03 Apr 2021
الموكب الملكى المصرى ..
عندما يصمت الكون تعظيما وتبجيلا .. !!
—————————————
إنت متخيل إن مصر النهاردة بــ تنظم حدث بهذه الضخامة .. وبيقوم على نقله أكثر من 400 قناة وموقع إخبارى عالمى .. يعنى العالم كله حرفيا كان بــ يشاهد مصر النهاردة .. و بــ يشوف إزاى المصريين بــ ينظموا حدث لا مثيل له … وبمستوى معجز من الإبهار والتنسيق والإبداع .. والدقة فى التوقيت …. بما يعجز عن تنظيم مثله أى دولة فى العالم ..
إنت متخيل إن العالم كله النهاردة كان بــ يتفرج على موكب نقل مومياوات 22 ملك وملكة من أعظم من حكموا مصر .. بل من أعظم من حكموا العالم .. ممثلين لحضارة كانت ومازالت وستظل هى الحضارة الأعظم على الإطلاق فى التاريخ الإنسانى …
الحضارة دى اللى هى أصلك .. وتراثك .. وتاريخك ….. ذلك التاريخ الذى يتسابق كل الأجناس والأعراق والحضارات الحديثة من أجل الإنتساب إليه .. أو نسبة هذا التاريخ إليهم حتى ولو بالتزوير والكذب من فرط عظمة هذا التاريخ
إنت متخيل إنه فى الوقت اللى العالم كله وبالذات دول العالم الكبرى .. بــ يعانوا من جاحة عالمية .. أجبرتهم وأجبرت شعوبهم على البقاء خلف الأبواب فى بيوتهم .. أو التحرك بأقصى درجات الحذر وأعلى مستوى من القيود ، خوفا من المرض والعدوى .. فــ تيجى إنت تنظم حدث عالمى فى ظل نفس الظروف .. و بمنتهى الأريحية .. علشان تبعث رسالة للعالم كله تقول فيها إننا مصر .. مصر التاريخ .. مصر الحضارة .. مصر التى لا تخضع .. مصر التى لا تموت مهما كانت الظروف
إنت متخيل إن مصر النهاردة بــ تعيد إكتشاف نفسها و بــ تقدم نفسها من جديد للعالم كله .. وبتقول للقاصى والدانى إننا إحنا أصل التاريخ .. وإننا إحنا صنّاع الحضارة … وإن أى محاولات لطمس الحضارة دى أو تشويهها أو هدمها .. مش ممكن أبدا هــ تنجح مهما حاول المغرضين والمتربصين
تخيل إن المغرضين بقالهم كثير بــ يحاولوا يقنعوك إنك فاشل وإن دولتك فاشلة .. واللى يقولك إن حضارة المصريين دى حضارة وثنية يجب طمسها وهدمها .. واللى يقولك إنها حضارة مزيفة وكاذبة .. واللى يقولك دوول ناس من كواكب تانية .. المهم إنهم يقنعوك إنك فاشل .. وإن تاريخك مزيف .. وإنك كمصرى لا تنتمى لأعظم حضارة فى التاريخ .. فــ إذ بمصر تفاجئ العالم كله بتنظيم حدث يتحدث عنه العالم كله .. و عن أصل الحضارة المصرية.
يابنى يا حبيبى مافيش حضارة فى العالم لها علم كامل بإسمها غير الحضارة المصرية القديمة .. وهو علم المصريات أو الإيجبتولوجى … واللى بــ يتم تدريسه فى أعظم جامعات ومعاهد العالم .. و بــ ينظر له كل شعوب العالم بمنتهى الإحترام والتبجيل
إنت متخيل إن الميدان اللى كان شاهد على أكبر مؤامرة إتعملت على مصر فى تاريخها فى محاولة لإسقاطها .. النهاردة بيتحرك فيه موكب ملوك وقادة التاريخ المصرى .. بل ونجوم وعظماء التاريخ الإنسانى بالكامل علشان يخرجوا من المتحف المصرى ويتوجهوا لمتحف الحضارة الجديد … و دى أكبر وأهم رسالة بتوجهها مصر للعالم .. وهى إن مصر باقية مهما كانت التحديات
إنت متخيل لما رئيس بلدك يقف يستقبل ملوك وملكات مصر القديمة فى تبجيل وتعظيم وحفاوة رئاسية تليق بمكانتهم وعظمتهم .. و وقع ده على العالم كله إييه ؟
النهاردة مصر بتقدم نفسها للعالم وبتبعث رسالة للعالم كله بتقول فيه .. إننا مش بس بنبنى حضارة جديدة فى كل المجالات على إمتداد أراضى مصر فى الدولة الحديثة … لكننا بــ نعيد إكتشاف وتقديم وإنتاج الحضارة المصرية القديمة للعالم .. حضارة المصرى القديم
الحضارة المصرية التى بدأت .. قبل أن يبدأ التاريخ
إرفع راسك فوق …
وإعرف قيمتك …
إنت مصر الأصل والحضارة والتاريخ القديم والحديث
إنت مصرى …
حفظ الله مصر وجيشها وشعبها