أيام اللى القناة تعطلت فيهم ….. إنت متخيل الرقم ده عامل إزاى … يعنى مجرد إرتباك بسيط لعدة أيام فى القناة المصرية عمل كل ده فى العالم !!

تخيل بقى لما مصر تعمل منتدى غاز شرق المتوسط .. وتبقى المورد الرئيسى للغاز إلى أوروبا .. تخيل لما مصر تعمل ربط كهربائى بين مصر ودول الخليج والشرق الأوسط و جنوب أوروبا .. تخيل لما مصر تعمل ربط تجارى إقتصادى مع دول أفريقيا . تخيل لما مصر تبقى جزء من طريق الحرير الصينى .. تخيل إنك تبقى من كبار المصدرين للسلع الغذائية فى العالم تخيل لما مصر تبقى مركز توطين الصناعات لكبريات الشركات العالمية .. تخيل لما مصر يبقى فيها 19 جامعة دولية  .. تخيل لما القوة العسكرية المصرية تبقى هى الضامن لإستقرار الشرق الأوسط بالكامل .. تخيل إنك تبقى الضامن والحامى لأوروبا من موجات الهجرة الغير شرعية

تصور بقى إن جزء كبير من الكلام ده إتحقق بالفعل بنسبة كبيرة جداً .. وفيه منها حاجات خلاص خلصت … وجارى إستكمال الباقى كجزء من عملية إمتلاك القدرة

طب عايزك بقى تتخيل الوضع النهاردة ده لو مصر إستقرارها إتهز … ياترى إييه اللى ممكن يحصل فى العالم !!؟؟ … وأديك شوفت عينة من اللى حصل فى قناة السويس .. وإزاى العالم كله كان واقف على ظوافره ….. صدقنى إنت النهاردة دولة محورية لها وزن فى العالم كله … وزن يضارع وزن الكبار .. بل وقد يزيد … بس إنت اللى مش عارف قيمة نفسك وبلدك

وعلشان كدة الرئيس السيسى لما زار القناة .. كان واقف بمنتهى القوة والثبات فى المؤتمر الصحفى اللى كان حاضره كل وكالات الأنباء العالمية .. ومن خلفه قناة السويس … ولما إتسأل السؤال إياه عن مشكلة النيل و السد الأثيوبيى .. كان الرد مش موجه لأثيوبيا .. ولكن الكلام كان رسالة مسجلة بعلم الوصول لكل من يهمه الأمر .. ومختومة بختم النسر المصرى

رسالة بتقول حاجتين:

#أولا .. إن المساس بأمن مصر وإستقرارها هــ يأثر على إستقرار المنطقة بشكل لا يتخيله أحد .. و ده التعبير اللى إستخدمه الرئيس السيسى بالحرف .. و بالتالى فــ عدم إستقرار المنطقة هــ يؤثر على إستقرار العالم كله

#ثانيا .. إن رد فعل مصر فى حالة المساس بأمنها القومى هــ يكون فى منتهى القوى .. وإنه مافيش حد بعيد عن قدرات مصر …… مافيش حد بعيد عن إييه يافندم !!؟ …… عن قدرات مصر حضرتك … أيوة (إمتلاك القدرة) .. العسكرية والسياسية والإقتصادية .. سوا بما تمتلكه بالفعل .. أو بما تستطيع إستخدامه من أدوات

الرئيس السيسى كرر جملة “إحنا مابنهددش حد” ثلاثة مرات … و ده من وجهة نظرنا ، له دلالة واحد بس .. إن مصر فعلا مش بتهدد .. يعنى مش بتفرقع كلام حنجورى فى الهواء … ولا بتقول تصريحات شعبوية … لكن مصر بتتكلم من مركز قوة .. وعن قدرة …..

والرسالة موجهة زى ما قولنا .. لكل الأطراف المعنية …

يعنى #الخلاصة …

الفرق بين مصر 2014 ومصر 2021 .. هو نفس الفرق بين جملة “لما أكبر هــ أضربكم” وجملة “اللى عايز يجرب .. يجرب” 😉 🙂

حفظ الله مصر وجيشها وشعبها

لمتابعة تعليقاتكم